Read turkana Akisiakinet 4 Bible Online

Akisiakinet 4 - turkana bible

Akisiakinet 4

¹Topero Adam ka aberu keng, topoti aberu kidou Kain.[9] Tolim aberu tama, “Kengarak ayong Ekapolon Akuj aanyu ikoku nisapat.”

²Ani erumor kidou nabo ikoku nisapat iche enyaritae Abel. Arai Abel ekeyokon ngamesekin, tarai Kain eketan ngamanat.

³Ani ekisidi yau Kain ngakipeyos a ngalemet keng nia Ekapolon Akuj.

⁴Yau Abel imesek ni ekingaren a amesek keng, taar ani erumor tolem ngaringo naatumak kipeyok Akuj. Talakar Ekapolon Akuj ani a Abel ka ngakipeyos keng.

⁵Nakaneni nyemisikina Ekapolon Akuj ngakipeyos a Kain. Tongo Kain noi, tosiny.

⁶Kingit Ekapolon Akuj Kain tama, “Nyo ingoitor iyong kona, isinyitor?

⁷ Ani kisub iyong naajokak, kichamunio iyong. Ani pekisub iyong naajokak, esadit akisech alokidor kisakit iyong. Nakaneni ejoikinit iyong ipiyori.”

⁸ Tolimok Kain lokaatokeng Abel tama, “Bua apana naro.” Ani enangete kesi naro, sodi tonyoik Kain lokaatokeng Abel taar.

⁹Kingit Ekapolon Akuj Kain tama, “Nyaali lokaatokon Abel?” Tatachu Kain tama, “Nyayeni ayong. Ayong arai ekeyokon a lokaatokang a?”

¹⁰Kingit Ekapolon Akuj ngesi tama, “Anukiro na isub iyong nugu? Kegoronokinete ayong ngaakot a lokaatokon analup, esakete atachakino.

¹¹Kilamitae tokona iyong analup ana kolong apakasi kijuwasi ngaakot a lokaatokon alo iari iyong.

¹² Ani kitak iyong ngikinyam, nyerupunete analup. Iliwor iyong itwaan ni emam awi ni irimit akwap.”

¹³Tatachak Kain Ekapolon Akuj tama, “Etiono eriras kang noi nyapedori ayong anaikin.

¹⁴Kingolik a, kitwarak tokona iyong ayong anakwap kana nabo atongop alongaren kon. Aliwor ayong itwaan ni emam awi ni erimit akwap. Nakaneni eliwor daang nicha kaanyuni ayong, kaari.”

¹⁵Tolimok Ekapolon Akuj ngesi tama, “Nyikote neni. Ani ni cha kiari iyong, etachakinio ngatachakinet ngakan-kaarei.” Togerak Ekapolon Akuj Kain emachar sodi nyear ngesi itwaan ni iriamunotor.

¹⁶Torotok Kain alongaren Ekapolon Akuj, sodi tolom nakwap enyaritae “Akilare,” na eyei kide a Eden.

¹⁷Topero Kain ka aberu keng, topoti aberu kidou Enok. Todukok ngesi ere sodi tolimok ekiro be Enok, lo erai ekiro a lokookeng.

¹⁸Abu Enok touriu Irad, lo arai apakeng a Meuyael. Abu Meuyael touriu Mesuchael, lo arai apakeng a Lamek.

¹⁹Kuut Lamek ngaberu ngaarei, anyaritae apei Ada, anyaritae nache Sila.

²⁰Kidou Ada Yabal, lo erai apakeng kangulu elomito loeaman, tometo ngibaren.

²¹Anyaritae lokaatokeng Yubal, lo erai apaakeng alu ideese agita nabo tokusete ebune.

²²Kidou Sila Tubal-Kain Naama.

²³Tolimok Lamek ngaberu keng tama, “Ada ka Sila, topupokisi ngakiro kang. Esi ngaberu kang, topupokisi na asaki alimun. Kainyo aar ayong esorokit ani kawanea ayong. Aari ayong ngesi ani karamea ayong.

²⁴ Ani ketachakin na a Kain ngatachakinet ngakan-kaarei, etachakinio na a Lamek ngatachakinet ngatomwon-kaarei ka ngakan-kaarei.”

²⁵Topero Adam ka aberu keng nabo, sodi kidou aberu ikoku nisapat, tanyara ekiro keng Set.[10] Tolim Awa tama, “Kainaki ayong Akuj ikoku iche elunyokin nados a Abel alo aari Kain.”

²⁶Touriu Set ikoku nisapat tanyara ekiro keng Enoch. Ngirwa ngulu, tolomakis ngitunga akilipit elimito ekiro a Ekapolon Akuj.