Read turkana Akisiakinet 23 Bible Online

Akisiakinet 23 - turkana bible

Akisiakinet 23

¹Kiboi Sara tarata ngikaru keng amiat apei ka ngitomwon-arei ka ngikan-kaarei.

²Totoan ngesi ani enyaritae Eburon, ani ayei nakwap a Kanaan, sodi kialolong Aburaam kotere akitu a Sara.

³Tonyou Aburaam ani aperio akwaan a aberu keng tolot tolimok Ngiiti tama,

⁴ “Arai ayong epeyonon lo kilomit ka esi nege. Togielakinae ayong wadio sodi atonukak aberu kang.”

⁵Tatachakis Ngiiti Aburaam tamasi,

⁶“Topupok ngakiro kosi ekapolon. Kiyen sua atamar irai iyong ekarikon lo kiyenikinitae. Tonukak aberu kon naliel cha daang nakijoikini iyong. Emam sua itwaan tani ipei nikimiki iyong aliel na inukakini aberu kon.”

⁷Toriedik Aburaam alongaren kech a arimatoi

⁸sodi tama, “Ani kichamito esi ayong anukakini aberu kang nege, tolimokisi kare cha Epiron lokookeng a Soar

⁹kainak ayong aburibur na enyaritae Makipela atogiel. Eyei aburibur ngina lokwaas a amana keng. Tolimokisi ngesi atamar asaki ayong akigiel a ngaropiyae ana itemokino iteete esi daang toliwor akang, sodi etiliwo ngalielin.”

¹⁰Arukito Epiron ka Ngiiti lu eriamiriamito lokidor a ere. Tolimok Epiron Aburaam ngakiro epupete Ngiiti daang lu ayakasi neni tama,

¹¹“Ekapolon, topupok mono iyong. Kainakini ayong iyong amana daang ka aburibur na eyei mana ngina. Kainakini ayong iyong iteete ngitunga a akwap kang daang, sodi tonukak aberu kon.”

¹²Toriedik Aburaam alongaren Ngiiti a arimatoi

¹³tolimok Epiron epupete ngitunga a akwap keng daang tama, “Kemaimai kare atamar topupok ngakiro kang. Kainakini ayong iyong ngaropiyae na itemokino agielea amana kon. Kemaimai iyong atamar tolema kare ngaropiyae nguna, sodi atonukak ayong aberu kang neni.”

¹⁴Tatachak Epiron Aburaam tama,

¹⁵“Ekapolon, topupok mono iyong ngakiro kang. Ani kang ka iyong a, nyo sek amana na eraakasi ngaropiyae keng ngamiae ngoomwon? Tonukak aberu kon neni.”

¹⁶Tachamakin Aburaam ka Epiron. Kitemok Aburaam ngesi ngaropiyae na alimuni ngesi epupete Ngiiti daang. Araakasi ngaropiyae nguna ngamiae ngoomwon, itemem ka egielit lo agieleta ngimuchurus ngirwa ngulu.

¹⁷Eger ngolo ngesi aliworor amana a Epiron na eyei Makipela, kide a Mamure, aka Aburaam. Toliwor amana, ka aburibur na ayei mana, ta ngikito daang lu ayakasi mana ngina, toliworos ngika Aburaam.

¹⁸Toyena Ngiiti daang lu eriamiriamito neni atamar eraakasi ngika Aburaam.

¹⁹Tonukak Aburaam aberu keng Sara naburibur na ayei nakwap a Kanaan.

²⁰Toliwor amana ka aburibur na ayei mana na Ngiiti ngina, aka Aburaam, kitiliwo ngesi ngalielin.