Read turkana Akisiakinet 20 Bible Online

Akisiakinet 20 - turkana bible

Akisiakinet 20

¹Taramak Aburaam alo Mamure toten lowae loa Negeb.[35] Tolom ngesi nakidingos a Kadech ka Chur. Ani na alomitor ngesi Gerar,

²tolim Aburaam atamar erai aberu keng nakaatokeng. Sodi tolim Abimelek lo erai ekapolon a Gerar atamar katorikokin ngesi Sara.

³ Nakwaare a akolongit a apei, bu Akuj nia Abimelek kisuruja tolimok tama, “Itoani iyong, kainyo ilema iyong aberu naga tarai iusitae sek.”

⁴Nakaneni aringa Abimelek nyepero ka Sara, sodi tolim ngesi tama, “Ekapolon, ipedori iyong akiar ngitunga lu nyesechito a?

⁵Aburaam elope ngesi alimuni atamar erai Sara nakaatokeng, nabo tama Sara dang erai Aburaam lokaatokeng. Asubi ayong nugu a etau aloajokon, nakaneni emam ibore asechit ayong.”

⁶Tatachak Akuj ngesi isurujae tama, “Ee, ayeni ayong atamar isub iyong nugu a etau aloajokon, nakaneni ayong ngesi keratakini iyong nyikisubakinea ayong naaronok, Ngakiro nguna kesi pekachamakinea ayong iyong itapi ngesi.

⁷Tobuak tokona ekile ngolo aberu keng kainyo erai ngesi ekadwaran a Akuj. Kilipakini ngesi iyong sodi nyiitoana. Nakaneni ani pekibua iyong aberu ngina, itoakete iyong ka ngitunga kon daang.”

⁸Sodi tonyou Abimelek nataparach elilim tanyarau ngikasubak etich keng daang wapei, tolimok ngakiro nguna daang. Tobul ngitunga ngulu daang noi.

⁹Sodi tanyarau Abimelek Aburaam kingit tama, “Anukiro kisubea iyong sua? Anukiro aronok kasubakinea ayong iyong sodi yaunea iyong akisech naaronon ikoni naga nikang ka akwap kang? Kisubea iyong ayong ngakiro na nyechamit kasubere.”

¹⁰Kingit Abimelek Aburaam tama, “Anukiro itamit iyong isubea kona?”

¹¹Tatachu Aburaam tama, “Abala ayong kori emam itwaan ekerit Akuj kane, abala nabo kori kaarete kesi ayong tolemasi aberu kang.

¹²Erai ngesi nakaatokang dir. Erai nakookeng a apakang, nakaneni meere itiokang idounit, sodi eut ayong ngesi.

¹³Ani naketonyounio ayong Akuj anawi a apakang toliwor elat anakwapea anache, atolimok ayong ngesi atama, ‘Tosubere ayong ngakiro naajokak a erot kalo, wadaang nicha kilosi ngoni, tolim iyong atamar arai ayong lokaatokon.’ ”

¹⁴Sodi tobuak Abimelek Aburaam aberu keng, nak nabo tani ngamesekin, ka ngaatuk, ta ngikedalak.

¹⁵Tolimok ngesi Aburaam tama, “Erai akwap naga daang akang, tolom nicha isaki iyong akilom.”

¹⁶Tolimok Abimelek Sara tama, “Kingolik a, ainak ayong lokaatokon ngaropiyae abunget apei sodi toyenea itwaan daang ni irukito ka iyong atamar nyisechit iyong. Eyenuni itwaan daang atamar emam ibore isechit iyong.”

¹⁷Sodi kilip Aburaam Ekapolon Akuj, kitojok Akuj Abimelek, kitojok tani aberu keng ka ngikedalak keng kidout ngide.

¹⁸Kainyo agolit sek Ekapolon Akuj ngakookies a ngaberu kadaang ana ayakasi nawi a Abimelek, peedoununete kotere Sara, na arai aberu a Aburaam.