Read turkana Akisiakinet 40 Bible Online

Akisiakinet 40 - turkana bible

Akisiakinet 40

¹Ani adaunet a ngirwa a ngiche, abu itwaan ni apolokinit emuna lo epuritoe a Parao, alo erai ekapolon a akwap a Misiri, ka itwaan ni apolokinit akipore ngamugati a ekapolon kangolo, tosechakis ekapolon kech.

²Sodi tongoik Parao ngikapolok luarei ngulu, lu araakasi ekapolon a emuna alo epuritoe ka ekapolon a ngamugati.

³Toinik ngesi kesi lojela lo ainikinitae Yosep, arai neni akai a ekapolon alo a ngasigerea ana eyokiyete Parao.

⁴Toseu ekapolon a ngasigerea Yosep toliwor ngesi ingarakinit kesi. Kibooyoto kesi alojela ngirwa lukaalak.

⁵Ani nakwaare a akolongit a apei alotooma ejela, apot ngitunga luarei ngulu kirujata, ekapolon a emuna alo epuritoe ka ekapolon lokepon ngamugati. Kiruja ipei kech daang nakaneni agelagela eger a ngakiro ana erujaate kesi.

⁶Ani elosi Yosep aanyun kesi nataparach, torukau kesi ialolongete.

⁷Sodi kingit Yosep kesi tama, “Nyo ialolongioto esi akolongit naga?” Tatachakis kesi ngesi tamasi, “Kirujae sua daang, nakaneni emam itwaan epedori akisisaun eger a ngakiro ana kirujae sua.”

⁸Tolimok Yosep kesi tama, “Akuj ngesi eyei agogongu na itenunere ngakiro na irujao. Tolimokinae chene ayong ngakiro na irujaate esi.”

⁹Kisisak ekapolon a emuna alo epuritoe Yosep ngakiro na erujae ngesi ebala, “Anakirujare ana erujae ayong, engolikini emusabib alongaren kang.

¹⁰Ayakasi ngaten ngauni lomusabib ngolo. Ani napei arupuneta ngakui, toturout ngatur, sodi tokoko ngamusabib.

¹¹Atingit ayong ekopo a Parao a akan, sodi atolem ayong amusabib, atochik lokopo ngolo, aina Parao, sodi kidiau Parao.”

¹²Tolimok Yosep ekasuban etich ngolo tama, “Eger a ngakiro ana irujae iyong ngesi logo, eraakasi ngaten nauni ngirwa nguuni.

¹³Ani adaunet a ngirwa a nguuni, kipuduni iyong Parao alojela sodi kitobuak lotich lopalem kon. Iliwor iyong iinanari Parao ekopo loger lokolong sek iinanakinea na iraakar itwaan ni ipolokinit emuna lo epuritoe.

¹⁴Nakaneni ani ianyuni ngakiro naajokak nguna, kemaimai iyong atamar tolimok kare Parao ngakiro kang, kingarak atopud kane alojela.

¹⁵Kainyo kakokounio kolong ayong anakwap a Ngieburaniae. Ani tani kane alo Misiri, emam ibore ni asechit ayong nikaenitere alojela.”

¹⁶Ani ingolikini itwaan ni apolokinit ngamugati atamar ejokak ngakiro na etenun nguna, tolimok Yosep tama, “Erujae ayong dang! Erujae ayong ewokit ngakikapea ngauni a ngamugati a akou.

¹⁷Tooma akikap na ayei kidiama, ayakasi ngamugati ngagelagelae naajokak na araakasi ngaka Parao. Nakaneni anyamete ngikieny ngamuja nguna!”

¹⁸Tolimok Yosep ngesi tama, “Eger a akirujare ana irujae iyong ngesi logo. Eraakasi ngakikapea nauni ngirwa nguuni.

¹⁹Adaunet a ngirwa a nguuni, etubori Parao akou kon, kinenek iyong lokitoe, sodi tanyama ngikieny akiring kon.”

²⁰Ani enangi akolongit na a ngauni na etamunitere akwaar nakolong edounere Parao, sodi ngesi atamar kidorokinoe akimuj nakaalan kotere ngikasubak etich keng daang. Talachak ngesi alojela itwaan ni apolokinit emuna keng lo epuritoe, ta itwaan ni apolokinit ngamugati, torikunoe ngaren ngikasubak etich keng.

²¹Tobuak ngesi lo apolokinit emuna lo epuritoe lotich keng, toliwor einanakini Parao ekopo.

²²Nakaneni kinenek ngesi lo apolokinit ngamugati lokitoe, loger lo etenikinea Yosep kesi ngakiro na erujaate.

²³Nakaneni nyitamuna itwaan ni apolokinit emuna lo epuritoe ngakiro a Yosep apot kimuriakis jik.