Read turkana Akisiakinet 26 Bible Online

Akisiakinet 26 - turkana bible

Akisiakinet 26

¹Sodi min eron a akoro nabo eche nakwap. Egela eron ngolo meere lokolong a ekingaren ayei ngirwa lu ayarea Aburaam. Tolot Isaka nakwap a Gerar ni ayei ekapolon a Ngipilisti lo anyaritae Abimelek.

²Sodi bu Ekapolon Akuj nia Isaka tolimok tama, “Nyiilot Misiri, kiboikin nakwap nakalimokini ayong iyong atamar kiboikin.

³Tolom nakwap ngina eruko ayong ka iyong katopia. Eyookini ayong akikong nakolong ekongi ani eyei apakon Aburaam, kainyo kainakini ayong iyong ka ngalesea kon akwap naga daang.

⁴Etalalae ayong ngalesea kon loger a alalau a ngikanyer alu eyakasi nadis, sodi ainak akwap naga daang. Etamarete ngibukui a akwap daang topiarae kesi loger lo apiarea ayong ngalesea kon.[46]

⁵ Kapiari ayong iyong ani iwapea ngakiro nakechikakini ayong iyong, nabo irichak ngitalio kang daang ka ngakiro nakadungokini.”

⁶Sodi tolom Isaka Gerar.

⁷Ani ingisete ngitunga kaina ngesi ngakiro a aberu keng, tolim ngesi atamar erai nakaatokeng, kainyo akerit ngesi alimor atamar erai aberu keng, sodi nyeareta ngesi ngitunga ngulu tolemasi Rebeka, ani araakar aberu nakebusean.

⁸Ani kibooyoto kesi kaneni nikooyen kerumor, kingolia ekapolon a Ngipilisti lo anyaritae Abimelek alopuke a akai keng, taanyunga Isaka enuakinit Rebeka.

⁹Abu Abimelek tanyarau Isaka kingit tama, “Ikwa erai naga aberu kon a! Nyo bo ibalar iyong erai nakaatokon?” Tatachu Isaka tama, “Akeri ayong atama nyakaar kotere ngesi.”

¹⁰Kingit Abimelek ngesi tama, “Anukiro nugu kisubea iyong sua? Arai topero itwaan idio a akwap kang ka aberu kon, kilomakinit iyong sua losech.”

¹¹Sodi kichikichik Abimelek ngitunga daang tama, “Itwaan cha daang ni eboliar itwaan en kori aberu keng, eario.”

¹²Kitak Isaka ngikinyam nakwap ngina, sodi tolem ngikinyam amiat apei ani eyakasi lukolong etakini ngesi, kainyo apiarit ngesi Ekapolon Akuj.

¹³Apot ngiboro keng kiatakin talalaketa, toliwor ekabaran.

¹⁴Ani kona ayakatar ngesi ngisipaan a ngamesekin, ka ngaatuk nakaalak, ta ngikasubak etich lukaalak, toting Ngipilisti etereku kotere ngesi.

¹⁵Apot kesi tonuka ngakare daang nakolong abokete ngikasubak etich a Aburaam alo arai apakeng a Isaka, ngirwa lu aringaakar Aburaam eyari.

¹⁶Sodi tolimok Abimelek Isaka tama, “Taramak anakwap kosi. Iliwor iyong lokajwon noi kidwang sua.”

¹⁷Sodi taramak Isaka kaina, todukok adakar keng nadipo a Gerar, tolom neni.

¹⁸Toboka nabo Isaka ngakare nakolong abokio ngirwa lu ayarea apakeng Aburaam. Apot sek Ngipilisti tonuka ngakare nguna na atoanea Aburaam. Tanyara Isaka ngakare nguna a ngirora alupei kolong anyaritor apakeng.

¹⁹Tobokasi ngikasubak etich a Isaka akar anadipo a Gerar, sodi toleleut ngakipi nakaalak noi anakar kangina.

²⁰Tongolopa ngikeyokok lusek alomito neni ka ngikeyokok a Isaka ebalasi, “Ngakosi ngakipi nugu.” Sodi tanyara Isaka ekiro a akar kangina Esek,[47] kainyo angolopasi ngesi ka kesi.

²¹Tobokasi kesi akar ache, tongolopa kesi kotere akar ngina dang. Sodi tanyara Isaka ekiro a akar kangina Sitina.[48]

²²Ani erumor towot Isaka kaneni tolot wache tobokak akar neni, nakaneni nyengolopa kesi kotere akar ngina. Kotere ngakiro nguna, tanyara Isaka akar ngina Reobos[49] ebala, “Kitaanyu tokona ngoni Ekapolon Akuj nikaaloman, nakaneni kiatakin ngoni atalalaketa anakwap kana.”

²³Taramak Isaka kaina tolot Beer-cheba.

²⁴Nakwaare a akolongit anapei kangina, bu Ekapolon Akuj nikeng tolimok tama, “Ayong ngesi Akuj a apakon Aburaam. Wara nyikibul kainyo kirukit ayong ka iyong, kapiari ayong iyong sodi etalala ngalesea kon kotere Aburaam ekasuban etich kang.”

²⁵Sodi todukok Isaka ekeno a ngakipeyos neni kilip Ekapolon Akuj. Tolom ngesi neni, tobokakis tani ngikasubak etich keng akar neni.

²⁶Tonyou Abimelek alo Gerar erukito ka Ausas lo arai ekesuruoron keng, ta Pikol lo arai ekarikon a ngasigerea keng, toloto nia Isaka.

²⁷ Kingit Isaka kesi tama, “Nyo iponitotor esi nikang tarai kiremokino esi ayong kitwarakinete kolong ani iyakasi esi?”

²⁸Tatachut kesi tamasi, “Kingolik dir atamar irukito iyong ka Ekapolon Akuj. Ngakiro nguna kesi kingolikinitor sua atamar ejok kikongi ka iyong sodi atachamakin. Kisaki sua iyong kichikak sua

²⁹atamar nyikiwani iyong sua loger lo nyewana sua iyong. Emam naaronok kipot sua atosubeta iyong, pearai kipot sua emiekisi iyong ilosi akaalimon. Kipia tokona iyong Ekapolon Akuj.”

³⁰Kidorok Isaka akimuj nakaalan, tanyama kesi nabo tamata emuna lo epuritoe.

³¹Ani iwalari, tonyout kesi nataparach elilim kikongo. Kitena Isaka kesi, ani erumor totiakas niajokon.

³²Akolongit napei ngina, pot ngikasubak etich a Isaka tolimokis ngesi ngakiro a ngakare ana abokete kesi tamasi, “Kianyu sua ngakipi.”

³³Tanyara Isaka ekiro a akar kangina Chiba. Kotere ngakiro nguna, enyaritae ekiro a ere kangolo Beer-cheba[50] tani nakwaar na.

³⁴Ani enangete ngikaru a Esau ngitomwon-omwon, kuut ngaberu na araakasi Ngaiti ngaarei. Anyaritae apei Yudis nakookeng a Beer, anyaritae nache Basemas nakookeng a Elon.

³⁵Kisialolongo ngaberu nguna Isaka ka Rebeka.