Read turkana Akisiakinet 35 Bible Online

Akisiakinet 35 - turkana bible

Akisiakinet 35

¹ Tolimok Akuj Yakobo tama, “Tonyou tolot Besel sodi tolom inaa. Ani inangi inaa, todukokinae ayong ekeno a ngakipeyos, ayong Akuj kon nakolong atakanuuni anikon na ipungaror iyong ani eyei lokaatokon Esau.”

²Tolimok Yakobo ngitunga a awi keng ka ngitunga daang lu arukitotor tama, “Tachakasi ngakisikwaanet a ngakujo ana nyeraakasi ngakus itingito esi. Kitosegas sodi kilocho ngiworui kus.

³Ani erumor atoloto Besel ni adukokini ayong ekeno a ngakipeyos nakolong kengarakini ayong na aanyunitor ngichan, nabo kirukit ka ayong awadaang ani cha alosi ayong.”

⁴Sodi nakis kesi Yakobo ngakisikwaanet a ngakujo daang na atingito kesi, ka ngamaritoi na anapito anaki kech. Sodi kidaa Yakobo ngakujo nguna alokwap echoke lo ayei diyete Chekem.

⁵Ani enyounete kesi alosit, kitubul Akuj ngitunga a ngirerea kadaang alu ayakasi neni, nyiwapakina kesi awosit a Yakobo.

⁶Tanang Yakobo Lus, ni erai ngesi enyaritae Besel, ni eyei nakwap a Kanaan. Tanangut ngesi ka ngitunga daang lu arukitotor neni.

⁷Todukok ngesi ekeno a ngakipeyos neni, tolimok ekiro be El Besel[78] kainyo neni kolong atakanuunea Akuj ani a Yakobo nakolong epungaror ani eyei lokaatokeng.

⁸Totoan Debora na arai ngesi kolong etanuni Rebeka, sodi tonukakinae tooma lochoke lo lo ayei kuju a Besel. Kotere ngakiro nguna tolimok ngesi ekitoe ngolo ekiro be Alon-Bakusi.[79]

⁹Abongunet a Yakobo alo Mesopotamia, tatakanu Akuj anikeng nabo topia.

¹⁰Tolimok Akuj tama, “Ekiro kon ngesi Yakobo, nakaneni nyikinyarao nabo iyong Yakobo, pearai eliwor tokona ekiro kon Isirael.” Sodi tolimokinae ekiro a Yakobo Isirael.

¹¹Tolimok nabo Akuj ngesi tama, “Ayong ngesi arai Akuj Naationon. Taanyu ngide lukaalak. Epote ngibukui lukaalak anikon, nabo epote tani ngikapolok anikon.

¹²Kainakini ayong iyong ka ngalesea kon nakitupuunete iyong akwap nakolong ainakini ayong Aburaam ka Isaka.”

¹³Torotok Akuj ani eruorotor ka ngesi toten kidiama.

¹⁴Kitowo Yakobo amoru ani eruorotor ngesi ka Akuj toliwor akisitamunet, ani erumor kitiliwo na italeuno ani abukokinea emuna lo epuritoe ka akimiet.

¹⁵ Tolimok Yakobo ni eruorotor ngesi ka Akuj ekiro be Besel.

¹⁶Torotokis Yakobo ka ngitunga a awi keng daang alo Besel. Ani eapuunete diyete Epirasa, kisiak Rael ariaba. Toriabakin ngesi lokojokon noi.

¹⁷Ani na ariabar ngesi lokojokon noi kongina, tolim aberu na asaki akisidoun ngesi tama, “Wara nyiem, ianyu iyong ikoku iche nisapat.”

¹⁸Nakaneni aapikinit Rael akitu. Ani eringa nyetoana, tolimok idia ngini ekiro be Benoni. Nakaneni tolimok Yakobo idia ngini ekiro keng Benjamen.[80]

¹⁹Ani etoani Rael, tonukakinae lokwaas a erot alo etenere Epirasa, ni tokona enyaritae Betleem.

²⁰Kitowo Yakobo amoru na arai akisitamunet analiel a Rael, eringa amoru ngina eyei neni tani tokona.

²¹Towot Yakobo tolot, kitor nasenon enyaritae Eder, sodi tolom lowae loche kayaaye.

²² Ani eringa Yakobo elomit nakwap ngina, topero lokookeng lo anyaritae Reuben ka aberu a apakeng na arai apese a ngabwes anyaritae Bilia. Kiira Yakobo ngakiro nguna, sodi tongo. Araakasi talokookeng a Yakobo ngitomon ka ngiarei.

²³Talokookeng a Lea kesi Reuben, lo arai lokookeng a Yakobo loapolon, ka Simeon, ka Lawi, ka Yuda, ka Isakar, ta Sebulun.

²⁴Talokookeng a Rael kesi Yosep ka Benjamen.

²⁵Ngide lusapa edouni Bilia na arai akasuban etich a Rael kesi Dan ka Naputal.

²⁶Ngide lusapa edouni Silipa na arai akasuban etich a Lea, kesi Gad ka Acher. Eraakasi ngulu talokookeng a Yakobo lu auriuni ngesi na ayakar Mesopotamia.

²⁷Tolot Yakobo ni ayei apakeng alo Mamure, diyete ere a Ariba, ngesi atamar Eburon. Neni ngesi nikolong alomito Aburaam ka Isaka eraakasi ngipeyok.

²⁸Eraakasi ngikaru lu ayarea Isaka amiat apei ka ngitomwon-kauni.

²⁹ Totoan Isaka akaalimon, emojongit noi, tonuka ngesi talokookeng Esau ka Yakobo.