Read turkana Akisiakinet 30 Bible Online

Akisiakinet 30 - turkana bible

Akisiakinet 30

¹Ani ingolikini Rael atamar emam ngide a Yakobo edou ngesi, toting etereku kotere nakaatokeng, sodi tolimok Yakobo tama, “Nakinae ayong ngide ani kemam atoani ayong.”

²Tongoik Yakobo Rael sodi kingit tama, “Elunyokin ayong nados a Akuj ana kimik iyong ngide a?”

³Tatachu Rael tama, “Eyei akasuban etich kang Bilia. Toperioneto ka ngesi toliwor idoununi ngide lu adikino ayong edoununi, sodi ataanyunea ayong dang ngide anikeng.”

⁴Sodi nak Rael Yakobo akasuban etich keng, topero Yakobo ka ngesi.

⁵Topoti Bilia kidou ikoku nisapat a Yakobo.

⁶Tolim Rael tama, “Kasubakinea ayong Akuj na eriyan, eira akigoro kang sodi kainak ayong ikoku nisapat.” Tolimok ikoku ngini ekiro be Dan.[61]

⁷Topoti Bilia nabo na arai akasuban etich a Rael sodi kidou ikoku nisapat a Yakobo nia ngiarei.

⁸Sodi tolim Rael tama, “Kilek ayong ka nakaatokang ekilek lokationon, nakaneni edwang ayong ngesi.” Kotere ngakiro nguna, tolimok ngesi ikoku ngini ekiro keng Naputal.[62]

⁹Ani ingolikini Lea atamar ajong ngesi akidore ngide, kipoto akasuban etich keng anyaritae Silipa sodi nak Yakobo kitarau aberu keng.

¹⁰Kidou Silipa ikoku nisapat a Yakobo.

¹¹Tolim Lea tama, “Ekeny ajokon.” Kotere ngakiro nguna, tolimok ngesi ikoku ngini ekiro keng Gad.[63]

¹²Kidou Silipa na arai akasuban etich a Lea ikoku nisapat nia ngiarei ni arai ika Yakobo.

¹³Tolim Lea tama, “Alakara ayong noi! Etamarete tokona ngaberu alakara ayong.” Kotere ngakiro nguna, tolimok ngesi ikoku ngini ekiro be Acher.[64]

¹⁴Ani ngirwa lu alemere ngakanoi, tolot Reuben mana sodi taanyu ngigilae[65] kaina, inu Lea na arai itiokeng. Tolimok Rael Lea tama, “Nakinae kare ngigilae a lokookon ngidi.”

¹⁵Nakaneni tatachak Lea ngesi tama, “Inyiagaunit nabo iyong ngakiro nangoon nakiriworea ayong ekile a? Isaki tokona dang alemar ngigilae a lokookang a?” Tatachu Rael tama, “Ani kiinak iyong ayong ngigilae a lokookon, iperete iyong ka Yakobo akwaar naga.”

¹⁶Sodi ani ebong esaa lo abongunio Yakobo alomana, tolot Lea akisiriamiar, tolimok tama, “Akwaar naga ibuni iyong nikang kainyo kagielu ayong iyong a ngigilae a lokookang.” Sodi topero Yakobo ka Lea akwaar ngina.

¹⁷Kiira Akuj ngakiro a Lea, topoti ngesi sodi kidoik Yakobo ikoku nisapat nia ngikan.

¹⁸Tolim Lea tama, “Kainaki Akuj ayong ebachit kang, ani epotorea ayong akasuban etich kang ainak lokile kang.” Kotere ngakiro nguna, tolimok ngesi ikoku ngini ekiro be Isakar.[66]

¹⁹Topoti Lea nabo sodi kidoik Yakobo ikoku nia ngikan-kapei.

²⁰Tolim tama, “Kainaki ayong Akuj ainakinet naajokon. Eliwor tokona ekile kang lo karima ayong ani edounio ayong ngide keng ngikan-kapei lusapa.” Kotere ngakiro nguna, tolimok ngesi ikoku ngini ekiro be Sebulun.[67]

²¹Ani ekisidi kidou ikoku nipese, tolimok ekiro keng Dina.

²²Sodi kitamu Akuj Rael, kiira ngakiro keng, kitojok akook keng touri ngide.

²³Topoti Rael kidou ikoku nisapat, ebala, “Alema Akuj ngileech kang.”

²⁴Kotere ngakiro nguna, tolimok ngesi ikoku ngini ekiro be Yosep,[68] ebala, “Kimiek Ekapolon Akuj kainak ayong ikoku nisapat iche.”

²⁵Ani kidou Rael Yosep kerumor, tolimok Yakobo Laban tama, “Kimiekinae ayong atobong nakwap kang na eyei awi kosi.

²⁶Kimiekinae atoloto ka ngaberu kang, ta ngide kang aapei, lu eraakasi kesi asubea ayong etich loger lo iyenea iyong dang.”

²⁷Nakaneni tolimok Laban ngesi tama, “Kimiekinae ayong dang atolim ngakiro na asaki alimun. Adwari ayong nabo ayen atamar erai iyong ngesi kapiaritor ayong Ekapolon Akuj.

²⁸Tolim ibore ni isaki iyong katatachak ayong iyong, sodi katatachak.”

²⁹Tolimok Yakobo ngesi tama, “Iyeni iyong elope eger lo asubea ayong etich kon, ka eger lo erichakinitor ayong ngibaren kon.

³⁰Kolong eringa ayong nyebuno, akidioko ngibaren kon. Nakaneni napei kolong abunio ayong, alalaketa ngibaren kon noi. Kipia iyong Ekapolon Akuj awadaang ani alosi ayong.[69] Nakaneni tokona, achoikini ayong ngitunga a awi kang ori?”

³¹Kingit Laban ngesi tama, “Nyoni isaki iyong kainak ayong iyong?” Tatachak Yakobo tama, “Emam ibore ejoikinit iyong kiinakini ayong, pearai asaki ayong arubakin eyoki ngibaren kon erai kisubakinea iyong ayong akiroit napei naga.

³²Kimiekinae ayong etor kiding ngibaren kon daang akolongit naga, atotiaku anamesekin amesek daang nameri ka nakori. Nguna kesi eliworosi ibore nikitachit iyong ayong.

³³Sodi ani ngirwa lu isidiunosi, kileereu dir ateneanut kang namoi ibunio iyong aanyun ibore nikitachakini iyong ayong. Ibarasit daang ni nyemeriana, kori nyekoriana, kori nyiriono, ani keyei lobaren kang, eliwor ni ekokounitae.”

³⁴Tolim Laban tama, “Itemokino. Kimiek kikokis loger lo ilimunio iyong.”

³⁵Akolongit napei ngina, tolot Laban kipaka ngikora daang lukoliyek ka lukoriyek, ka ngaanei namee daang nameriyek ka nakoriyek, (ka ibarasit daang ni ayei ni akwaan nakwaan) ta amesek daang nakirion. Sodi kisiyok talokookeng.

³⁶Towot Laban ani ayei Yakobo, tolom ni eperio ngauni lorot na enyounere. Kidong Yakobo iyoki ngibaren a Laban lu edongete.

³⁷Sodi tolem Yakobo ngakito nakaapalak a ngikito alu enyaritae elubina, ka ekitoe lo ikwaan ka engoomo ta eramon. Tobolochia sodi tatakanuunea niakwaan eyei tooma nakito nguna.

³⁸Kiwaak ngesi ngakito nguna ngaren ngategerin na amaasa ngibaren. Kiwaak ngesi kesi kainyo asupitosi ngibaren esaa lo amaseta ngakipi.

³⁹Takapeeneta kesi alongaren ngakito nguna. Kotere ngakiro nguna toureta kesi ngimesekin ka ngikaalei lukoliyek, ka lumeriyek, ta lukoriyek.

⁴⁰Totiak Yakobo ngamesekin ka ngaanei ani erumor kisingolia lowae lo ayakasi ngibaren a Laban lukoliyek ka lukirionok. Kotere erot ngolo, kirau Yakobo ngibaren keng sodi totiak ka lua Laban.

⁴¹Toliwor nacha enangea ngirwa lu esupieto ngibaren luatumak kiliok tosupo luberu, kiwaak Yakobo ngakito nakaapalak nguna ngaren ngategerin na amaasa kesi, sodi takapeta ani ayakasi ngakito nguna.

⁴²Nakaneni peekoanakini ngesi neni ngirwa lu esupotor ngibaren lua erogo. Ngirwa lupei ngulu toliworos ngibaren lua Laban lu erogo, toliworos lu atumito ngika Yakobo.

⁴³Sodi tabar Yakobo lokojokon noi, pena ngisipaan lukaalak a ngibaren, ka ngikasubak etich luberu ka lukiliok, ka ngikaala, ta ngisikiria.