Read turkana Akisiakinet 22 Bible Online

Akisiakinet 22 - turkana bible

Akisiakinet 22

¹ Ani adaunet a ngakiro kanguna, kining Akuj Aburaam tanyara tama, “Aburaam.” Kiki ngesi tama, “Ayong lo.”

² Tolimok Akuj ngesi tama, “Tolem lokookon lo erai epei bon Isaka, lo imina iyong, tolot nakwap a Moria, kipeye iyong ngesi kaina alomoru alo kedodikini ayong.”

³Tonyou Aburaam nataparach elilim tobilu ngakito na ipeyoore akipeyos, toen esikiria keng, toriko Isaka ta ngikasubak etich keng ngiarei. Tonyout kesi toloto nisek alimokini ngesi Akuj atamar toloto.

⁴Ani akolongit na a ngauni, kingolik Aburaam akwap ngina elona.

⁵Tolimok Aburaam ngikasubak etich keng lu arukitotor tama, “Kidongo ka esikiria nege. Kilosi ayong ka edia ama elipa, ani erumor atobongutu ni iyakasi esi nege.”

⁶Kitadak Aburaam Isaka ngakito na ipeyoore akipeyos. Toting Aburaam elope ekileng ka akim. Kirukosi kesi aapei.

⁷Tanyara Isaka apakeng tama, “Apa.” Kiki Aburaam tama, “Ayong lo, lokoku.” Kingit Isaka apakeng tama, “Abe akim bo naga nabo ngakito nugu, nakaneni nyaani imesek ni ipeyeo.”

⁸ Tolim Aburaam tama, “Lokookang, elemuni Akuj alope imesek ni ipeyeo.” Apot kesi kirukosi aapei.

⁹Ani enangunete kesi ni alimokinit Akuj, tosubak Aburaam ekeno a ngakipeyos kaneni kinapak ngakito kidiama ekeno. Toen ngesi lokookeng Isaka ani erumor kiperik kidiama ngakito na ayakasi lokeno.

¹⁰Tolem ngesi ekileng esaki akiar Isaka.

¹¹Nakaneni tanyara emalaikat a Ekapolon Akuj ngesi anadis tama, “Aburaam, Aburaam.” Kiki ngesi tama, “Ayong lo.”

¹²Tolimok emalaikat ngesi tama, “Wara nyiitap idia kori nyiiwan, kainyo ayen tokona atamar ikerit iyong Akuj, ngesi pekimikea iyong ayong lokookon lo erai epei bon.”

¹³Kikeu Aburaam akou taanyunga emesek lo angichakina ngaamwar keng namoni. Tolot Aburaam kirum emesek ngolo, tolem toliwor akipeyos, kilunyokin nados a lokookeng.

¹⁴Tolimok Aburaam neni ekiro be, “Kiinakini Akuj.”* Tani akolongit napei naga, ebalasi ngitunga, “Alomoru a Akuj, kiinakini ngesi.”[40]

¹⁵Tanyara emalaikat a Ekapolon Akuj Aburaam na a ngaarei anadis

¹⁶tama, “Ebala Ekapolon Akuj, ekong ayong alimunit ekiro kang atamar kapiari iyong ani isubea ngakiro nugu, nyimika iyong ayong lokookon lo erai epei bon.

¹⁷Kapiari ayong iyong dir, sodi etalala ngalesea kon loger a alalau a ngikanyer alu eyakasi nadis, ka asinyen na eyei lokwaas a anam. Idwangete ngalesea kon ngimoe kech.

¹⁸Etamarete ngibukui a akwap daang topiarae kesi loger lo apiarea ayong ngalesea kon. Ikokinete nguna neni ani iwapitor iyong ngakiro kang.”

¹⁹ Tobongo Aburaam ni ayakasi ngikasubak etich, tonyout kesi daang toloto Beer-cheba ni alomit Aburaam.

²⁰Ani ekisidi kiira Aburaam atamar edou Milika ngide a lokaatokeng alo anyaritae Naor ngikan-kauni.

²¹Anyaritae lo ekingaren Us. Anyaritae lokaatokeng Bus. Anyaritae eche Kemuel, apakeng a Aram.

²²Ngirora aluche kesi Kesed, ka Aso, ka Pilidach, ka Yidilapu, ka Besuel

²³lo arai apakeng a Rebeka. Kidou Milika talokookeng a Naor ngikan-kauni. Arai Naor lokaatokeng a Aburaam.

²⁴Kidou apese a ngabwes a Naor na anyaritae Reuma ngide lu anyaritae Teba, ka Gaam, ka Taach, ta Maaka.