Read turkana Akisiakinet 21 Bible Online

Akisiakinet 21 - turkana bible

Akisiakinet 21

¹Topia Ekapolon Akuj Sara loger losek echikakinitor.

²Abu Sara topoti, sodi kidou ikoku nisapat ngirwa lu amojongitor Aburaam. Kidounoe idia ngini ngirwa lusek abalar Akuj idounere.

³Tolimok Aburaam ekiro keng Isaka.

⁴Ani enangete ngirwa a Isaka ngikan-kauni, kilenger Aburaam ngesi, loger lo adungokinitor Akuj.

⁵Araakasi ngikaru a Aburaam amiat apei na edounere Isaka.

⁶Tolim Sara tama, “Kainu Akuj ayong alakara ka akiena,[36] itwaan daang ni iirari ngakiro nugu, kikieni ka ayong.”

⁷ Kiatak ngesi tama, “Kerai ngae epedori alimokin Aburaam atamar itanaki Sara ngide? Nakaneni edou ayong ikoku nisapat ngirwa lu amojongea ngesi.”

⁸Topolou ikoku, sodi kitapalikinae akitanak ngisikin. Tosubak Aburaam akimuj nakaalan akolongit na etapalikinere Isaka akinak.

⁹Akolongit apei taanyunga Sara idia ni aurikini Aburaam Agar Namisirit eboliasi[37] ka Isaka lo arai lokookeng.

¹⁰Tolimok Sara Aburaam tama, “Kitwarak aberu nakedalan naga ka lokookeng, kainyo nyirumete lokookeng a aberu anakedalan kana ngibaren aapei ka lokookang Isaka.”

¹¹Kialolong Aburaam noi kotere ngakiro nguna, kainyo arai Ichimael dang lokookeng.

¹²Nakaneni tolimok Akuj Aburaam tama, “Wara nyiialolong kotere idia ka akedalan kon Agar. Tosub ngakiro daang nakilimokini iyong Sara, kainyo nia Isaka ngesi ianyunea iyong ngalesea nakechikak ayong iyong.

¹³ Ani ikoni dang, ainakini ayong tani lokookeng a aberu anakedalan ngide lukaalak, sodi toliworos kesi ngibukui. Erai ngesi dang lokookon.”

¹⁴Sodi tonyou Aburaam nataparach elilim, tolem amugati ka echue a ngakipi nak Agar. Kitanap Aburaam Agar idia sodi kitwarak. Torotok Agar tolot akilare anariet a Beer-cheba.

¹⁵Ani na adaunotor ngakipi na ayakasi lochue, kimiek ngesi idia alotooma amoni,

¹⁶tolot ngesi kiboikin ni erai aoyau keng ngamitae amiat apei. Kitamana ngesi ebala, “Nyanaikini ayong akitere ikoku kang etoani.” Ani na ebooyo ngesi kaneni, tolomak ikoku[38] akigoro lokojokon.

¹⁷Kiira Akuj idia igoro, sodi kiruorik emalaikat anadis tolimok Agar tama, “Agar, nyo ialolongio iyong? Wara nyikibul. Eira Akuj idia igoro.

¹⁸Tonyou, tolot sodi tadaku ngesi kisililing. Etiliwori ayong ngalesea keng ngibukui lu eyenikinitae.”

¹⁹Sodi tangaa Akuj ngakonyen a Agar, taanyunga ngesi akar. Tolot ngesi kilelebik echue lo atingit ngakipi, sodi nak idia ngakipi.

²⁰Arukito Akuj ka idia na apolounio, kiboi ngesi anariet a Paran, toliwor irikae a ngimalea a amod.

²¹Tasakak itiokeng ngesi aberu anakwap a Misiri.

²²Ngirwa ngulu, toloto Abimelek ka ekarikon a ngasigerea keng lo anyaritae Pikol, tolimokis Aburaam tamasi, “Irukito iyong ka Akuj anakiro kadaang ana isubi.

²³Nakaneni kikong tokona ani a Akuj atamar nyikimodi iyong ayong, ka ngide kang, ta ngalesea kang. Kona kolong kasubea ayong iyong ngakiro naajokak, kikong atamar kisubea iyong ayong dang ka akwap na tokona ilomit iyong naga ngakiro naajokak.”

²⁴ Tolim Aburaam tama, “Ekongi ayong.”

²⁵Ani na engisea Aburaam Abimelek ngakiro a akar ana alemarete ngikasubak etich a Abimelek, tolim

²⁶Abimelek tama, “Nyayeni ayong itwaan ni kesubi ngakiro nugu. Nyelimokina iyong ayong ngakiro nguna, erai akolongit daang eirarea ayong ngesi naga.”

²⁷Sodi tomek Aburaam Abimelek ngamesekin ka ngaatuk, tachamunos kesi.

²⁸Kitegelia Aburaam ngamesekin naberu ngakan-kaarei totiak ka nache.

²⁹Kingit Abimelek Aburaam tama, “Nyo tokona eger a ngamesekin anakan-kaarei itegelia iyong kanu?”

³⁰Tatachu Aburaam tama, “Kainakini ayong iyong ngamesekin nakan-kaarei nugu, toliwor iyong ngesi itwaan ni ianyuni atamar ayong ngesi aboki akar naga.”

³¹Sodi tolimokinae neni ekiro be Beer-cheba,[39] kainyo neni ngesi ekongioto kesi.

³²Tachamakin kesi alo Beer-cheba. Sodi tonyout Abimelek ka ekapolon a ngasigerea keng enyaritae Pikol tobongosi nakwap a Ngipilisti.

³³Kitak Aburaam epeduru nakwap enyaritae Beer-cheba, sodi kilip ngesi elimit ekiro a Ekapolon Akuj, ana erai Akuj nakajik.

³⁴Tolom Aburaam nakwap a Ngipilisti nikooyen.