Read turkana Akisiakinet 37 Bible Online

Akisiakinet 37 - turkana bible

Akisiakinet 37

¹Tolom Yakobo nakwap a Kanaan nakolong alomit apakeng erai epeyonon.

²Eraakasi ngakiro na isisaunitae nugu na a ngalesea a Yakobo. Ani eliwor Yosep edia loa ngikaru a ngitomon ka ngikan-kaarei, kiyoko ka talokaatokeng ngamesekin ka ngaanei. Araakasi talokaatokeng ngulu talokookeng a Bilia ka Silipa, ana araakasi ngaberu a Yakobo alo arai apakeng. Bu Yosep kisisak apakeng ngakiro naaronok asubete talokaatokeng.

³Amina Yakobo Yosep noi akidwang ngide luche daang kainyo edounio Yosep ngirwa lu amojongitor ngesi. Kotere ngakiro nguna, todonyok ngesi Yosep eworu lokooyen towoyak ngakan.[81]

⁴Ani ingolikinete talokaatokeng atamar emina apakech Yosep akidwang kesi, toremokinos kesi Yosep tojongoto akisuruor a ekisil.

⁵Akwaar apei kiruja Yosep. Ani isisakini ngesi talokaatokeng ngakiro nguna, toremokinos kesi ngesi noi.

⁶Tolimok kesi tama, “Topupokisi ngakiro na erujae ayong.

⁷Erujae ayong kiya ngoni daang mana kieni ngasiina a ngakanoi. Ani nipei bore ngini, tonyou asiinait nakang towo. Tochunakinos ngasiina nakus kiriama nakang, sodi toriedikokis.”

⁸Kingita talokaatokeng ngesi tamasi, “Ikwa tokona ibore en, iliwor iyong ekapolon kitopolok sua?” Sodi toremokinos kesi ngesi noi kotere akirujare keng ka ngakiro na eruoro ngesi.

⁹Kiruja nabo Yosep sodi kisisak talokaatokeng ebala, “Topupokisi, eruja nabo ayong sodi engolik akolong ka elap, ta ngikanyer ngitomon ka apei kariedikokinito ayong.”

¹⁰Nakaneni ani isisakini ngesi apakeng ka talokaatokeng ngakiro nguna, kikilak apakeng ngesi ebala, “Nyo eger a akirujare irujae iyong kana? Esibit iyong dir epedori itiokon, ka talokaatokon, ta ayong aponere atoriedikokisi iyong a?”

¹¹ Toting talokaatokeng a Yosep etereku kotere Yosep, nakaneni toliwor apakeng itamanari ngakiro nguna.

¹²Akolongit apei aloose talokaatokeng a Yosep akiyok ngibaren a apakech alo diyete Chekem.

¹³Tolimok Yakobo Yosep tama, “Iyeni iyong atamar iyokiyete talokaatokon ngibaren kaama alo Chekem. Nakaneni asaki ayong amear iyong ni eyakasi kesi.” Tatachak Yosep tama, “Anyou ayong.”

¹⁴Tolimok apakeng tama, “Kape taanyu talokaatokon ka ngibaren keyakasi niajokon sodi tobongu kitolimok ngakiro kech.” Sodi tomea Yakobo Yosep anadipo a Eburon. Torotok Yosep tanang Chekem.

¹⁵Toriam itwaan iche ngesi irimit ngachara kingit tama, “Nyoni isaki iyong?”

¹⁶Tatachak ngesi tama, “Asaki ayong talokaatokang. Tolimokinae kare ni iyokiyete kesi ngibaren.”

¹⁷Tolimok itwaan ngini ngesi tama, “Ayeni ayong atamar kewoto kesi, kainyo eirari ayong kesi ebalasi kilosi Dosan.” Sodi kiwap Yosep talokaatokeng torukau alo Dosan.

¹⁸Ani eanyungarete talokaatokeng ngesi ebunit anikalonan, totuko kesi akiar ngesi.

¹⁹Tolimokin make tamasi, “Abu ekerujan.

²⁰Kimiekisi ataara sodi atachakakisi nadui adio. Ani erumor atamasi anyam ngesi etiengit a moding. Sodi ataanyungasi chene atamar ikokinete ngakiro a akirujare keng ai!”

²¹Ani iirari Reuben ngakiro nguna, tasak ayuun Yosep nyear. Tolimok kesi tama, “Nyiiar kare.

²²Nyikibuko ngaakot. Echamit kichakakini ngesi nadui naga kane anariet, nakaneni nyikiwan.” Esuruori ngesi kesi kongina kainyo asaki ayuun Yosep nyear, sodi ani ekisidi tobua ni ayei apakeng.

²³Ani enangi Yosep ni ayakasi talokaatokeng, talachasi kesi eworu keng lokooyen, lo awoyak ngakan.[82]

²⁴Ani erumor kirumut ngesi tachakakis nadui. Nakaneni amam ngakipi ayakasi nadui ngina.

²⁵Ani iboikinosi kesi akimuj, taanyungasi alotoru a Ngichimael eponito alo Gilead eloose Misiri. Ewokito ngikaala kech ngikito lu itukukunyete akimuj ka ngikito lukaakunyok lu iwasae.

²⁶Sodi tolimok Yuda talokaatokeng tama, “Nyoni ibore ajokon kianyuni ngoni erai kiar lokaatoyok sodi emunono ngakiro a akitu keng?

²⁷Kimiekisi atogielakisi Ngichimael lugu, nakaneni nyikiwan ngoni ngesi kainyo erai lokaatoyok, erai akiring a akwaan keng apei ka nayok.” Tachamut talokaatokeng ngakiro na alimuni ngesi.

²⁸Ani enangunete ngimuchurus a akwap a Midian neni, kiriut talokaatokeng a Yosep ngesi anadui togielakis Ngichimael a ngaropiyae a ngatomwon-arei. Torikosi Ngichimael Yosep Misiri.

²⁹Ani ebongori Reuben nadui torukau Yosep emam anadui, tochilichili ngiworui keng, kialolong.

³⁰Tolot ni ayakasi talokaatokeng tolimok tama, “Emam edia anadui! Aliwae tokona alosi ayong?”

³¹Sodi taara kesi akine, tolemut eworu lokooyen a Yosep kilumokis naakot a akine kangina.

³²Ani erumor yaasi kesi eworu lokooyen ngolo, lo aoyak ngakan, yaasi nika apakech, tolimokis tamasi, “Kirapuni sua eworu logo. Toyen chene kerai loa lokookon kori meere.”

³³Toyen apakech eworu ngolo tama, “Erai eka lokookang! Kear ngesi etiengit a moding kenyam. Iteni dir, kenyilinyilaar Yosep.”

³⁴Sodi tochilichili Yakobo ngiworui keng ani ealolongio, tanap egunia anaabor. Kigor ngesi kotere lokookeng a ngirwa alukaalak.

³⁵Pot talokookeng ka tanakookeng nikeng esakete akisililing ngesi, nakaneni tonger ngesi akisililingo ebala, “Kimiekinae, alosi ayong ni eyei lokookang alokatoak egoro.” Sodi torubak ngesi igoro kotere lokookeng Yosep.

³⁶Ngirwa lupei ngulu, togielasi Ngimidian Yosep alo Misiri togielakis itwaan ipei anyaritae Potipa. Arai Potipa epei a ngikapolok alu apolokinit Parao, arai ngesi ekarikon a ngasigerea ana eyokiyete akwap.