Read turkana Akisiakinet 29 Bible Online

Akisiakinet 29 - turkana bible

Akisiakinet 29

¹Tonyou Yakobo tolot nisek alosi, tanang nakwap a ngitunga alu alo kide.

²Ani ingoliari ngesi, taanyunga akar anacharait, eurenete ngisipaan nguuni a ngamesekin alo diyete. Etamasio ngamesekin alokare kangina. Aburit amoru natiapolon akituk a akar kangina.

³Arai na achunakinotor ngisipaan a ngamesekin daang neni, kijukasi ngikeyokok aapei amoru anakituk a akar sodi kitamata ngamesekin. Ani kitamat ngamesekin kerumor, tobura nabo akar a amoru kangina.

⁴Kingit Yakobo ngikeyokok tama, “Ngikaitotoi kang, aliwae iponeta esi?” Tatachut tamasi, “Kiponi alo Aran.”

⁵Kingit nabo ngesi kesi tama, “Iyenete esi Laban lokookeng a Naor a?” Tatachut tamasi, “Kiyeni.”

⁶Kingit nabo tama, “Iboi ngesi niajokon a?” Tatachut kesi tamasi, “Iboi niajokon, Rael na erai nakookeng dang ngin erujunit ngamesekin keng!”

⁷Tolim Yakobo tama, “Engolikinit ayong atamar eringa apaaran, meere esaa lo echunere ngamesekin. Kitamata robo ngamesekin ani erumor taramasi lonyia.”

⁸Tolimokis kesi ngesi tamasi, “Nyikikokini sua neni mati mono kechunakin ngisipaan a ngamesekin daang wapei sodi kijukarae amoru anakituk a akar, ngesi kitamasea sua ngamesekin.”

⁹Ani eringa Yakobo iruorosi ka ngikeyokok ngulu, todolut Rael ka ngamesekin a apakeng, kainyo arai Rael akeyokon a ngamesekin kanguna.

¹⁰Ani eanyungari Yakobo Rael na arai nakookeng a Laban emeat ngamesekin, tolot ngesi kijuka amoru anakituk a akar, kitamat ngamesekin. Arai Laban amae keng a Yakobo.

¹¹Ani erumor tonuak Rael, sodi toowanik kikalou kotere alakara.

¹²Tolimok Yakobo Rael atamar eyanasi ngesi ka apakeng a Rael, nabo arai Rebeka idounit ngesi. Tamatar Rael tolimok apakeng ngakiro nguna.

¹³Ani iirari Laban ngakiro a lochien keng alo anyaritae Yakobo, kikomak tolot akisiriam ngesi. Kilogak ngesi ngakan tonuak, sodi kipeyou nawi keng. Kisisak Yakobo Laban ngakiro daang na asubakinosi.

¹⁴Tolim Laban tama, “Iteni dir irai iyong akoit ka ngaakot kang!” Sodi kiruko kesi elap epei.

¹⁵Tolimok Laban Yakobo tama, “Nyejoikinit kitamari isubi iyong etich kang pas ani iraakar lochien kang. Tolimokinae ayong ibore ni isaki iyong katatach ayong iyong.”

¹⁶Ayakasi Laban tanakookeng ngaarei, anyaritae naapolon Lea, tanyaritetei naachi Rael.

¹⁷Asechech ngakonyen a Lea, nakaneni arai Rael nakebusean ajokon a akwaan.

¹⁸Kona aminar Yakobo Rael, tolim tama, “Asubi ayong etich kon a ngikaru a ngikan-kaarei kotere nakookon naachi enyaritae Rael.”

¹⁹Tatachu Laban tama, “Ejoikinit ayong epotori Rael kainak iyong akidwang ainakin itwaan nigela. Kiboikin eruko ka ayong.”

²⁰Tosub Yakobo etich a ngikaru a ngikan-kaarei kotere Rael, nakaneni tosubut ngikaru ngulu anikeng ngidikidio ani aminar ngesi Rael.

²¹Sodi Yakobo tolimok Laban tama, “Nakinae ayong aberu kang kainyo etemokin ngirwa lu ipotorere.”

²²Apon kidorokinoe akimuj nakaalan anawi a Laban, tochunun ngitunga daang lu kaneni.

²³Ani enangi nakwaare, toriko Laban Lea na arai nakookeng naapolon, torikok Yakobo, sodi topero Yakobo ka Lea na arai aberu keng. (

²⁴Kipoto Laban akasuban etich keng anyaritae Silipa nak Lea toliwor akasuban etich keng.)

²⁵Ani enangi nataparach, toyen Yakobo atamar ikwa erai Lea. Sodi kingit Yakobo Laban tama, “Anukiro nakisubea iyong ayong nugu? Abe asubi bo kolong ayong etich kon sodi ataanyunea Rael. Nyo tokona kimodea iyong ayong kona?”

²⁶Tatachak Laban tama, “Alotal a akwap kosi, nyejok ipotorio apese naachi eringa naapolon.

²⁷Kiruko mono ka Lea a ngirwa a ngikan-kaarei, sodi ainakisi sua iyong Rael dang, erai kicham iyong akisub etich kosi a ngikaru a ngikan-kaarei a ngiche.”

²⁸Tacham Yakobo, ani akiruket ka Lea a ngirwa a ngikan-kaarei kerumor, kipoto Laban nakookeng naachi anyaritae Rael nak Yakobo toliwor aberu keng. (

²⁹Kipoto Laban akasuban etich keng na anyaritae Bilia nak Rael toliwor akasuban etich keng.)

³⁰Sodi topero Yakobo ka Rael na arai aberu keng. Tominak ngesi Rael akidwang Lea, tosub etich a Laban a ngikaru ngikan-kaarei a ngiche.

³¹Ani na engolikinea Ekapolon Akuj atamar eminae Rael akidwang Lea, kitojok ngesi akook a Lea touri ngide, nakaneni kitokolupan Rael.

³²Topoti Lea, kidou ikoku nisapat, tolimok ekiro keng Reuben,[57] ebala, “Aanyunga Ekapolon Akuj aboliaro nakaboliare ayong, iteni dir kaminakini tokona ayong lokile kang.”

³³Topoti Lea nabo kidou ikoku nisapat, tolimok ekiro keng Simeon,[58] ebala, “Kainaki ayong Ekapolon Akuj ikoku iche nisapat kainyo eira ngesi eger lokaremitere ayong.”

³⁴Topoti nabo ngesi kidou ikoku nisapat, tolimok ekiro keng Lawi,[59] ebala, “Kimorikin tokona ayong ka lokile kang kainyo edou ayong ngide keng lusapa nguuni.”

³⁵Topoti Lea nabo, kidou ikoku nisapat, tolimok ekiro keng Yuda,[60] ebala, “Epuruuni tokona ayong Ekapolon Akuj.” Ani erumor tojongo Lea akidounun.