Read turkana Akisiakinet 31 Bible Online

Akisiakinet 31 - turkana bible

Akisiakinet 31

¹Kiira Yakobo talokookeng a Laban ebalasi, “Alema Yakobo ngibaren daang lukolong araakasi ngika apayok. Eraakasi ngibaren a apayok ngesi abarea ngesi.”

²Kingolik ngesi tani atamar nyemina Laban ngesi loger lokolong aminar.

³Sodi tolimok Ekapolon Akuj Yakobo tama, “Tobongo nakwap a taapakon na erai aka ngiyenet kon, nakaneni kiruki ayong ka iyong.”

⁴Kotere ngakiro nguna tomea Yakobo ngitunga ni ayakasi Rael ka Lea tolimok atamar pot naro na eyokio ngesi ngibaren.

⁵Tolimok kesi tama, “Engolik ayong atamar, nyeringa apakus kamina ayong loger lokolong sek kaminar. Nakaneni kiruki ayong ka Akuj a apakang.

⁶Iyenete esi atamar asub ayong etich a apakus a ngikilinga kang kadaang.

⁷Tani kikoni neni, kengal ayong apakus kiloch ibore nikatachakini ayong ngakilochiet ngatomon, nakaneni nyechamakina Akuj kawani ngesi ayong.

⁸Arai na elimunio ngesi tama, ‘Eliworosi ngibaren lukoriyek katachakinit ayong iyong,’ sodi toureta ngibaren daang ngimesekin ka ngikaalei lukoriyek. Ani na alimunio ngesi tama, ‘Ngibaren lukoliyek kesi katachakinit ayong iyong,’ sodi toureta ngibaren daang ngimesekin ka ngikaalei lukoliyek.

⁹Eger ngolo ngesi alemunea Akuj ngibaren ani ka apakus kainak ayong.

¹⁰“Ngirwa lu akapeta ngibaren, eruja ayong. Anakirujare kangina, engolik ayong ngikora daang lu asupito ngaanei eraakasi lukoliyek, ka lukoriyek, ta lumeriyek.

¹¹Kesuruor ayong emalaikat a Akuj anakirujare kangina katanyar tama, ‘Yakobo,’ sodi ekii ayong atama, ‘Ayong lo.’

¹²Katolimok ngesi ayong tama, ‘Kingolia, nakaneni ingolikini iyong atamar eraakasi ngikora daang lu esupito ngaanei lukoliyek, ka lukoriyek, ta lumeriyek. Ikote nguna daang neni kainyo aanyunga ayong daang nakisubea iyong Laban.

¹³ Ayong ngesi Akuj nakolong atakanuuni anikon na iyakar iyong Besel, na itowea iyong amoru erai akisitamunet, sodi kitiliwo naitaleuno ani idokakinea akimiet[70] kidiama, ani erumor kikong anikang. Tonyou tokona tobongo nakwap nakolong kidounere iyong.’ ”

¹⁴Tatachakis Rael ka Lea Yakobo tamasi, “Eyei ibore iche ni idongit nawi a apakosi ni ejoikinit sua kirumi a?

¹⁵Kitisibit ngesi sua ngipeyok. Kigiela ngesi sua nakaneni erika ngesi ngibaren daang lukolong kigielere sua.

¹⁶Eraakasi ngibaren daang lu alema Akuj ani ka apakosi ngikosi ka ngide kosi. Kotere ngakiro nguna, tosubak daang nakilimok iyong Akuj.”

¹⁷Sodi tonyou Yakobo, kidokok ngide keng ka ngaberu keng lokaala,

¹⁸ani erumor toruja ngibaren keng daang, nabo tolema ngiboro daang lu aanyuni ngesi anakwap a Mesopotamia. Tolot ngesi tobongo nakwap a Kanaan ni ayei apakeng lo anyaritae Isaka.

¹⁹Alosit Laban akitub ngamesekin keng ngajul. Sodi taanyu Rael alolom na ekokoea ngakujo nasubuna na arai ngaka apakeng.

²⁰Kingala Yakobo Laban lo arai Emaramit ani pealimokinea atamar anyounit ngesi alosit.

²¹Tolema Yakobo ibore keng daang, torotok atipei. Todoka ngesi anangolol enyaritae Eupurate, sodi kidira nakwap a ngimukur enyaritae Gilead.

²²Adaunet a ngirwa a nguuni, tolimokinae Laban atamar alot Yakobo.

²³Kirukosi Laban ka ngikaitotoi keng, sodi kiwapakis Yakobo a ngirwa a ngikan-kaarei. Todoloi Yakobo alomukur a akwap enyaritae Gilead.

²⁴Nakaneni bu Akuj nia Laban alo arai Emaramit nakwaare irujae, tolimok tama, “Tochoite nyiilimok Yakobo akiroit adio, kerai naajokon kori naaronon.”

²⁵Tanang Laban ni ayei Yakobo. Alomit adakar a Yakobo moru. Toloma Laban dang ka ngikaitotoi keng lomukur lu enyaritae Gilead.

²⁶Kingit Laban Yakobo tama, “Anukiro nugu isub iyong? Nyo kingalaa iyong ayong torik tanakookang ikwa ngirikon lu erikunitoe alojie?

²⁷Nyoni kingalaa iyong ayong torotok ekiilingat? Arai kitelimok iyong ayong, kitiakak ngoni elakara ngitunga imariteteete, ka aeo, ideese ngatamburin ka ngagitae.

²⁸Nyoni pekimiekinea iyong ayong atonuak ngide a tanakookang atalimok atamar toloto niajokon. Abangaanut ngakiro na isubak iyong nguna!

²⁹Apedori ayong akiwan iyong, nakaneni kesuruori been ayong Akuj a apakon nakwaare kechikichik tama, Tochoite iwani Yakobo tani wadiochichi.

³⁰Ayeni ayong atamar irotokini iyong ani kimuitor abongor nawi a apakon. Nakaneni a, nyo ikokoyarea iyong ngakujo kang nasubuna?”

³¹Tatachak Yakobo Laban tama, “Aemit ayong kainyo esibit edikino iyong kidemari ayong tanakookon.

³²Nakaneni ani kianyu cha iyong itwaan idio ni etingit ngakujo kon nasubuna kane, eario itwaan ngini. Kidodiu tokona ibore ni erai ikon atingit ayong, tolema iteete ngitunga luyenet yok lugu.” Peayeni Yakobo atamar akokoit Rael ngakujo nasubuna a Laban.

³³Sodi tasak Laban ngakujo keng nasubuna loeam a Yakobo, tasak tani loeam a Lea ka eam a ngakasubak etich anaarei, nakaneni nyeanyuna. Topudo ngesi aloeam a Lea toloma loeam a Rael.

³⁴Alemari sek Rael ngakujo nasubuna nguna kidaa alokwap echue lo apetakinitae kidiama ekaal, sodi kiboikin kicholong. Tasak Laban ngakujo nasubuna nguna loeam keng, nakaneni nyeanyuna.

³⁵Tolimok Rael apakeng tama “Nyiingo kare ekapolon kang, nyanyouni ayong itee iyong kainyo ayei ayong lolap eboi.” Sodi tasak Laban ngakujo keng nasubuna wadaang, nakaneni nyeanyuna.

³⁶Sodi tongo Yakobo kitongolop Laban ebala, “Nyoni asechit ayong? Alital asechit ayong kirisitor iyong ayong niaronon kona?

³⁷Ikur tokona iyong ngiboro kang daang, nyoni iborosit ni ianyu iyong ni erai ikon? Kiwaak nege taanyungasi ngiyenet kon ka ngiyenet kang, sodi kitotiak kesi ngoni!

³⁸Ngikaru lutomwon-arei kirukitor ayong ka iyong lugu daang, emam ngamesekin kori ngaanei kon na apot kiyecha, nabo emam emesek anyam ayong alosipanit kon.

³⁹Tani ibarasit ni enyamete ngibuin, nyeyauna ayong nikon asaki atamar nyikipaik iyong ayong, arai amicha a ibarasit kangini akang. Kilimokinit iyong ayong atamar atatacheene ibarasit ni ekokoyario naparan kori nakwaare.

⁴⁰Ekoni eboyor kang neni, kanomit akolong naparan, ani nakwaare katanyam akatorot, tongop kona ajotoor.

⁴¹Ebooyi ayong ngikaru lutomwon-arei lugu daang anawi kon. Asubi ayong etich kon a ngikaru a ngitomon ka nguomwon kotere tanakookon naarei, eyok ngibaren kon a ngikaru a ngikan-kapei. Ani tani ikoni neni, kiloch iyong ibore nikitachakini ayong ngakilochiet ngatomon.

⁴²Arai nyeyei Akuj a apaakang Aburaam, na elipit tani apakang Isaka, kimiekinit iyong ayong alosi a ngakan anikirion. Nakaneni engolik Akuj ngichan kang ka etich lo asub ayong, ngesi been kichikichikea iyong nakwaare.”

⁴³Sodi tatachak Laban Yakobo tama, “Eraakasi ngade nugu tanakookang, eraakasi ngide kech ngide kang, eraakasi ngibaren lugu ngibaren kang, nabo erai ibore ni itee iyong ikang. Ani kona emamakar ibore asubakinea ayong tanakookang ka ngide kech,

⁴⁴asaki tokona ayong atachamakin ka iyong atosenokisi ngamoru toliwor ibore ngini kisitamuni ngoni achamakin yok.”

⁴⁵Sodi tolem Yakobo amoru kitowo.

⁴⁶Tolimok Yakobo ngiyenet keng atamar tochunakis ngamoru. Tochunakis kesi ngamoru sodi tosenokis. Ani erumor kimuja alo diyete ngamoru na asenokino nguna.

⁴⁷Tolimok Laban ngamoru na asenokino nguna ekiro be Yegar-saadusa, nakaneni tolimok Yakobo ngamoru na asenokino nguna ekiro be Galeed.[71]

⁴⁸Tolim Laban tama, “Eraakasi ngamoru na esenokino nugu idodiunito achamakin kang ka iyong akolongit naga.” Ngakiro nguna kesi alimokinere neni ekiro be Galeed.

⁴⁹Tolimok Laban amoru na etowei kaneni ekiro be Misipa[72] ebala, “Kiyok Ekapolon Akuj iyong ka ayong nakitiakar.

⁵⁰Ani kiboliar iyong tanakookang, kori kuut ngaberu ngache kimorik ka tanakookang, tani pekayeni ayong, toyen atamar eyeni Akuj achamakin nakichamakin ayong ka iyong.”

⁵¹Tolimok nabo Laban Yakobo tama, “Kingolik ngamoru na esenokino nugu ka amoru na etowo ayong alokiding kang ka iyong.

⁵²Eraakasi ngamoru na esenokino nugu ka amoru naga kesi idodiunete atamar nyekalami ayong ngamoru na esenokino nugu, abu ni iyei iyong asaki akiwan iyong, kori nyikalami iyong ngamoru na esenokino nugu bu ni ayei ayong isaki akiwan ayong.

⁵³Kimiekisi Akuj a Aburaam ka Naor, na erai Akuj a apakech, toliwor akatiakan yok.” Sodi kikong Yakobo elimit ekiro a Akuj ana erai ngesi ilipit apakeng Isaka.

⁵⁴Ani erumor taar Yakobo ibarasit ni arai akipeyos alomoru, tanyarau ngiyenet keng kimuja. Ani kimuja kerumor, kibooyoto alomoru akwaar kiiya kiwala.

⁵⁵Ani nataparach elilim, tonyou Laban tonuak ngide a tanakookeng, ka tanakookeng, sodi topia. Ani erumor tonyou tobongo nawi.