Read turkana Akisiakinet 28 Bible Online

Akisiakinet 28 - turkana bible

Akisiakinet 28

¹Tanyarau Isaka Yakobo topia. Kichikichik tama, “Wara nyiut aberu anakwap a Kanaan.

²Tonyou tolot Mesopotamia nawi a apaakon Besuel, kuut nakookeng a Laban alo erai amae kon.

³Kipiari iyong Akuj Naationon sodi touriu ngide lukaalak, toliworos esi asepich a ngitunga.

⁴Kipiari iyong Akuj ka ngalesea kon loger lokolong apiarea Aburaam, sodi kirumea iyong akwap na ilomit iyong irai epeyonon naga, akwap nakolong ainakini Akuj Aburaam!”

⁵ Tomea Isaka Yakobo tolot ngesi Mesopotamia nia Laban, lo arai lokookeng a Besuel alo arai Emaramit. Arai Laban lokaatokeng a Rebeka, ana arai itiokech a Yakobo ka Esau.

⁶Toyen Esau atamar apiari Isaka Yakobo ani erumor tolimok atamar tolot Mesopotamia, kuuta kaina. Toyen nabo atamar na apiarea Isaka ngesi, abu kitonger ngesi akuut aberu alo Kanaan.

⁷Toyen nabo atamar abu Yakobo kiwap ngakiro a itiokeng ka apakeng tolot Mesopotamia.

⁸Abu Esau toyen atamar nyejoikinito apakeng ngaberu na akwap a Kanaan.

⁹Kotere ngakiro nguna, tolot ngesi nia Ichimael lo arai lokookeng a Aburaam, kuut nakookeng na anyaritae Maalas, na arai nakaatokeng a Nebayos, kimorik ka ngaberu nache.

¹⁰Tonyou Yakobo alo Beer-cheba toten Aran.

¹¹Ani enangi wache, kinapakin neni kainyo adooyorit akolong. Tolem ngesi amoru apei kaneni kicholong, sodi tojotoor.

¹²Kiruja ngesi, anakirujare kangina, taanyunga ngesi adoket na etoweitae analup tanangite ewae lo alokidiama nadis. Adokanarete ngimalaikae a Akuj kidiama ka atiyaun anadoket kangina.

¹³Awei Ekapolon Akuj alokidiama adoket ngina.[53] Tolim tama, “Ayong ngesi Ekapolon Akuj, Akuj a apakon Aburaam ka Isaka. Kainakini ayong iyong ka ngalesea kon akwap na iperio iyong naga.

¹⁴Elalakearosi ngalesea kon kikokis apua analup, kialar lowaitin a akwap daang. Apiari ayong ngibukui daang kotere iyong ka ngalesea kon.[54]

¹⁵ Kiruki ayong ka iyong awadaang ani ilosi, ani erumor katobuu nakwap naga. Nyakaisikini ayong iyong tanang na asubakinea ngakiro nakechikak ayong iyong.”

¹⁶Abu Yakobo tokienyu tolim tama, “Iteni dir eyei Ekapolon Akuj nege, nakaneni peayeni ayong!”

¹⁷Tobul Yakobo tolim tama, “Abe kitubuli akwap naga noi! Erai nege dir akai a Akuj, erai tokona ngon ekidor lo engaaror adis ngesi logo.”

¹⁸Tonyou Yakobo nataparach elilim, sodi tolem amoru na echolongit kitowo erai akisitamunet, ani erumor kitiliwo abekot kiwasak akimiet[55] kidiama.

¹⁹Tolimok ngesi akwap ngina ekiro be Besel.[56] (Anyaritae kolong sek ekiro a ere kangolo Lus.)

²⁰Ani erumor kikong Yakobo ani Ekapolon Akuj tama, “Ani kiruk ayong ka iyong, sodi kiyok iyong ayong analotoru kang, kiinak akimuj ka ngiworui lu anapi,

²¹sodi atobongu nawi a apakang niajokon,

²²iyong Ekapolon Akuj ngesi iliwor Akuj kang. Ani amoru na etowo ayong kane erai akisitamunet, eliwor nikilipitere iyong, toliwor kainanakini ayong iyong alemunet apei anatomon a ibore kadaang ani kiinakini iyong ayong.”