Read turkana Akisiakinet 19 Bible Online

Akisiakinet 19 - turkana bible

Akisiakinet 19

¹Tanangut ngimalaikae luarei ngulu lore a Sodom ebong. Nakaneni ebooyi Loti alokidor a ere. Ani eanyungari Loti kesi, tonyou tolot akisiriamiar, sodi toriedik kijuuru alongaren kech.

²Tolim tama, “Ngikapolok kang, tolomutu kare nawi a ekasuban etich kus, kilotasi ngakejen kus sodi topero. Ani erumor tonyout nataparach toloto ni iloose.” Tatachut kesi tamasi, “Mam, kiperi sua nikalapatan a ere.”

³Nakaneni kimaima ngesi kesi lokojokon, sodi tachamut alomar nawi keng. Kisumuj ngesi kesi. Tolimok Loti ngikasubak etich atamar kidorokis ngamugati napadok, sodi tanyama kesi.

⁴Ani eringa ngipeyok nyepero, kiriama ngitunga a Sodom awi. Ayakasi ngitunga daang a ere kangolo neni, lusorok ka lumojong.

⁵ Tanyarata Loti sodi kingita tamasi, “Nyaalu ngitunga lu apote akiper nawi kon akolongit naga? Kipud nikalapatan nege kainyo kisaki sua etopero kesi.”

⁶Topudo Loti nikalapatan sodi togolok ekidor.

⁷Tolimok kesi tama, “Talopae kang, kemaimai ayong esi atamar nyiisuba kare ngakiro naaronok ikote nguna.

⁸Kingolikisi a, eyakasi tanakookang ngaarei na eringa nyepero ka ngikiliok a ache. Kimiekisi kepudok ayong esi, sodi tosubeta ngakiro nguna isakete asubea. Nakaneni warasi nyiisubeta ngitunga lugu ngakiro ngadi kainyo alomut kesi nawi kang.”

⁹Nakaneni tatachut kesi tamasi, “Kiyotok kane! Abuni ngoon logo nege erai epeyonon, nakaneni esaki tokona aliwor ngesi kidodenakini ngoni ngakiro na ejoikinit kisubi a? Kisubea tokona sua iyong ngakiro naaronok noi na idwangito nakusubea kesi.” Kijukasi kesi Loti, sodi kiyotut diyete ekidor esakete akibwang.

¹⁰Nakaneni kiriyasi ngitunga luarei ngulu Loti tooma kai, sodi togolo ekidor.

¹¹ Ani erumor kitumudukana ngitunga daang lu ayakasi nikalapatan, luuchik ka luapolok, sodi tongopik kesi ekidor.

¹²Tolimokis ngitunga luarei ngulu Loti tamasi, “Ani keyakasi ngitunga kon ngiche nege lu eraakasi talokookon, ka tanakookon, ka talokamuran kon, kori ngiyenet kon, lu elomito lore logo, kipudo kesi atipei,

¹³kainyo kisaki sua akinyasun ere logo. Eira Ekapolon Akuj ngakiro naaronok na esubete ngitunga lugu nakaneni kimeu sua akinyasun Sodom.”

¹⁴Sodi tolot Loti lokiliok lu adikino iusete tanakookeng tolimok tama, “Tonyoutu torotokisi kane kainyo edikino Ekapolon Akuj inyasuni ere logo.” Nakaneni tamasi ngikamurak keng kori ebolia ngesi.

¹⁵Ani iwalari, kibunyakis ngimalaikae Loti ebalasi, “Tonyou toriko aberu kon ka tanakookon naarei eyakasi nege, sodi nyikimunyar esi na inyasunere ere.”

¹⁶Totinenik Loti anyoun. Nakaneni torwakinos ngitunga luarei ngulu Loti ka aberu keng, ka tanakookeng naarei ani esienitor Ekapolon Akuj Loti. Totinga ngakan sodi torikosi kesi tanang nikalapatan a ere.

¹⁷ Sodi tolim emalaikat epei tama, “Tamatar toyar! Wara nyiingoliu naabor kori nyiiwo a wadio anadipo. Tamataros lomukur sodi nyikinyasun.”

¹⁸Nakaneni tatachak Loti ngesi tama, “Mam kare ekapolon kang,

¹⁹kingolik a, kisubeta esi ayong naajokak ani kiyuuneta, nakaneni nyamatar ayong lomukur kainyo eloka. Kadolete ayong ngakiro ngache naaronok alorot sodi atotoan eringa nyenanga inaa.

²⁰Itee iyong nyire nidiochichi ia? Eapi nyire ngini. Kimiekinae ayong atolot inaa. Itee iyong atamar erai nyire nidiochichi. Ayari ayong kaneni.”

²¹Tatachak emalaikat ngesi tama, “Awaa, achamu ayong. Nyenyasuni ayong nyire ngini.

²²Tamatar atipei! Emam ibore asubakini ayong eringa iyong nyenanga inaa.” Ani kona abalar Loti edit nyire ngini, tolimokinae ekiro a ere kangolo Soar.[32]

²³Epiripirunit akolong na anangea Loti Soar.

²⁴Sodi tomeu Ekapolon Akuj akim nakariran anadis totep Sodom ka Gomora,

²⁵kinyasu ngirerea ngulu daang ta adipo ngina daang. Tomunya ngitunga daang a ngirerea kangulu ka ibore daang ni arupunit kaneni.

²⁶ Nakaneni kingolia aberu a Loti naabor sodi kibelei toliwor amoru a amakat.

²⁷Kiswakak Aburaam nataparach elilim tolot nisek awaatar ngesi ka Ekapolon Akuj.

²⁸Kingolia ngesi lowae a Sodom ka Gomora, ta akwap daang na ayei nadipo. Kingolik ngesi apuru idaaui anakwap kangina, ekoni apuru ngina na ebunit anadui ana erirae.

²⁹Nakaneni na enyasunea Akuj ngirerea a adipo ana alomit Loti, kitamu Akuj Aburaam sodi kimiek Loti ebuchar toyar.

³⁰Taramak Loti alo Soar, tolot toloma ka tanakookeng naarei lomukur, kainyo aemit ngesi akiboi alo Soar. Sodi toloma ngesi ka tanakookeng naarei naburibur.

³¹Tolimok nakookeng naapolon naachi tama, “Amojong apayok, nakaneni emam ngikiliok anakwap kana[33] lu kiusete ngoni sodi edoutu ngide.

³²Kimiekisi etamata apayok emuna lo epuritoe, sodi atopero ka ngesi, ataanyuneta ngide.”

³³Kitamata kesi apakech emuna nakwaare a akolongit kangina, sodi toloma naapolon topero ka apakeng. Ani kona erakaritor apakeng emuna noi, nyeyena ngesi atamar anukiro asubi.

³⁴Ani akwaar nache, tolimok naapolon naachi tama, “Kingolik a, kiperi been ayong ka apakang, kimiek etamata nabo ngesi emuna lo epuritoe akwaar naga, sodi toloma iyong topero ka ngesi, taanyunea ipei yok daang ikoku ani ka apayok.”

³⁵Kitamata kesi nabo apakech emuna lo epuritoe nakwaare a akolongit kangina. Tonyou naachi toloma topero ka ngesi, ani kona erakaritor apakeng emuna noi, nyeyena nabo ngesi atamar anukiro asubi.

³⁶Sodi topotiut tanakookeng a Loti naarei nguna ngide lu aurikini apakech.

³⁷Kidou naapolon ikoku nisapat, tolimok ekiro be Moab.[34] Ngesi erai apaakech a Ngimoab tanang akolongit naga.

³⁸Kidou naachi dang ikoku nisapat, tanyara ekiro keng Benami, ngesi erai apaakech a Ngiamon tanang akolongit naga.