Read turkana Akisiakinet 24 Bible Online

Akisiakinet 24 - turkana bible

Akisiakinet 24

¹Abu Aburaam tomojong lokojokon, nakaneni apiarit ngesi Ekapolon Akuj anakiro kadaang.

²Tolimok Aburaam ekasuban etich keng lo amojongit akidwang luche daang, nabo ngesi aweikinit ngakiro a awi a Aburaam daang, tama, “Tongichak akan kon kiding ngakalokidingo[41] kang, kikong.

³Asaki ayong iyong kikong ilimit ekiro a Ekapolon Akuj, ana erai adis ka akwap ngakeng, atamar nyisekini iyong lokookang aberu alotunga a akwap a Kanaan ana alomit ayong kana.

⁴Ejoikinit iyong ilosi nakwap nakolong kedounere ayong sodi toseu aberu na eliwor aka lokookang Isaka, alotunga alu kiyana ka ayong.”

⁵Nakaneni kingit ekasuban etich keng ngesi tama, “Anijok bo towou apese anakwap kech tama nyikirukuni ka ayong nakwap naga? Arikori ayong lokookon nakwap nakolong ibunio iyong a?”

⁶Tolimok Aburaam ngesi tama, “Tochoite ibuari lokookang inaa!

⁷Ekapolon Akuj lo eyei nadis, ngesi kolong karikuni ayong anawi a apakang ka akwap a ngitunga kang. Ekongi ngesi atamar ainakini ngalesea kang akwap naga. Emeari ngesi emalaikat keng kingarenik iyong, sodi toseu iyong aberu a lokookang kaina.

⁸Nakaneni ani kewou apese ngina akirukun ka iyong, kilachakinio iyong anakikongiet kana. Wara nyiibua lokookang inaa.”

⁹Sodi tongichak ekasuban etich ngolo akan keng kiding ngakalokidingo a Aburaam alo arai ekapolon keng, ani erumor kikong atamar asubakini ngakiro na alimokini ngesi Aburaam.

¹⁰Ani erumor kipaku ekasuban etich a Aburaam ngikaala ngitomon, sodi anyoun etingit ngiboro luajokak lu ainakini ngesi ekapolon keng esaki tolot kipotono ani eteni. Tolot ngesi lore losek alomit Naor, lo ayei nakwap a Mesopotamia.

¹¹Na anangea ngesi neni, tokudok ngikaala diyete akar na ayei nikalapatan a ere. Arai esaa ngolo lo ebong, lo eloseeneto ngaberu akuok ngakipi.

¹²Kilip ngesi tama, “Ekapolon Akuj, Akuj a ekapolon kang Aburaam, kingarakinae akolongit naga nabo tosubak ngakiro na ichikakini iyong ekapolon kang.

¹³Ayong tokona logo ayei kare na epote ngapesur a ere kalo aokio ngakipi.

¹⁴Alimokini ayong apei kech atamar totiyau atubwa keng sodi kainak ayong ngakipi atamat. Ani kainaki ngesi ayong ngakipi namatan ani erumor kitamat ngikaala kang, kimiek apese ngina toliwor ngesi iseu iyong toliwor aka ekasuban etich kon Isaka. Kedodikini akiroit ngina ayong atamar iyook iyong ngakiro na ichikakini iyong ekapolon kang.”

¹⁵Ani eringa ngesi nyerumoro akilip, todolu Rebeka eriongakinit atubwa loseget. Arai ngesi nakookeng a Besuel alo edouni aberu a Naor na anyaritae Milika. Arai Naor lokaatokeng a Aburaam.

¹⁶Arai apese ngina nakebusean na aringa nyepero ka ekile a ache. Toloma ngesi kare kilelebik ngakipi natubwa keng sodi todoku alokare.

¹⁷Tamatar ekasuban etich ngolo kisiriamia ngesi tama, “Nakinae kare ngakipi na eyakasi natubwa kon atamat.”

¹⁸Tolim ngesi tama, “Tamat ekapolon,” sodi totiyau ngesi atubwa a ngakan keng, nak ekasuban etich ngolo ngakipi tamat.

¹⁹Ani kemat ngolo ngakipi kerumor, tolim apese ngina tama, “Aokokini ayong tani ngikaala kon ngakipi, tamata toupa.”

²⁰Sodi tolem ngesi ngakipi na ayakasi nakiruet tobukok nateger atipei, ani erumor tamatar kare aokun ngakipi ngache, sodi kitamat ngikaala daang.

²¹Toliwor itwaan ngini iseme ngesi ekiilingat, esaki akiyen kingarakinit ngesi ekapolon Akuj analotoru keng.

²²Na aupeta ngikaala ngakipi, tolem itwaan ngini ekababaat a egolit lo arai apotis keng anus a akilo. Tolem nabo ngasua a ngakan ngaarei na araakasi apotis kech ngakiloi ngatomon, nak apese ngina. Asubunitae ngasua nguna a egolit.

²³Kingit tama, “Tolimokinae ayong atamar irai iyong nakookeng a ngae? Eyei wadio kiperi sua anawi kus a?”

²⁴Tatachak Rebeka tama, “Arai ayong nakookeng a Besuel, alo edouni aberu a Naor na enyaritae Milika.

²⁵Eyei amelu nakaalan nabo eyakasi nginyia lukaalak nawi kosi. Eyei tani ni epereenete ngipeyok.”

²⁶Sodi kijuuru itwaan ngini kilip Ekapolon Akuj,

²⁷tolim tama, “Ekiro a Ekapolon Akuj kipuroe, Akuj na a ekapolon kang Aburaam, na eyook iteni dir ngakiro na echikakini ngesi ekapolon kang. Karik ayong Ekapolon Akuj eyoun lotunga luyenet a ekapolon kang.”

²⁸Tamatar apese ngina kai a itiokeng, tolimok ngitunga daang ngakiro na asubakinosi.

²⁹Ayei lokaatokeng a Rebeka lo anyaritae Laban. Tamatar ngesi kare ni ayei itwaan ngini.

³⁰Ani ingolikini Laban ekababaat ka ngasua na ayakasi nakan a nakaatokeng, nabo kiira ngakiro a itwaan kangini na alimokini Rebeka kesi, tolot ngesi ni ayei itwaan ngini. Awei itwaan ngini alo diyete ngikaala keng lu ayakasi diyete akar.

³¹Tolimok Laban ngesi tama, “Tolomu tooma iyong lo kipiarit Ekapolon Akuj. Nyoni iwaar anikalapatan? Asubak ayong akai na iperi iyong ka ni eperete ngikaala.”

³²Sodi toloma itwaan ngini kai. Talachak Laban ngikaala nak kesi nginyia ka amelu. Ani erumor inu Laban ekasuban etich a Aburaam ngakipi na ilotareta ngesi ka ngitunga lu arukitotor ngakejen kech.

³³Ani eyaunio akimuj, tolim itwaan ngini tama, “Nyemuji ayong eringa nyelimuno ngakiro na asaki alimun.” Tolimok Laban ngesi tama, “Awaa, kasio tolim.”

³⁴Tolim itwaan ngini tama, “Arai ayong ekasuban etich a Aburaam.

³⁵Erai ekapolon kang lo apia Ekapolon Akuj noi lo etiliwo ekabaran. Erai ngesi itwaan ni eyenikinitae. Ainaki Ekapolon Akuj ngesi ngamesekin, ka ngaatuk, ka ngaropiyae, ka egolit, ka ngikasubak etich lukiliok ka luberu, ka ngikaala, ta ngisikiria.

³⁶Sodi kidou Sara na arai aberu a ekapolon kang idia. Edouni Sara emojongit. Nakaneni ainaki ekapolon kang edia ngolo ngibaren keng daang.

³⁷Kesikongi kolong ekapolon kang ayong tama, ‘Nyiiseu apese na iusi lokookang anapesur a ngitunga a akwap a Kanaan alu alomit ayong nakwap kech.

³⁸Nakaneni tolot nakwap kang, ni eyakasi ngiyenet kang, sodi tasakak lokookang Isaka aberu.’

³⁹Engit ayong ekapolon kang atama, ‘Anijok bo towou apese anakwap kech tama nyikirukuni ka ayong nakwap naga?’

⁴⁰Nakaneni tatachu ngesi tama, ‘Ekapolon Akuj lo erai ngesi akerit ayong, emeari emalaikat keng sodi kirukosi ka iyong kingarak iyong analotoru kon. Toseu iyong aberu a lokookang alotunga alu kiyana ka ayong, alu eraakasi ngitunga a awi a apakang.

⁴¹Ani kilot iyong lotunga lu kiyana ka ayong towout ainakin iyong apese, kilachakinio iyong anakikonget kana.’

⁴²“Ani ananguni ayong kare akolongit naga, abu elip atama, ‘Ee Ekapolon Akuj, Akuj a ekapolon kang Aburaam, kelipit atamar kingarak akolongit naga nabo tosubak ngakiro na esaki ekapolon kang.

⁴³Ayong tokona logo awei alo diyete akar, kimiek toliwor apese na ebuni akuok ngakipi, ani atamari ayong nakinae kare ngakipi ngadikidio anatubwa kon atamat,

⁴⁴ani kechamu ngesi tookok tani ngikaala kang ngakipi tamata, kimiek ngina toliwor apese na iseu iyong kotere lokookeng a ekapolon kang.’

⁴⁵Ani eringa ayong nyerumoro akilip, todolu Rebeka eriongakinit atubwa keng a ngakipi loseget, toloma kare tooku ngakipi. Atolimok ayong ngesi atama, ‘Nakinae kare ngakipi namatan.’

⁴⁶Totiyau ngesi atubwa keng aloseget atipei, sodi tama, ‘Tamat, nakaneni aokokini ayong tani ngikaala kon ngakipi tamata.’ Abu ayong atamat, sodi tookok ngesi ngikaala ngakipi tamata.

⁴⁷Engit ayong ngesi atama, ‘Tolimokinae ayong atamar irai iyong nakookeng a ngae?’ Katatachak ngesi ayong tama, ‘Arai ayong nakookeng a Besuel, alo edouni aberu a Naor na anyaritae Milika.’ Abu ayong ewaak ekababaat lokume keng, sodi atobutok ngasua nakan keng.

⁴⁸Ejuuru ayong elip Ekapolon Akuj epuruunit, Akuj na a ekapolon kang, nakariki ayong keyoo nia nakookech a ngitunga alu eyanasi ka ekapolon kang, sodi atoseu ayong apese a lokookeng a ekapolon kang.

⁴⁹Tokona bocha, ani kisubakineta esi ekapolon kang ngakiro naajokak na eteniyete, tolimokinae. Ani pekisubakineta nguna, tolimokinae sodi atotiaku ayong na asubakini.”

⁵⁰Ani iirarete kesi nguna, tatachut Laban ka Besuel tamasi, “Kona ebunitor akiroit naga ani a Ekapolon Akuj, emam akiroit kitiakuni sua.

⁵¹Rebeka naga kane, toriko tolot. Toliwor ngesi aberu a lokookeng a ekapolon kon, loger lo alimunio Ekapolon Akuj.”

⁵²Ani iirari ekasuban etich a Aburaam ngakiro nguna, kijuuru toriedik sodi kilip Ekapolon Akuj.

⁵³Ani erumor tolem ngesi ngiboro lu esubitae a akwangat ana elalak ngaropiyae, ka egolit, ta ngiworui, nak Rebeka. Kipoto nabo dang ngiboro lu elalak ngaropiyae nak lokaatokeng a Rebeka ka itiokeng.

⁵⁴Apot ekasuban etich a Aburaam ka ngitunga lu arukitotor kimuja akimuj ka akimat emuna lo epuritoe, ani erumor topero neni. Ani enyounete nataparach tolim ngesi tama, “Kimiekinae ayong atobongo ni eyei ekapolon kang.”

⁵⁵Nakaneni tolimut lokaatokeng a Rebeka ka itiokeng tamasi, “Kimiek apese eruko mono ka sua wadio, kerai bo a ngirwa a ngitomon dang, ani erumor tolot ngesi.”

⁵⁶Nakaneni tolim itwaan ngini tama, “Nyikisibooyoto kare nikooyen, kona kengarakinea ayong Ekapolon Akuj analotoru kang, kimiekinae atobongo ni eyei ekapolon kang.”

⁵⁷Tamasi kesi, “Kimiekisi atanyarautu apese engita.”

⁵⁸Apot kesi tanyaraut Rebeka kingita ebalasi, “Irukorete iyong ka itwaan en a?” Tatachu ngesi tama, “Kirukori.”

⁵⁹Sodi kimiekis kesi Rebeka ka akasuban etich keng, irukorete ka ekasuban etich a Aburaam, ta ngitunga keng.

⁶⁰Topiasi kesi Rebeka ebalasi, “Iyong nakaatokosi, iliwor iyong itiokeng a ngabunge anakaalak noi, kiruma ngalesea kon ngirerea a ngimoe kech!”

⁶¹Ani erumor, tonyout Rebeka ka ngakasubak etich keng, todokasi lokaala esakete akirukor ka ekasuban etich a Aburaam. Apot kesi daang tonyout toloto.

⁶²Kebu Isaka towotu alo Beer-laai-roi sodi tolom nakwap a Negeb.[42]

⁶³Na ayakar Isaka namanat ebong ilipit, kingolia ngesi, taanyunga ngikaala eponito.

⁶⁴Ani ingoliari Rebeka taanyunga Isaka, todoku alokaal.

⁶⁵Kingit ekasuban etich a Aburaam tama, “Ngae yee elosi alomana ebunit akisiriam ngoni?” Tatachu ekasuban etich ngolo tama, “Erai ekapolon kang.” Sodi tolem Rebeka awaru keng kimukokin.

⁶⁶Kisisak ekasuban etich ngolo Isaka ngakiro daang na asubi ngesi.

⁶⁷Sodi toriko Isaka Rebeka tooma eam losek ebooyo itiokeng toliwor aberu keng. Tominak Isaka ngesi. Topwatun etau a Isaka anisek ealolongio itiokeng na atoani.