Read turkana Akisiakinet 41 Bible Online

Akisiakinet 41 - turkana bible

Akisiakinet 41

¹Ani adaunet a ngikaru a ngiarei, kiruja Parao niti ewei alokwaas a angolol ana enyaritae Nili.

²Ani eyei neni kingolik ngaatuk ngakan-kaarei naajokak totumito edokunete anangolol sodi tolomakis adaka nginyia kaneni.

³Todokut nabo ngaatuk ngache ngakan-kaarei anangolol naaronok kikarite. Pot kesi towaa alo diyete naajokak totumito na ayakasi lokwaas a angolol.

⁴Tanyama ngaatuk naaronok kikarite ngaatuk nache nakan-kaarei naajokak totumito. Tokienyu Parao.

⁵Ani nabo ejotoor, kiruja na a ngaarei. Taanyunga ngakies a ngimomwa ngakan-kaarei naapolok nabo tojokak erupunito anakasirimait a apei.

⁶Toruput nabo ngakies a ngimomwa ngache ngakan-kaarei na ejutarit kitowoniyorite ekuwan lokariran a ariet.

⁷Kilikosi ngakies a ngimomwa nakan-kaarei na ejutarit nache nakan-kaarei naapolok tojokak. Ani ekienyuni Parao, toyen atamar erujae ngesi.

⁸ Ani iwalari, kialolong Parao. Tolim ngesi atamar tanyaraunae ngimurok daang ka ngitunga lukoosok daang eyakasi Misiri. Kisisak ngesi kesi ngakiro na erujae ngesi, nakaneni emam tani ipei ni abu kitenik ngesi eger a ngakiro ana erujae ngesi.

⁹Itwaan ni apolokinit emuna lo epuritoe, abu tolimok Parao tama, “Etam ayong tokona ngakiro na asechit ayong!

¹⁰Ngirwa lukolong kitongoitor sua ngikasubak etich kon iyong, kitoinik iyong ayong ka itwaan ni apolokinit ngamugati lojela alokai a ekapolon a ngasigerea,

¹¹kipot sua erujata akolongit apei nakwaare, kiruja ipei kosi daang ngakiro nagelayek.

¹²Kirukit sua ka edia lo arai Eburaniait, arai ngesi ekasuban etich a ekapolon a ngasigerea. Ani kisisakini sua ngesi ngakiro nakirujae, kitenik ngesi ipei kosi daang ngakiro nguna itemem ka ngakiro na erujae ngesi.

¹³Tosubakin ngakiro nguna loger lo etenunitor ngesi. Kitobuak iyong ayong lotich kang, sodi kinenek ekapolon a ngamugati lokitoe.”

¹⁴Tolim Parao atamar torikunoe Yosep. Torikunoe ngesi alojela atipei, ani kebany ngitim kiloch ngiworui torumor, bu ngesi nia Parao.

¹⁵Tolimok Parao Yosep tama, “Eruja ayong nakaneni emam itwaan ketenikini eger a ngakiro kanguna. Eira ayong atamar ipedori iyong akitenun eger a ngakiro ana irujao erai kisisakin.”

¹⁶Tatachak Yosep Parao tama, “Meere ayong eyei agogongu ngina, nakaneni kiinakini Akuj iyong akiroit naajokon.”

¹⁷Sodi tolimok Parao Yosep tama, “Erujae ayong awei alokipetet a angolol enyaritae Nili.

¹⁸Engolik ayong ngaatuk ngakan-kaarei naajokak totumito edokunete anangolol sodi tolomakis adaka nginyia kaneni.

¹⁹Todokut nabo ngaatuk ngache ngakan-kaarei na ejiwaikinit. Aroko kesi ekarit noi, nabo nyeanyungara ayong ngaatuk na ikarit loger ngolo alowae a eche alo Misiri.

²⁰Ngaatuk naaronok a erogo, apot tanyama ngaatuk naatumak.

²¹Nakaneni ani tani kenyam nache kerumor, kemam itwaan epedori akiyen atamar enyamito ngaatuk nache, kainyo aringa eroko ikote nisek a ekingaren. Sodi atokienyu ayong.

²²Ani nabo anakirujare a ache, engolik ngakies a ngimomwa ngakan-kaarei naapolok nabo tojokak erupunito anakasirimait a apei.

²³Toruput nabo ngakies a ngimomwa ngache ngakan-kaarei naaronok na ejutarit kitowoniyorite ekuwam lokariran a ariet.

²⁴Apot ngakies a ngimomwa nakan-kaarei naaronok kilikosi naajokak. Esisak ayong ngimurok nakaneni emam itwaan apedori akitenun.”

²⁵Sodi tolimok Yosep Parao tama, “Ngakiro naarei irujae iyong nguna, erai eger kech epei. Kidodik iyong Akuj ngakiro na edikino ngesi esubakini.

²⁶Eraakasi ngaatuk naajokak nakan-kaarei ngikaru ngikan-kaarei, nabo eraakasi ngakes a ngimomwa nakan-kaarei naajokak ngikaru ngikan-kaarei. Eraakasi ngakiro na irujae iyong ngapei.

²⁷Ngaatuk nakan-kaarei naaronok kikarite na atupuunete nache, eraakasi ngikaru a eron ngikan-kaarei. Ani ngakies a ngimomwa nakan-kaarei ejutarit kitowoniyorite ekuwam loa akamu a ariet, eraakasi nabo ngikaru a eron a akoro ngikan-kaarei.

²⁸Tokona bocha Parao, ikote nguna eger lota kalimokinitor atamar kidodik iyong Akuj ngakiro na edikino esubakini.

²⁹Epete ngikaru ngikan-kaarei a akimwonut nakwap daang a Misiri.

³⁰Nakaneni isidiunosi ngikaru ngikan-kaarei a eron a akoro sodi kimuriakis ngitunga tani ngakiro a akimwonut kangina. Inyasuni eron a akoro kangina akwap naga.

³¹Imuriakinete ngitunga ngakiro a akimwonut kangina kainyo eroner noi akoro na isidiun.

³²Idodiunit ibore ni irujae iyong ngakirujaet ngaarei atamar Akuj ngesi atiaku ngakiro na edikino esubakini.

³³“Ejoikinit tokona iyong Parao iseuni itwaan nikachwaan toos, sodi kitiliwo ngesi eweikinit ngakiro a akwap kadaang a Misiri.

³⁴Ejoikinit nabo iyong iseuni ngikapolok ngiche kane anakwap lu ilimokini iyong atamar kidiatut alemunet apei anakan a ngalemet kadaang a akwap a Misiri a ngikaru alukan-kaarei a akimwonut.

³⁵Todungok iyong kesi atamar kidiatut akimuj daang a ngikaru alukan-kaarei eminio akimwonut nakwap. Tolimok iyong kesi atamar kidiatut akimuj alorerea kadaang sodi kiyoko akimuj ngina.

³⁶Eliwor akimuj ngina na itegeliaritae idaritere eron, toyuunere akwap naga sodi nyeemunyar ngitunga kotere akoro ngina isidiun.”

³⁷Tojoikis Parao ka ngikasubak etich keng daang ngakiro nguna.

³⁸Sodi kingit Parao ngikasubak etich keng tama, “Aliwae kianyunea itwaan iche ni ikoni en, ni eyei Etau a Akuj?”

³⁹Ani erumor tolimok Parao Yosep tama, “Ani kona kidodikinea iyong Akuj ngakiro nugu daang, emam iche nikachoan toos loger kon.

⁴⁰Iyong ngesi iweikini akwap kang, nakaneni iwapete ngitunga daang ngakiro na idunguni iyong. Ani alowae a apolou, ayong bon kengareni iyong.”

⁴¹Tolimok Parao Yosep tama, “Napei tokona jik, kaseu ayong iyong toliwor ekapolon anakwap kadaang a Misiri!”

⁴²Tobut Parao ekababaat lo ayei emachar keng alokimoin, tobutok lokimoin a Yosep. Kitanap ngiworui lukaanikak ajokak, kitanap nabo erikot lo egolit alomosiring.

⁴³Kitome Parao Yosep aurukuk keng na a ngaarei na irito ngangolei. Kingarenikis ngasigerea na iremasi ebalasi, “Toriediko! Toriediko!” Sodi kitiliwo Parao Yosep lo epolokinit akwap a Misiri daang.

⁴⁴Ani eyakasi nguna daang, tolimok Parao Yosep tama, “Adungunit ayong Parao atamar, emam itwaan tani ipei anakwap kadaang a Misiri ni ikeuni akan kori akeju eringa iyong nyechamakina.”

⁴⁵ Tolimok Parao Yosep ekiro a akwap a Misiri lo anyaritae Sapenas-panea. Kisuut ngesi Asenas na arai nakookeng a Potipera alo arai emuron a akuj anasubuna a ere alo enyaritae Eliopolis, toliwor aberu keng. Sodi kirim Yosep akwap daang a Misiri.

⁴⁶Araakasi ngikaru a Yosep ngitomwon-uni na esiakinea akisub etich a Parao. Torotok Yosep ani ayei Parao tolot kirim ngiwaitin daang a akwap a Misiri.

⁴⁷Tokoniut ngamanat a akwap a Misiri akimuj nakaalan noi a ngikaru alukan-kaarei a akimwonut.

⁴⁸Kidiatu Yosep akimuj daang alorerea kadaang a Misiri, a ngikaru alukan-kaarei a akimwonut. Alore kadaang, kidiatak ngesi akimuj na alemio anamanat ana ayakasi diyete ere ngolo.

⁴⁹Kidiatak Yosep akimuj nakaalan noi, na elal noi etia asinyen na anam, tongop tani kona itemio.

⁵⁰Ani eringa ngikaru lua akoro nyisiakina, touriu Yosep ngide lusapa ngiarei ani ayei Asenas na arai nakookeng a Potipera, alo arai emuron a akuj anasubuna a ere alo enyaritae Eliopolis.

⁵¹Tolimok Yosep lokookeng lo ekingaren ekiro be Manase,[85] ebala, “Kesimuriak ayong Akuj ngichan kang daang ka ngitunga a awi a apakang daang.”

⁵²Sodi tolimok ngesi lokookeng loa ngiarei ekiro be Epiraim[86] ebala, “Kainaki ayong Akuj ikoku anakwap ana kaboliare.”

⁵³Tadaunos ngikaru lukan-kaarei a akimwonut anakwap a Misiri.

⁵⁴Kisiakis ngikaru lukan-kaarei a eron a akoro, loger losek alimunitor Yosep. Min eron a akoro nakwapea nache daang, nakaneni ayei akimuj lowaitin daang a akwap a Misiri.

⁵⁵Ani enyami ngitunga a Misiri akoro, kikaloikis Parao ebalasi kisaki akimuj. Nakaneni tolimok Parao kesi tama, “Kapesi nia Yosep tosuba ngakiro nakilimokini ngesi esi.”

⁵⁶Toroner akoro tokeikin akwap wadaang. Sodi tangaa Yosep ngikerui daang, kitogiel ngitunga a Misiri akimuj.

⁵⁷ Pot tani ngitunga a ngakwapea anache Misiri ni ayei Yosep akigiel akimuj kainyo abu akoro toroner anakwapea kadaang.