Read turkana Akisiakinet 2 Bible Online

Akisiakinet 2 - turkana bible

Akisiakinet 2

¹Aloger kangolo torumor akisub adis ka akwap ta ibore daang ni eyei nikech.

²Ani akolongit na ngakan-kaarei, arumorit Akuj ibore daang ni asubi. Kianga akolongit na ngakan-kaarei, toisik akisub etich keng daang losek asubi.

³Topia Akuj akolongit na ngakan-kaarei, kitiliwo na ebekoono kainyo eangari ngesi akolongit ngina, kainyo akolongit ngina ngesi arumorea Akuj ibore daang ni asubi.

⁴ Ekokini Akuj esubi adis ka akwap neni. Akolongit na asubunea Ekapolon Akuj na erai Akuj adis ka akwap,

⁵amam ngikito ayakasi nakwap. Aringa nginyia nyerupuna, kainyo aringa Ekapolon Akuj na erai Akuj nyeyauna akiru nakwap, nabo amam itwaan ni adikino itae ngamanat.

⁶Nakaneni aleleununete ngakipi alotooma ngalup sodi tolelekis nalup wadaang.

⁷Tosub Ekapolon Akuj na erai Akuj itwaan alochoto. Kiangak Akuj akianget na a akiyar lokumes a itwaan kangini. Toliwor ngesi itwaan ni eyari.

⁸Kitak Akuj amana kide ni enyaritae Eden. Kiwaak ngesi itwaan ni asubuni ngini neni.

⁹ Kiturup Ekapolon Akuj na erai Akuj ngikito luajokak noi kaina. Araakasi ngikito ngulu lu kiminarete nabo lu kimui akinyam. Kiding amana ngina, ayei ekitoe loa akiyar, ta ekitoe lo eyenere naajokak ka naaronok.[4]

¹⁰Aleleununi angolol alo Eden, tolelek amana. Ani enangi neni, totiak toliwor ngangololin ngoomwon.

¹¹Enyaritae na ekingaren Pichon, ngina ngesi na iriamit akwap a Apila, na eyei egolit. (

¹²Ejok egolit a akwap kangina. Eyei ekitoe lokaakunyon ka ngamoru nakaalak a ngaropiyae.)

¹³Angolol na a ngaarei na iriamit akwap a Kuch[5] enyaritae Gion.

¹⁴Angolol na a ngauni na itorunit kide akwap a Asiria, enyaritae Tigiri. Enyaritae angolol na a ngoomwon Eupurate.

¹⁵Abu Ekapolon Akuj na erai Akuj kiwaak ekile mana a Eden esaki ngesi kita amana ngina nabo kiyok.

¹⁶Tolimok ngesi ekile ngolo tama, “Ipedori iyong akinyam ageor a ngikito kadaang alomana.

¹⁷Nakaneni nyiinyam ageor a ekitoe alo eyenere naajokak ka naaronok, kainyo akolongit na inyamea iyong ageor a ekitoe kangolo, itoani iyong.”

¹⁸Sodi tolim Ekapolon Akuj na erai Akuj tama, “Nyejoikinit itwaan ibooyi alopei, asubakini ayong ikengarakinan keng ni ikwaan ka ngesi.”

¹⁹Tosub ngesi ngitieng lua alomoding ka ngikieny, yau nia itwaan sodi tolimonok kesi ngirora. Apot ngirora lu alimokini itwaan kesi toliworos ngirora kech.

²⁰Tolimonok itwaan ngibaren daang ngirora. Tolimonok tani ngikieny, ta ngitieng lu alomoding. Nakaneni amam tani ipei kech ni ekwaan ka ekile ngolo ni apedori akingarakin ngesi.

²¹Kitojotoo Ekapolon Akuj na erai Akuj ekile ngaju nakapotiok, sodi tolem amaran apei ani erumor kimulelea neni a akiring.

²²Tosub ngesi aberu anamaran ana alemuni ani a ekile. Yau Ekapolon Akuj aberu ngina nia ekile.

²³Sodi tolim ekile tama, “Erai tokona naga akoit a ngakoyo kang, nabo akiring a akwaan kang. Enyarao ngesi Aberu,[6] kainyo alemunio ngesi Alokile.”

²⁴ Kotere ngakiro nguna eisikini ekile apakeng ka itiokeng kimorikin ka aberu keng, sodi toliworos akwaan apei.

²⁵Amam ibore anapito ekile ka aberu keng, nakaneni amam ngileech erumito kesi.