Read turkana Akisiakinet 25 Bible Online

Akisiakinet 25 - turkana bible

Akisiakinet 25

¹Kuut Aburaam aberu ache na anyaritae Ketura.

²Kidoik Ketura Aburaam ngide lu anyaritae Simuran, ka Yokichan, ka Medan, ka Midian, ka Ichibak, ta Chua.

³Touriu Yokichan Cheba ka Dedan. Ngalesea a Dedan kesi Ngiachurim, ka Ngiletuch, ta Ngileum.

⁴Ngalesea a Midian kesi ta Epa, ka Eper, ka Anok, ka Abida, ta Elidaa. Araakasi ngulu daang ngalesea a Ketura.

⁵Kimiekinea Aburaam Isaka ngiboro keng daang.

⁶Nakaneni inanak Aburaam talokookeng a ngapesur keng ana a ngabwes ngainakinet. Ani ngirwa lu aringaakar ngesi eyari, kitwarak kesi totena nakwap na ayei kide, tachadaros ani ayei lokookeng lo anyaritae Isaka.

⁷Araakasi ngikaru lu ayarea Aburaam amiat apei ka ngitomwon-kaarei ka ngikan.

⁸Totoan Aburaam akitu ajokon, erai ekasukout lo amojongit noi.

⁹Apot talokookeng a Aburaam lu anyaritae Isaka ka Ichimael, tonukakis apakech naburibur a Makipela, na ayei mana a Epiron alo arai lokookeng a Soar alo arai eka ekitela a Ngiiti. Arai neni kide a Mamure.

¹⁰Amana ngina ngesi nasek agieluni Aburaam alotunga a Ngiiti. Neni ngesi anukakinio Aburaam ka aberu keng na anyaritae Sara.

¹¹ Ani ketoana Aburaam kerumor, topia Akuj Isaka lo arai lokookeng a Aburaam. Alomit Isaka Beer-laai-roi

¹²Ichimael lo edoikini Agar Namisirit na arai akasuban etich a Sara, kidoik Aburaam,

¹³ayakasi talokookeng. Ngirora a talokookeng a Ichimael kesi lugu, iwapap a eger alo kolong edounere kesi. Anyaritae lo ekingaren Nebayos. Ngirora aluche kesi ta Kedar, ka Adibeel, ka Mibisam,

¹⁴ka Michima, ka Duma, ka Masa,

¹⁵ka Adad, ka Tema, ka Yetur, ka Napich, ta Kedema.

¹⁶Eraakasi ngulu talokookeng a Ichimael, lu erai nikech etorunete ngitela lutomon ka ngiarei, anyaritae ngirerea kech ka ngadakarin, a ngirora kech.

¹⁷Araakasi ngikaru a Ichimael amiat apei ka ngitomwon-uni ka ngikan-kaarei na atoanea.

¹⁸Alomito ngalesea a Ichimael nakwap na ayei nakidingos a Apila ka Chur, kide a Misiri, lowae lo etenere Asiria. Tachadaros kesi toloma nikalonan ani eyakasi ngalesea a Aburaam nache.

¹⁹Eraakasi nugu ngakiro a Isaka, alo erai lokookeng a Aburaam.

²⁰Araakasi ngikaru a Isaka ngitomwon-omwon na eusea ngesi Rebeka, na arai nakookeng a Besuel, alo arai Emaramit a akwap a Mesopotamia. Arai Rebeka nakaatokeng a Laban.

²¹Kotere ni araakar Rebeka akolup, kilip Isaka Ekapolon Akuj. Kiik Ekapolon Akuj akilip keng, sodi topoti Rebeka.

²²Topotiu ngesi ngimuu. Tobolokin ngide anakook keng, tolim ngesi tama, “Ani kikote ngakiro nege a, nyoni ayarea ayong?” Sodi tolot ngesi akingit Ekapolon Akuj eger a ngakiro kanguna.

²³ Tolimok Ekapolon Akuj ngesi tama, “Eyakasi ngibukui ngiarei nakook kon, ngitela ngiarei lu idouni iyong, etiakasi. Eliwor epei lokajwon noi akidwang loche. Eliwor loapolon ekasuban etich aloochi.”

²⁴Ani enangi ngirwa keng lu idounio, kidou Rebeka ngide lusapa lumuu.

²⁵Areng lo ekingaren, ekoni akwaan keng eleu lo eyakasi ngajul, sodi tolimokinae ekiro keng Esau.[43]

²⁶Kidounoe loa ngiarei etingit atitinyo a Esau, sodi tolimokinae ekiro keng Yakobo.[44] Araakasi ngikaru a Isaka ngitomwon-kapei na edounere Esau ka Yakobo.

²⁷Topolout ngide lusapa ngulu. Toliwor Esau lo ayenikinitae kotere akirikare ngitieng, lo amina eboyor loa lomoding. Tarai Yakobo itwaan nikelilingan, ni amina akiboi anawi.

²⁸Sodi tominak Isaka Esau ani aminar akinyam ngitieng lu aareene ngesi alorika, nakaneni tominak Rebeka Yakobo.

²⁹Akolongit apei, esaa lo epoo Yakobo ngimare, tobongu Esau nawi ebunit alorika. Anyamit Esau akoro lokojokon noi.

³⁰Sodi tolimok ngesi Yakobo tama, “Kanyam akoro atoana, toodokinoe kare akimuj naarengan ngina adio.” (Ngakiro nguna kesi alimokinere ekiro keng Edom.[45])

³¹Tatachak Yakobo ngesi tama, “Tajalakinae iyong ayong mono apolou na iraakar iyong ikoku ni ekingaren.”

³²Tolim Esau tama, “Mam ngakiro. Edikino tokona ayong atoani, nyoni ketaanyuni apolou kang na araakar ikoku ni ekingaren?”

³³Tolimok Yakobo ngesi tama, “Kikong mono atamar kijalakini iyong ayong apolou na iraakar iyong ikoku ni ekingaren.” Abu Esau kikong, tajalak Yakobo apolou na araakar ngesi ikoku ni ekingaren.

³⁴ Sodi nak Yakobo Esau amugati ka ngimare epewae. Kimuj Esau nabo tamat ngakipi, ani erumor, tonyou tolot. Kikok Esau imenyari apolou na araakar ikoku ni ekingaren neni.