Read turkana Akisiakinet 27 Bible Online

Akisiakinet 27 - turkana bible

Akisiakinet 27

¹Na amojongea Isaka tojongoto ngakonyen keng akitere akwap, tanyara ngesi Esau lo arai lokookeng loapolon tama, “Lokoku,” kiki ngesi tama, “Ayong lo.”

²Tolim Isaka tama, “Kingolik a, amojong ayong, nakaneni nyayeni akolongit na atoanea.

³Tokona bocha, tolem ngiboro kon lukirikaet, lu eraakasi ngimalea a amod ka akau, tolot erika naroatin, kitaarak etiengit.

⁴Ani erumor tosubak akimuj nakaabon napalem amina ayong, kiinu atanyam sodi katopia eringa ayong nyetoana.”

⁵Esaa lo esuruorea Isaka lokookeng Esau, apupi Rebeka ngakiro nguna. Sodi ani elosi Esau naroatin akirikare,

⁶tolimok Rebeka lokookeng Yakobo tama, “Eirari ayong apakon elimokini lokaatokon Esau

⁷atamar tolot taar etiengit sodi tosubak akimuj nakaabon, sodi tanyam ngesi topiarea Esau alongaren Ekapolon Akuj eringa ngesi nyetoana.

⁸Tokona lokookang, kiira ngakiro kang sodi kiwap nakalimokini.

⁹Kape losipanit a ngaanei kitorikok ngikaalei ngiarei lu ejokak, atosubak apakon akimuj nakaabon napalem emina ngesi.

¹⁰Sodi inaa iyong apakon tanyam, kitopiarea eringa ngesi nyetoana.”

¹¹Nakaneni tolimok Yakobo itiokeng tama, “Elalak lokaatokang Esau ngajul anakwaan nakaneni emam ayong na eyakasi.

¹²Ani bo jok katatap ayong apakang toyen atamar engalae ayong ngesi, aliwor ayong lo aanyuni ngilam, meere apiaro.”

¹³Tolimok itiokeng ngesi tama, “Kimiek ngilam kon toliworos ngikang, tosubak iyong nakalimokinit ayong iyong. Kape torikokinae ayong ngikaalei ngulu.”

¹⁴Sodi tolot Yakobo kirum ngikaalei ngiarei toriku nia itiokeng. Kidorok itiokeng akimuj nakaabon, napalem emina Isaka.

¹⁵Ani erumor tolem Rebeka ngiworui luajokak ayakasi kai, lu araakasi ngika lokookeng aloapolon anyaritae Esau, kitanap lokookeng loochi lobe Yakobo.

¹⁶Kitanap tani ngileui a ngikaalei kangulu anakan, ka nisulut a emosiring a Yakobo.

¹⁷Sodi nak ngesi Yakobo akimuj nakaabon ngina ka ngamugati na asubakini ngesi.

¹⁸Sodi toloma Yakobo ni ayei apakeng tanyara tama, “Apa.” Kiki apakeng tama, “Ayong lo. Iyong ngesi ngae lokoku?”

¹⁹Tatachak Yakobo apakeng tama, “Arai ayong Esau, lokookon lo ekingaren. Asubak ayong natete kilimokini. Tonyou kare apa tanyam akiring a etiengit alo aari ayong alorika sodi kitopia ayong.”

²⁰Kingit ngesi Isaka tama, “Ikokini iyong iari etiengit atipei kona ai, lokoku?” Tatachu Yakobo tama, “Erai nikengarakinea ayong Ekapolon Akuj, na erai Akuj kon.”

²¹Tolimok Isaka Yakobo tama, “Lokookang, taapuu chene nege katatap sodi atoyenea kirai iyong dir Esau.”

²²Taapia Yakobo ni ayei apakeng, tatap apakeng ngesi sodi tama, “Ikwaan etoil ka loa Yakobo, nakaneni ikwaan ngakan ka na Esau.”

²³Nyeyena ngesi Yakobo kainyo ayakasi ngesi ngajul nakaalak nakan keng loger ana a Esau, kotere ngakiro nguna, abu topia.

²⁴Kingit nabo tama, “Iyong dir irai lokookang Esau a?” Tatachu ngesi tama, “Ee, ayong lo.”

²⁵Sodi tolim apakeng tama, “Inunae robo akiring, atanyam etiengit lo aari lokookang, alorika ani erumor katopia.” Sodi inu Yakobo ngesi akimuj tanyam, inu tani emuna lo epuritoe, tamat.

²⁶Ani erumor tolimok Isaka lo arai apakeng ngesi tama, “Taapuu diyete lokookang, kitonuu.”

²⁷Ani eapiyari Yakobo diyete apakeng anuakin, kinguu apakeng akukuny a ngiworui keng topia ngesi. Tolim tama, “Enguu ayong akukuny a lokookang, ikwaan ka akukuny a amana ana apia Ekapolon Akuj.

²⁸Kimiek Akuj kiinak iyong ngakop a adis, ka ngalup naketurupunak ngikinyam, ta alalau a akimuj, ka emuna lo epuritoe.

²⁹ Kimiek ngibukui tosuba etich kon, nabo toriediko ngitunga anikon, a arimatoi. Toliwor iyong ekapolon a talokaatokon. Kimiek ngalesea a itiokon toriediko a arimatoi anikon. Itwaan daang nikilami iyong, ilamio ngesi dang, ani itwaan daang nikipiari iyong, epiario ngesi dang.”

³⁰Ani napei arumorea Isaka apiar Yakobo, napei arotokinio Yakobo, tobongu Esau lo arai lokaatokeng a Yakobo alorika.

³¹Kidorok Esau dang akimuj nakaabon, inaa apakeng tolimok tama, “Tonyou robo apa tanyam akiring a etiengit alo aari ayong lokookon alorika, sodi kitopia!”

³²Kingit Isaka ngesi tama, “Ngae iyong?” Tatachu tama, “Arai ayong lokookon Esau, lo arai lokookon lo ekingaren.”

³³Tamaranik Isaka lokojokon noi, sodi kingis ebala, “Ani ngae ngini tete aari etiengit sodi kainu ayong akiring atanyam? Anyam tete ayong akiring ngina eringa iyong nyebuno. Apia ayong ngesi arumor, aliwor ngesi lo epiaritae jik!”

³⁴Ani iirari Esau ngakiro a apakeng, kikalou iute tokuniikinite, ani erumor tolimok ngesi apakeng tama, “Topiarae kare ayong dang apa!”

³⁵Tolim apakeng tama, “Abuni lokaatokon kengal ayong, nakaneni alema ngesi apiaro kon.”

³⁶ Tolim Esau tama, “Ngakiro nguna kesi enyaritere ngesi Yakobo![51] Kamod ngesi ayong ngamodet ngaarei. Esiauni kolong ngesi tolema apolou kang na araakar ikoku ni ekingaren. Nakaneni alema tokona apiaro kang.” Ani erumor kingit ngesi apakeng tama, “Emam tokona apiaro adio kidekinit iyong ayong a?”

³⁷Tatachak Isaka tama, “Etiliwo ayong Yakobo ekapolon kon arumor, nakaneni ainak ayong ngesi ngikaitotoi keng daang toliworos ngikasubak etich keng. Ainak ayong ngesi akimuj ka emuna lo epuritoe. Nyo tokona asubakini ayong anikon lokookang?”

³⁸ Tolimok Esau apakeng tama, “Apa, apiaro apei bon kolong eyei iyong a? Topiarae kare ayong dang apa!” Sodi kikalou Esau kiute.

³⁹Sodi apakeng tolimok tama, “Ilonikinosi iyong ka ngalup naketurupunak ngikinyam, eloner tani anakop ana eponito anadis.

⁴⁰ Iyari iyong a ekileng kon, nakaneni isubi iyong etich a lokaatokon, ani kianyu iyong alolomu na ingerio[52] ngakiro keng, ingedi ibore ni eenitor ngesi eluute kon.”

⁴¹Toremokin Esau Yakobo kotere apiaro na apiari apakeng Yakobo. Kitam Esau ebala, “Aapuut ngirwa lu igorore apakang etoani tosutonokinae. Ani erumor, aari ayong Yakobo lo erai lokaatokang.”

⁴²Ani iirari Rebeka ngakiro a Esau alo arai lokookeng lo ekingaren, tomea itwaan anyarare Yakobo lo arai lokookeng loochi, sodi tolim Rebeka tama, “Etukit lokaatokon Esau akiar iyong sodi kiangunea ngesi.

⁴³Tokona bocha lokookang, kiwap ngakiro kang, todok tolot ni eyei lokaatokang Laban lo eyei nakwap a Aran,

⁴⁴kibooyoto ka ngesi kaina tanang ngirwa lu edaunor anyunyura a lokaatokon.

⁴⁵Ani edaun angoit a lokaatokon kimuriakis ngesi ngakiro nakolong isubea iyong ngesi, ameuni ayong itwaan kitobuu iyong. Nyo niti bore etoaketa talokookang daang kwasiarei akolongit apei en?”

⁴⁶Sodi tolimok Rebeka Isaka tama, “Ketuburut ayong ngaberu a Esau na eraakasi Ngaiti nugu. Ani kuut Yakobo dang aberu alotunga alu a Ngiiti kalu, nyo ibore iche eringa ayong ayarea?”