Read turkana Akisiakinet 43 Bible Online

Akisiakinet 43 - turkana bible

Akisiakinet 43

¹Toroner akoro noi anakwap a Kanaan.

²Ani adaunet a akimuj ana kolong agielunete kesi alo Misiri, tolimok Yakobo talokookeng tama, “Tobongosi Misiri kitogielakis akimuj nadiochichi.”

³Nakaneni tolimok Yuda apakeng tama, “Kichikichiki kolong sua itwaan ngini elemarit ebala, ‘Nyikianyungarete esi ayong erai pekirukut ka lokaatokus loochi.’

⁴Ani kichamak iyong lokaatokosi erukosi ka sua, kilosi sua atogiela akimuj.

⁵Nakaneni ani pekichamak iyong ngesi kirukori ka sua, nyikilosi sua inaa kainyo kilimokini kolong itwaan ngini sua ngakiro na ilereete ebala, ‘Nyikianyungarete esi ayong nabo mati kirukut ka lokaatokus loochi.’ ”

⁶Tolim Yakobo tama, “Nyoni kitaanyuneta esi ayong ngichan kona, ani ilimokineta itwaan ngini atamar eyei esi lokaatokus eche?”

⁷Tatachakis tamasi, “Kingitanari itwaan ngini sua ngakiro a ngitunga a awi yok lokojokon. Kingit ngesi sua tama, ‘Abala ayong esi a, eringa apakus eyari a? Abala ayong esi a, eyei esi lokaatokus eche a?’ Sodi atatacha sua ngakiro nakingisit ngesi sua. Ekoe, adikino sua kiyeni kwaai atamar kilimokini ngesi sua tama, ‘Torikutu lokaatokus?’ ”

⁸Tolimok Yuda apakeng Yakobo tama, “Tachamakinae ayong kirukori ka ngesi sodi atorotokisi atipei, atoloto atogiela akimuj, sodi nyikimunya sua akoro ka iyong aapei, ta ngide kosi.

⁹Aliwor ayong ekaweikinan keng, kimichae iyong ayong. Ani pekabuu ayong ngesi taanyunga iyong a ngakonyen kon a ilope, tapaikinae ayong ngakiro keng jik.

¹⁰Arai kolong nyikimamak kane, kilosit kolong ka abongun na a ngaarei.”

¹¹Sodi tolimok apakech Yakobo kesi tama, “Ani kikote ngakiro neni, yaasi robo ageor ka ngiboro luajokak a akwap yok inasi ekapolon ngolo ebachit. Inasi ngesi ekitoe lokaakunyon lo iwasae lodiochichi, ka akimiet a ao nadiochichi, ka ekitoe lo itukukunyi akimuj lodiochichi, ta ageor na ikwaan ka ngakalalio ka na ikwaan ka engoomo.

¹²Yaasi ngaropiyae ngatiaket ngaarei, kainyo ejoikinit inyiakarete ngaropiyae nakolong ewaakinio lochuei kus, ejok kolong kiwaakinitetei neni emam itwaan esaki akiwaakin.

¹³Torikosi tani lokaatokus toloto ni eyei itwaan ngini.

¹⁴Kimiekisi Akuj Naationon kisieni esi ani eyei itwaan ngini sodi talachak ngesi lokaatokus loche, ta Benjamen. Ani eliwor ayong, ani kejoikinit ngide kang daang edaunosi, kimiekisi tadaunos!”

¹⁵Sodi yaasi kesi ebachit ngolo, yaasi ngaropiyae nakaalak na idwangito nakolong a ekingaren, kirukosi ka Benjamen lo arai lokaatokech. Tonyout kesi toloto Misiri. Ani enangete, toloto ni ayei Yosep.

¹⁶Ani eanyungari Yosep Benjamen erukito ka kesi, tolimok itwaan ni aweikinit awi keng tama, “Toriko ngitunga lugu nawi tongol ibarasit kidorok, kainyo kimuj ayong ka kesi akimuj na a apaaran.”

¹⁷Tosub itwaan ngini ngakiro na alimokinitae, toriko ngipeyok ngulu nawi a Yosep.

¹⁸Ani ingolikinete kesi atamar kirikor kesi nawi a Yosep tobul, kingitanaros make ebalasi, “Kirikun ngoni nege kotere ngakiro a ngaropiyae ana kinyiakakinio ngoni analotoru ana kolong yok a ekingaren, tatakanuunea ibore nikititakinea ngesi ngoni atipei, kitedemarea ngoni ngisikiria yok, ani erumor kitiliwo ngikedalak keng.”

¹⁹Kotere ngakiro nguna, toloto kesi ni ayei itwaan ni aweikinit awi a Yosep kisuruoro ngesi alokidor a akai,

²⁰ebalasi, “Torimakinae kare ekapolon, kiponit kolong sua nege akigiel akimuj.

²¹Ani kinangi nikiperi alorot, tangaa ipei kosi daang echue keng, atorukautu sua ngaropiyae kosi kadaang eyakasi nakituk a ngichuei emam itwaan kelema. Kibuu sua ngaropiyae nguna.

²²Kiyau sua tani ngaropiyae ngache nagielet akimuj. Nyikiyeni sua atamar ngae enyiakakini ngaropiyae lochuei kosi.”

²³Tatachak ekaweikinan a akai ngolo tama, “Warasi nyialolong kori nyieam. Akuj kus, na erai Akuj a apakus ngesi enyiakakini ngaropiyae lochuei kus. Ayong ngesi ediauni ngaropiyae kus.” Ani erumor toriku ngesi Simeon ni ayakasi talokaatokeng.

²⁴Kipeyou ekaweikinan a akai ngolo kesi nawi a Yosep nak ngakipi na ilotareta ngakejen, sodi nak ngisikiria kech akimuj.

²⁵Tolemut talokaatokeng a Yosep ebachit lo asakete ainakin Yosep kainyo eirarito atamar imujete kesi ka ngesi.

²⁶Ani ebonguni Yosep nawi, inut kesi ngesi ebachit losek ainunito sodi toriediko tatapa ngireetin ngalup.[88]

²⁷Kingit Yosep kesi ngakiro a eboyor kech, ani erumor kingit kesi tama, “Kisisakinito kolong esi ayong ngakiro a apakus, ikoni tokona ngesi ai?”

²⁸Tatachakis tamasi, “Iboi ekasuban etich kon apakosi niajokon, eringa eyari.” Ani erumor kijuuruoto kesi idodiunito arimatoi.

²⁹Ani ingoliari Yosep, taanyunga lokaatokeng Benjamen, lokolong edounio ka ngesi anakook aapei, tolim tama, “Erai logo lokaatokus loochi lokolong kisisakinete esi ayong ngakiro keng a? Kitopia iyong Akuj lokookang!”

³⁰Torotok Yosep kaneni atipei kainyo akot akikaloun ani asuruor etau kotere lokaatokeng. Toloma ngesi namaniyat a akai ana epereene sodi kikalou ngakiyo cholae.

³¹Ani kilota ereet keng kerumor, tolom kaneni etitinyikinit, tolim atamar yaunae akimuj.

³²Tokorakinae Yosep akimuj ipakara epewae, tokorakinae kesi nakech ipakara wache. Tani ngitunga a Misiri lu emujete ka ngesi, tokorakinae akimuj ipakara epewae, kainyo etaleo Ngimisiri akimuj aapei ka Ngieburaniae.

³³Kiboikinos talokaatokeng a Yosep lowae lo engoliarit Yosep torekinos ibooyete ani eyei loapolon tanang ni eyei loochi. Ani ingolikinete kesi eger lo arekinotor, toliworos ekienyanakinosi eiliilikinito ngakiro na ebooyoto kesi kongina.

³⁴Toliwor akimuj elemuununio alomeesa a Yosep inunae kesi, nakaneni nakinae Benjamen ngainakinet ngakan akidwang na ainakinio talokaatokeng. Sodi tamata kesi ka Yosep talakaros aapei.