Read turkana Akisiakinet 3 Bible Online

Akisiakinet 3 - turkana bible

Akisiakinet 3

¹Nakaneni aratana emun noi edwangit ngitieng lu alomoding daang lukolong asubuni Ekapolon Akuj na erai Akuj. Kingit ngesi aberu tama, “Be abala mono Akuj nyiinyam ageor a ngikito kadaang alu eyakasi mana a?”

²Tatachak aberu emun tama, “Kipedori sua akinyam ageor a ngikito alu eyakasi mana.

³Nakaneni alimuni Akuj tama, ‘Nyiinyam kori nyiitap ageor a ekitoe alo eyei kiding amana, kainyo ani kikokis esi neni itoakete.’ ”

⁴Tolimok emun aberu tama, “Iteni dir nyitoakete esi.

⁵Erai eyeni Akuj atamar na inyameta esi ageor a ekitoe kangolo, iosunete esi, kikwaanikinos ka Akuj toliworos iyenete naajokak ka naaronok.”[7]

⁶Kingolik aberu atamar ejok ageor a ekitoe kangolo erai anyamat, nabo eminari ngakonyen. Tojoik nabo ngesi ekitoe ngolo ani itoosunio itwaan. Abu ngesi tolem ageor a ekitoe tanyam, nak tani lokile keng tanyam ngolo dang.

⁷Ani eosunete kesi, toyena atamar emam ibore enapito kesi. Todonyo ngakui a ekitoe alo ikwaan ka emeyan sodi tanapa anaaborin.

⁸Ani erumor kiirasi kesi etoil a Ekapolon Akuj ana erai Akuj elosi alomana ebong na ayonia akolong. Toduka ekile ka aberu keng alotooma ngikito a amana, esakete Ekapolon Akuj nyeanyunga kesi.

⁹Nakaneni tanyara Ekapolon Akuj na erai Akuj ekile, kingit tama, “Aliwae iyei iyong?”

¹⁰Tatachu ekile tama, “Abu eira etoil kon alomana, atoem sodi atoduk kainyo amam ibore anapit.”

¹¹kingit Akuj ngesi tama, “Ngae kilimokini iyong atamar emam ibore inapit? Kori robo inyam iyong ageor a ekitoe alo kolong kadungokini ayong iyong atamar nyiinyam?”

¹²Tatachu ekile tama, “Aberu nakolong kiinakini iyong ayong atamar eruko ka ayong, ngesi kainakini ageor a ekitoe kangolo sodi atanyam ayong.”

¹³ Sodi kingit Ekapolon Akuj na erai Akuj aberu tama, “Anukiro na isub iyong nugu?” Tatachu aberu tama, “Kengalae ayong emun, sodi atanyam ageor.”

¹⁴Tolimok Ekapolon Akuj na erai Akuj emun tama, “Kona ikokinea iyong neni, kilam iyong akidwang ngibaren daang, ka ngitieng lua alomoding. Iliwor iyong iliat a akook, nabo inyami iyong apua ngirwa daang lu iyarea.

¹⁵ Keteremokini ayong iyong ka aberu, nabo eremokinosi itaok kon ka ales a aberu. Kipirisaari ngesi iyong akou, sodi tokony iyong ngesi natitinyo.”

¹⁶Tolimok Ekapolon Akuj aberu tama, “Eatakini ayong apipilu kon, toliwor iriaba iyong lokojokon, na isakea iyong akidoun. Tani kikoni neni dang, eliwor ekile kon iitanit iyong, nabo kipolokini ngesi iyong.”

¹⁷Tolimok Ekapolon Akuj Adam tama, “Kona iirarea iyong ngakiro a aberu kon, dio tanyam ageor a ekitoe alo kolong kalimokinit ayong iyong atamar nyiinyam, elam ngalup kotere iyong. Ngirwa daang lu iyarea iyong, isubi iyong etich lokaagongon analup, taanyunea akimuj na inyami.

¹⁸Erupunete edoan ka ngiikwa, nakaneni inyami iyong ngikito lu alomoding.

¹⁹ Erai mati kisub etich lokojokon kichida ngakiinyir, ngesi ianyunea akimuj analup. Tanang kinukakinio iyong nalup nakolong kilemunere. Kisubunio iyong anapua, nabo napua ngesi ibongori.”

²⁰Tolimok Adam[8] aberu keng ekiro be Awa, kainyo arai ngesi itiokeng kadaang alu eyarete.

²¹Tosubak Ekapolon Akuj na erai Akuj Adam ka aberu keng ngileui sodi kitanap.

²²Tolim Ekapolon Akuj na erai Akuj tama, “Tokona, ekwaanikin itwaan ka ngoni ayen naajokak ka naaronok. Edikino tokona ngesi elemuni ageor na ekitoe alo a akiyar tanyam, sodi toyar nakajik.”

²³Kotere ngakiro nguna, kitwarak Akuj ngesi alomana a Eden, toliwor itae ngamanat analup ana kolong alemunere. Kitwarak Ekapolon Akuj na erai Akuj itwaan ngini.

²⁴ Kiwaak ngiborei lua ngabeben*g** kide amana a Eden. Ayei ekileng lo ekoni asarae neni lo areianar lowaitin daang, iyoki erot lo ateni lokitoe a akiyar.