Read turkana Akisiakinet 17 Bible Online

Akisiakinet 17 - turkana bible

Akisiakinet 17

¹Ani enangete ngikaru a Aburam ngitomwon-koomwon ka ngikan-koomwon, bu Ekapolon Akuj tolimok ngesi tama, “Ayong arai Akuj Naationon. Kiwap ngakiro kang sodi tosubeene na eteniyete.

²Kichamakin ayong ka iyong sodi etalala ngalesea kon noi.”

³Tadakakin Aburam kwap tatap ereet ngalup.[26] Tolimok Akuj ngesi tama,

⁴“Kingolik a, kichamakin ayong ka iyong, sodi toliwor iyong apaakeng a ngibukui alukaalak.

⁵Nyeringa nabo ekiro kon erai Aburam, nakaneni eliwor Aburaam[27] kainyo ketiliwo ayong iyong apaakeng a ngibukui alukaalak.

⁶Etalalae ayong ngalesea kon lokojokon, toliworos ngibukui. Epote ngikapolok anikon.

⁷Nakaneni erichakini ayong achamunet nakichamakin ayong ka iyong toliwor aka iteni jik. Aliwor ayong Akuj kon, ka Akuj a ngalesea kon.

⁸ Kainakini ayong iyong ka ngalesea kon akwap na tokona ipeyonitor iyong naga. Eliwor akwap a Kanaan daang aka ngalesea kon jik nakaneni aliwor ayong Akuj kech.”

⁹Tolimok Akuj Aburaam tama, “Ejoikinit iyong ichamuni akirichakin achamunet kang. Kirichakisi iyong ka ngalesea kon jik.

¹⁰Achamunet kang naga, na ejoikinit iyong irichakini. Anikang ka iyong, ta ngalesea kon daang na isidiunosi, ejoikinit ikoku nisapat daang ilengerio.

¹¹Kilengerio esi ani etuborere amuny na alo kidiama, nakaneni eliwor ibore ngini emachar a achamunet ana kichamakin ayong ka esi.

¹²Ilengerio ikoku nisapat anikus ni eraakasi ngirwa keng ngikan-kauni. Ikoku nisapat daang analesea kus, kerai ni idounitoe anawi kus kori ni egielunitae a ngaropiyae, tarai nyerai ales kon.

¹³Ejoikinit ilengerio ngini idounitoe anawi kon ka ngini igielunit iyong a ngaropiyae kon. Nakaneni emini achamunet kang nawat kus, toliwor achamunet nakajik.

¹⁴ Ani ekile lo nyilengeritae, ipakario alotunga keng, asech ngesi achamunet kang.”

¹⁵Tolimok Akuj Aburaam tama, “Nyiinyara nabo aberu kon Sarai. Napei tokona jik, eliwor ekiro keng Sara.

¹⁶Apiari ayong ngesi, nakaneni kainakini ayong iyong ikoku kidou ngesi. Apiari ayong ngesi toliwor itiokeng a ngibukui. Epote ngikapolok lu epolokinete ngitunga analesea keng.”

¹⁷Sodi tadakakin Aburaam kwap, tatap ereet keng ngalup,[28] sodi tokieni. Kitama bon ebala, “Ekoe, epedori itwaan auriun ikoku kerata ngikaru keng amiat apei a? Epedori Sara na eraakasi ngikaru keng ngitomwon-koomwon akidoun a?”

¹⁸Kingit Aburaam Akuj tama, “Nyo peimiekinea iyong Ichimael toliwor ngesi irumi awi kang?”

¹⁹Tolim Akuj tama, “Mam. Idouni aberu kon Sara ikoku nisapat, sodi tolimok iyong ngesi ekiro be Isaka.[29] Erichakini ayong achamunet nakichamakin ayong ka ngesi toliwor akajik ani eyei ngesi ka ngalesea keng.

²⁰Ani anakiro a Ichimael, eira ayong ngakiro kon. Apiari ayong ngesi eatak ngalesea keng talalaketa. Eliwor ngesi apakeng a ngikapolok a ngitomon ka ngiarei nabo eliworosi ngalesea keng ngibukui lu eyenikinitae.

²¹Nakaneni erichakini ayong achamunet kang ani eyei lokookon Isaka, lo idouni Sara ekaru lo moi, ngirwa lu ikote lu tokona lugu.”

²²Ani na eruorotor Akuj ka Aburaam torumor, torotok Akuj.

²³Tolem Aburaam lokookeng Ichimael ka ngikedalak daang lu edounio anawi keng, ka lu agielunio a ngaropiyae, ta itwaan daang ni arai ikile anawi a Aburaam, sodi kilenger kesi loger lo adungokinitor Akuj.

²⁴Araakasi ngikaru a Aburaam ngitomwon-koomwon ka ngikan-koomwon na elengerere.

²⁵Araakasi ngikaru a Ichimael alo arai lokookeng ngitomon ka nguuni na elengerere.

²⁶Akolongit napei ngina, kilengerae Aburaam ka lokookeng Ichimael.

²⁷Kilengerae tani ngitunga daang a awi a Aburaam, lu edounitoe anawi keng, ka lu agielunitae a ngaropiyae.