Read turkana Akisiakinet 16 Bible Online

Akisiakinet 16 - turkana bible

Akisiakinet 16

¹Emam ngide abu aberu a Aburam Sarai kidou. Ayei akedalan kech anyaritae Agar na abunit anakwap a Misiri.

²Sodi tolimok Sarai Aburam tama, “Kingolik a, kemik ayong Ekapolon Akuj ngide. Topero ka akedalan kang atopedorea ayong aanyun ngide anikeng.” Kiira Aburam ngakiro na alimokini Sarai.

³Ani adaunet a ngikaru a ngitomon na alomitor Aburam nakwap a Kanaan, kipoto Sarai akedalan keng na anyaritae Agar na abunit anakwap a Misiri, nak Aburam kitiliwo aberu keng.

⁴Topero Aburam ka Agar, topoti Agar. Ani na engolikinea Agar atamar apoti ngesi, kimenya Sarai.

⁵Sodi tolimok Sarai Aburam tama, “Iyong kapaikinit ayong ngakiro nakemenyaritor ayong Agar. Ayong kolong epotori ngesi kainak iyong. Ani ingolikini ngesi atamar apoti, kemenya ngesi ayong. Kimiekisi Ekapolon Akuj totiaku atamar ngae aniyok esechit, iyong kori ayong.”

⁶Nakaneni tolimok Aburam Sarai tama, “Kingolik a, eraakasi ngakiro a akedalan kon ngaka akiding kon, tosubea iyong ngesi ngakiro na isakit iyong asubea.” Sodi toboliar Sarai Agar niaronon, todok Agar.

⁷Torukau emalaikat a Ekapolon Akuj ngesi alolelea a ngakipi alo eyei nariet. Erai elelea ngolo lo ayei lorot lo etenere Chur.

⁸Kingit emalaikat a Ekapolon Akuj Agar tama, “Agar na irai akedalan a Sarai, aliwae ibunio iyong, ani aliwae ilosi iyong?” Tatachu ngesi tama, “Adokinit ayong ani eyei akapolon kang Sarai.”

⁹Tolimok emalaikat a Ekapolon Akuj ngesi tama, “Tobongo ni eyei akapolon kon, sodi kiwap ngakiro keng.”

¹⁰Tolimok nabo emalaikat a Ekapolon Akuj Agar tama, “Etalalae ayong ngalesea kon tongop kona imarunio.

¹¹Kingolik a, ipoti iyong, nakaneni idouni ikoku nisapat. Inyarae iyong ekiro keng Ichimael,[23] kainyo eira Ekapolon Akuj akigoro nakiboliare iyong.

¹²Nakaneni ikokini lokookon asikiria nakaturonon. Eremokin ngesi ngitunga daang, nabo eremokinosi ngitunga daang ngesi. Ipakar ngesi ani eyakasi ngiyenet keng daang.”

¹³Sodi tolimok Agar Ekapolon Akuj na eruorosi ka ngesi ekiro be, “Akuj Na Itee.” Etami ngesi bon ebala, “Ekoe, tokona ibore en, aanyunga ayong Akuj edong ayari a?”[24]

¹⁴Ngakiro nguna kesi enyaritotor ngitunga akar na eyei kiding Kadech ka Bered a ekiro be Beer-laai-roi.[25]

¹⁵Kidou Agar ikoku a Aburam nisapat. Tolimok Aburam ikoku nisapat ngini ekiro be Ichimael.

¹⁶Araakasi ngikaru a Aburam ngitomwon-kauni ka ngikan-kapei na edounio Agar Ichimael.