Read turkana Akisiakinet 32 Bible Online

Akisiakinet 32 - turkana bible

Akisiakinet 32

¹Abu Yakobo analosit keng, kiriamunos ka ngimalaikae a Akuj lorot.

²Ani eannyungari ngesi kesi, tolim tama, “Erai ibore en ajore a Akuj!” Sodi tolimok ngesi neni ekiro be Maanaim.[73]

³Tomea Yakobo ngitunga ni ayei lokaatokeng Esau lo alomit nakwap na enyaritae Edom.

⁴Kichikichik ngesi kesi ebala, “Tolimokisi ekapolon kang Esau kona: Ebala ekasuban etich kon Yakobo kona, ‘Eboi ayong apeyonit anawi a Laban tanang tokona.

⁵Ameat ayong ngaatuk, ka ngisikiria, ka ngisipaan a ngamesekin, ta ngikasubak etich lukiliok ka luberu. Ameunit tokona ayong ngitunga nikon ekapolon, etamit atamar kipeyouni iyong ayong.’ ”

⁶Ani ebongunete ngitunga ngulu ni ayei Yakobo, tamasi, “Kinang sua ni eyei lokaatokon Esau, nakaneni ebunit ngesi alorot akisiriam iyong, erukito ka ngitunga ngamiae ngoomwon.”

⁷Tobul Yakobo noi kialolong. Totiak ngesi ngitunga lu arukitotor ngatiaket ngaarei. Totiak tani ngamesekin, ka ngibaren luche, ta ngikaala,

⁸itami ebala, “Ani kiriama Esau ka atiaket apei tomunya, ebuchar atiaket nache.”

⁹Kilip Yakobo Akuj ebala, “Ee, Akuj a apaakang Aburaam, ka apakang Isaka. Ekapolon Akuj nakolong kilimokini ayong atamar atobong nakwap kang ni eyakasi ngiyenet kang, nabo kichikak atamar kisubea ayong naajokak.

¹⁰Ketimit ayong tani eger lo kidodikinea iyong ayong lo arai ekasuban etich kon atamar irai iyong loajokon lo kimunoi. Adoki kolong ayong angolol a Yorudan erai aburo bon atingit, nakaneni eraakasi tokona ngajorei kang ngaarei.

¹¹Kelipit tokona atamar kitoyuu ani eyei lokaatokang Esau. Kabulit ayong esibit abuni ngesi kitaar sua daang aapei ka ngaberu ta ngide.

¹² Nakaneni kichikakini kolong iyong ayong atamar kisubea naajokak, sodi kitalala ngalesea kang loger a alalau a asinyen ana eyei lokwaas a anam, ana emam kona imarunio ani elalaa.”

¹³Sodi toper Yakobo neni nakwaare a akolongit kangina. Ani erumor kipaku epewae a ngibaren keng tomek lokaatokeng Esau.

¹⁴Kipaku ngaanei naberu ngamiae ngaarei ka ngikora ngitomwon-arei, ka ngamesekin ngamiae ngaarei ka ngimesekin ngitomwon-arei,

¹⁵ka ngakaala ngatomwon-uni namanang erukito ka ngita ngikaala kech, ka ngaatuk naberu ngatomwon-omwon ka ngimongin ngitomon, ta ngasikiria ngatomwon-arei, ka ngisikiria lukiliok ngitomon.

¹⁶Nak ngikasubak etich keng ngibaren ngulu, toliwor erujit epei esipanit epei. Tolimok kesi tama, “Kapesi kingarenikisi, totiaka esipanit lo ingareni ka esipanit loche.”

¹⁷Kichikichik lo ingareni tama, “Ani kiriamunosi iyong ka lokaatokang Esau sodi kingit iyong tama, ‘Irai iyong ekasuban etich a ngae? Aliwae ilosi iyong? Ngika ngae ngibaren lugu?’

¹⁸Itachakini iyong ngesi tama, ‘Eraakasi ngibaren lugu ngika ekasuban etich kon Yakobo, lu kimiekinit ngesi iyong ekapolon keng Esau. Isidiuno Yakobo elope anaabor.’ ”

¹⁹Kichikak ngesi ngikasubak etich lu arujito ngisipaan lua ngiarei ka lua nguuni, ta luche daang ebala, “Tolimokisi Esau ngakiro napei nguna na iriamunotor ka esi,

²⁰ani eyakasi nguna daang, tolimokisi ibalasi, ‘Isidiuno Yakobo elope anaabor.’ ” Asubi ngesi kongina itami ebala, “Kimiekinae mono esisil a ngibaren alu amekinit ayong ngesi alu engarenikis, ani ekisidi, eriamunos ayong ka ngesi. Esibit cha ani kekok neni, ketopeyoni ngesi ayong.”

²¹Sodi kisingarenik ngesi ngibaren keng, nakaneni toper ngesi nadakar ngina.

²²Nakwaare a akolongit anapei kangina, tokienyu Yakobo. Kirukosi ngesi ka ngaberu keng naarei, ka ngakasubak etich keng naarei, ta ngide keng lutomon ka epei, sodi todokasi anangolol enyaritae Yabok.

²³Kidoka Yakobo kesi ekwakaye angolol, ka ngibaren keng daang.

²⁴Sodi kidong Yakobo neni bon alopei. Bu itwaan kileka ka ngesi napei nakwaare tanang echili nanyang.

²⁵Ani ingolikini itwaan ngini atamar kakuruwo akidwang Yakobo, tatap akidotunet a ekalokot a Yakobo, toriangakin akidotunet a ekalokot keng ilekasi.

²⁶ Ani erumor tolimok itwaan ngini Yakobo tama, “Kimiekinae ayong atolot kainyo ewala.” Nakaneni tolimok Yakobo ngesi tama, “Nyekemiekini ayong iyong ilosi mati kipia iyong ayong.”

²⁷Kingit itwaan ngini ngesi tama, “Ngae ekiro kon?” Tatachak ngesi tama, “Kanyaritae ayong Yakobo.”

²⁸ Tolimok itwaan ngini ngesi tama, “Nyikinyarao iyong nabo Yakobo jik, eliwor ekiro kon Isirael,[74] kainyo ilekasi iyong ka Akuj ta ngitunga kidwang.”

²⁹ Sodi tolimok Yakobo ngesi tama, “Tolimokinae kare ekiro kon.” Nakaneni tolimok itwaan ngini ngesi tama, “Nyoni kingisitor iyong ayong ekiro kang?” Sodi topia itwaan ngini Yakobo kaneni.

³⁰Sodi tolimok Yakobo neni ekiro be Peniel,[75] ebala, “Aanyunga ayong Akuj nakaneni ayar ayong.”

³¹Epiripirunit akolong na arotokinio Yakobo alo Penuel, echodonokini ngesi elosi kotere ekalokot keng.

³²Ngakiro nguna kesi nyenyameta Ngisirael amoriit na a ekalokot, kainyo erai amoriit ngina kolong atapi itwaan ngini ani a Yakobo.