Read turkana Akisiakinet 38 Bible Online

Akisiakinet 38 - turkana bible

Akisiakinet 38

¹Ngirwa lupei ngulu, torotok Yuda ani ayakasi talokaatokeng sodi tolot kibooyoto ka itwaan anyaritae Ira. Anyaritae ere a itwaan kangini Adulam.

²Na ayakar Yuda inaa, kiriamun ka apese a akwap a Kanaan na arai nakookeng a itwaan anyaritae Chua. Kuut ngesi apese ngina,

³sodi kidou ikoku nisapat tolimok Yuda ekiro be Eri.

⁴Topoti nabo ngesi kidou ikoku nisapat sodi tolimok ekiro be Onan.

⁵Ani erumor topoti nabo sodi kidou ikoku nisapat, tolimok ekiro be Chela. Ayei Yuda Kesibu na edounere Chela.

⁶Kisuuta Yuda lokookeng lo ekingaren anyaritae Eri, kisuuta aberu na anyaritae Tamar.

⁷Nakaneni ani kona aronia Eri lo arai lokookeng a Yuda loapolon, taar Ekapolon Akuj ngesi.

⁸Tolimok Yuda Onan tama, “Toliwor ekeruman a aberu a lokaatokon alokasian, kainyo ejoikinit iyong ikokini neni, sodi touriu ngide a lokaatokon.”

⁹Nakaneni ani kona ayenea Onan atamar nyeliworosi ngide lu idounio ngikeng, toliwor na eperioto ka Tamar, talangak nalup ani peasakea auriun ngide lu eliworosi ngika lokaatokeng.

¹⁰Toronikis Ekapolon Akuj ngakiro nguna, taar Onan.

¹¹Tolimok Yuda Tamar na arai aberu a lokookeng tama, “Tobongo nawi a apakon kiboi irai apuserut tanang ngirwa lu epolounio lokookang Chela.” Alimuni ngesi kongina kainyo aemit abala kori edikino Chela dang etoani loger a talokaatokeng. Sodi tobongo Tamar nawi a apakeng.

¹²Adaunet a ngirwa a ngiche, totoan aberu a Yuda na arai nakookeng a Chua. Ani adaunet a ngirwa alu egoror Yuda, tonyout ka lopae keng anyaritae Ira, loa ere anyaritae Adulam. Toloto Timuna ni ayakasi ngitunga lu etubete ngajul a ngamesekin a Yuda.

¹³Ani iirari Tamar atamar elosi apaakeng alorot eteni Timuna akitub ngajul a ngamesekin keng,

¹⁴talacha ngesi ngiboro keng lu eraakar apuserut, sodi kimuk ereet a awaru nyeeyenere. Ani erumor tolot kiboikin lokidor a ere enyaritae Enaim, alo ayei lorot lo etenere Timuna. Asubi Tamar kongina kainyo engolikini atamar apolou Chela, nakaneni awoun akitiliwor ngesi aberu a Chela.

¹⁵Ani erukauni Yuda ngesi kaneni, tama kori erai amalaat kainyo emukit ereet keng.

¹⁶Sodi tolot ngesi ni ayei Tamar alokwaas a erot tolimok atamar asaki atopero ka ngesi. Peayeni Yuda atamar erai ngesi aberu a lokookeng. Kingit tama, “Nyoni kiinakini iyong ayong kacham?”

¹⁷Tatachak Yuda tama, “Karikokini ayong iyong ikale nikile anaanei kang.” Tolimok Tamar ngesi tama, “Nakinae ayong ibore ni idodiuni atamar kirikokini iyong ayong ikale nikile ngini.”

¹⁸Kingit Yuda ngesi tama, “Nyoni isaki iyong kainaki ayong iyong?” Tatachak Tamar tama, “Ekababaat kon, ka auno, ta aburo na itingit iyong anakan.” Sodi nak Yuda ngesi ngiboro ngulu daang topero ka ngesi. Topoti Tamar.

¹⁹Ani erumor, tonyou Tamar tolot nawi. Talacha awaru na emukitor ngesi ereet, sodi tanap nabo ngiboro lu araakar ngesi apuserut.

²⁰Ani emeari Yuda lopae keng lo anyaritae Ira, loa ere alo anyaritae Adulam ebala inaa Tamar ikale nikile sodi tobuu ngiboro lukolong aisikinea ngesi aberu ngina idodiunitere atamar eyauni ngesi ikale nikile, tongop Tamar.

²¹Sodi kingit ngesi ngitunga a akwap kangina tama, “Nyaani amalaat nakolong ebooyi alokwaas a erot alo a Enaim?” Tatachakis ngitunga ngesi tamasi, “Emam amalaat ayei nege.”

²²Sodi tobongo lopae keng a Yuda ngolo kisisak ngesi atamar kangopiki aberu ngina, nabo ebalasi ngitunga a akwap kangina emam amalaat eyei inaa.

²³Tolim Yuda tama, “Kimiekisi toting ngiboro ngulu tarata ngikeng sodi nyikikianare. Ingolik cha iyong dang eger lo ainaritor ayong ngesi ikale nikile en nakaneni kitongopik ngesi iyong.”

²⁴Ani adaunet a ngilapio a nguuni, tolimok itwaan iche Yuda atamar kebu aberu a lokookeng toliwor amalaat, nakaneni epoti. Sodi tolim Yuda tama, “Kipudutu kinomae!”

²⁵Ani eringa ngesi ipudunitoe, tomea itwaan ni ayei apakeng a lokile keng tama, “Itwaan nia ngiboro kalu ngesi kaurikini ayong. Nakaneni kemaimai iyong atamar toyen itwaan nia ekababaat kalo, ka auno, ta aburo naga.”

²⁶Tacham Yuda atamar eraakasi ngiboro ngulu ngikeng. Tolim tama, “Etenoono naga noi kedwangit ayong kainyo nyipotoro ayong ngesi ainak Chela atama kirum toliwor aberu keng.” Napei kwaar ngina jik, nyepero nabo Yuda ka Tamar.

²⁷Ani enangi ngirwa lu idounio Tamar, toyenae atamar idouni ngesi ngide lumuu.

²⁸Ani na ariabar ngesi esaki akidoun, kipud ikoku ipei akan nikalapatan. Toinik aberu na esidouni Tamar nyiuno niarengan nakan a ikoku kangini, ebala, “En ngesi edounio ekingaren.”

²⁹Nakaneni ani ebuari ikoku ngini akan tooma, kingareniu lokaatokeng. Tolim aberu na esidouni Tamar tama, “Ikwa ijukun iyong loger logo a?” Kotere ngakiro nguna tolimok ngesi ekiro be Peres.[83]

³⁰Ani ekisidi kidounoe lokaatokeng lo ainikina nyiuno niarengan nakan. Tolimokinae ekiro kangolo Sera.[84]