Read turkana Akisiakinet 39 Bible Online

Akisiakinet 39 - turkana bible

Akisiakinet 39

¹Ani enangi Yosep Misiri, togiel itwaan a akwap a Misiri anyaritae Potipa ngesi. Arai itwaan ngini ekapolon a ngasigerea ana eyokiyete akwap a ekapolon anyaritae Parao. Agielunio Yosep ani a Ngichimael alu arikunete ngesi Misiri.

²Nakaneni arukito Yosep ka Ekapolon Akuj sodi topia ngesi noi. Kiboi Yosep anawi a ekapolon keng, alo a akwap a Misiri.

³Toyen ekapolon keng atamar arukito Ekapolon Akuj ka Yosep nabo ngesi apiarit ibore daang ni asubi Yosep.

⁴Sodi tominak Potipa Yosep, kitiliwo ekasuban etich keng a elope. Kitiliwo Potipa Yosep ngesi epolokinit awi keng ka ibore keng daang.

⁵Napei alorwa alu etiliworea Potipa Yosep ekapolon a awi keng ka ibore keng daang, topia Ekapolon Akuj awi a itwaan ani a Misiri kangini kotere Yosep. Topia Akuj ibore keng daang anawi ka namanat.

⁶ Kotere ngakiro nguna, kimiekinea Potipa Yosep ngakiro daang ka ibore keng daang toliwor ngesi iyoki. Toliwor Potipa nyemisit ngakiro a ibore a iche, mati akimuj na anyami ngesi. Arai Yosep edia lokebusean tojok akwaan.

⁷Sodi ani ekisidi tasak aberu a Potipa atamar atopero ka Yosep abu tolimok ngesi atamar atopero.

⁸Nakaneni towou Yosep. Tolimok ngesi aberu a ekapolon keng tama, “Kingolik a, nyemisit ekapolon kang ngakiro a ibore a iche kanege anawi ani ayakar ayong nege. Ketiliwo ngesi ayong ekapolon a ibore keng kadaang.

⁹Emam itwaan iche epolot anawi kana akidwang ayong. Nabo emam ibore ketengerit ngesi ayong, mati iyong na irai aberu keng. Ekokini tokona ayong asubi akisech naaronon noi naga atosechak Akuj ai?”

¹⁰Arubakinit aberu ngina imaimai Yosep ngirwa daang, nakaneni towou Yosep akiper ka ngesi kori akiruor ka ngesi.

¹¹Nakaneni ani akolongit apei, na alomarea Yosep kai akisub etich keng loger lopalem, tamam ngikasubak etich luche alokai,

¹²toruakin aberu a Potipa eworu keng lo anikalapatan esaki atamar atopero ka Yosep. Nakaneni tamatar Yosep nikalapatan kimiek eworu keng anakan a aberu a Potipa.

¹³Ani ingolikini aberu ngina atamar emiek Yosep eworu anakan keng amatar nikalapatan,

¹⁴tanyarau ngikasubak etich a awi keng tolimok tama, “Kingolikisi a, kiinun ngoni Eburaniait logo abu arasit ngoni. Abunit ngesi atikoonor ayong sodi erema ayong lokojokon.

¹⁵Ani iirari ngesi ayong eremari, toisik eworu keng ani ayei ayong tamatar nikalapatan.”

¹⁶Sodi kikachak aberu ngina eworu ngolo tanang ebonguni ekile keng nawi.

¹⁷Kisisak ngesi lokile keng ngakiro nguna tama, “Asaki ekasuban etich lo erai Eburaniait lokolong irikuni iyong nege lo akirat ayong.

¹⁸Nakaneni ani napei eremarea ayong, toisik ngesi eworu keng ani ayei ayong sodi tamatar nikalapatan.”

¹⁹Ani iirari ekapolon a Yosep ngakiro a aberu keng na ebala, “Ngakiro na ikote nguna kesi kasubea ayong ekasuban etich kon,” tongo Potipa noi.

²⁰Tolim Potipa atamar yaarae Yosep toinikinae nipalem eananakinio ngitunga a ekapolon lu eeneeneo. Kiboi Yosep kaneni.

²¹Nakaneni arukito Ekapolon Akuj ka Yosep topia ngesi, sodi tominak ekapolon a ejela Yosep.

²²Kitiliwo ekapolon a ejela Yosep ekapolon a ngitunga kadaang alu aenitae alojela.

²³ Toliwor nyekachit ekapolon a ejela ngakiro a ibore kadaang ani apolokinit Yosep, kainyo arukito Ekapolon Akuj ka Yosep topia ibore daang ni asubi ngesi.