Read turkana Akisiakinet 44 Bible Online

Akisiakinet 44 - turkana bible

Akisiakinet 44

¹Todungok Yosep itwaan ni aweikinit akai keng tama, “Kilelebik ngichuei a ngitunga kalu akimuj etiae lo epedorete kesi akiwok. Ani erumor, kiwaak ngaropiyae a ipei kech kadaang nakituk a echue keng.

²Ani echue a edia aloochi, kiwaak ekopo kang lo esubunitae a akwangat, nabo tobuak ngaropiyae keng.” Tosuba ekaweikinan a akai ngolo ngakiro nguna alimokinitae.

³Ani nataparach elilim, tachamakinae kesi erotokinete ka ngisikiria kech.

⁴Ani eringa kesi eloose alo diyete ere, tolimok Yosep itwaan ni aweikinit akai keng tama, “Tonyou atipei kiwapak ngitunga lutete, ani iditari, kingit tama, ‘Nyo itacheta esi ngakiro naajokak anaaronok?

⁵Nyo ikokoyareta esi ekopo a ekapolon kang lo esubunitae a akwangat?[89] Ikwa nyiyenete esi atamar emaseenea ekapolon kang ekopo ngolo, nabo ngesi edwarea ngesi ngakiro a? Isechito esi noi ani isubeta kongina.’ ”

⁶Ani editari ekaweikinan a akai ngolo kesi, tolimok ngakiro nguna.

⁷Nakaneni kingita kesi ngesi tamasi, “Ekapolon, nyo kilimokinitor iyong sua ngakiro na ikote nguna? Kikokini sua ngikasubak etich kon kisubi ngakiro na ikote nguna ai?

⁸Iyeni iyong atamar ngaropiyae nakirukauni sua anakituk a ngichuei, kipot sua atobuutu anakwap a Kanaan. Kikokini tokona sua kikokoyari ngaropiyae kori egolit anawi a ekapolon kosi ai?

⁹Tokona bocha ekapolon, ani keyei itwaan anikosi ni eriamunio etingit ekopo ngolo, echamit eario. Kiliwor sua luche daang ngikedalak kon.”

¹⁰Tolim itwaan ngini tama, “Itemokino. Kimiekisi kikokis eger lo tokona ilimunioto esi. Itwaan ni erukaunio etingit ekopo ngolo, ngesi eliwor ekasuban etich kang, nakaneni kimiekinio esi luche daang.”

¹¹Sodi totiyau ipei kech daang echue keng kwap atipei, tangaa.

¹²Kiseme itwaan ngini ngichuei kech daang, kisiak ani eyei loapolon, tanang ni eyei loochi. Taanyunae ekopo alochue a Benjamen.

¹³Tochilichileta kesi ngiworui kech. Kidokok ipei kech daang ngiboro keng losikiria, tobongosi lore.

¹⁴Ani ebongorete Yuda ka talokaatokeng nawi a Yosep, torukaut Yosep eringa eyei nawi. Toloto kesi toriediko alongaren keng.

¹⁵Kingit Yosep kesi tama, “Abala ayong esi a, anukiro nugu kisubeta esi ayong? Ikwa nyiyenete esi atamar epedori itwaan ni ikoni ayong akiyen ngakiro kotere akidwar a?”

¹⁶Tatachak Yuda tama, “Anukiro kilimokini sua iyong ekapolon? Kitamari ai? Kikokini sua kitamari nyikisechit ai? Esileereu Akuj akisech kosi alu kirai ngikasubak etich kon. Kirai tokona sua daang ngikedalak kon, aapei ka lotete aanyunio ekopo anikeng.”

¹⁷Nakaneni tolim Yosep tama, “Nyapedori ayong akikokin neni! Ngolo aanyunio ekopo kang anikeng ngesi bon eliwor ekedalan kang. Tobongosi esi luche daang nika apakus a ekisil.”

¹⁸Sodi tolot Yuda ni ayei Yosep tolimok tama, “Ekapolon, kemaimai iyong atamar kimiekinae katolimok ngakiro ngadikidio, nabo kemaimai atamar nyiingo kainyo ikoni iyong Parao elope.

¹⁹Ekapolon, kingisi kolong iyong sua tama, ‘Eyei esi apakus ka lokaatokus eche a?’

²⁰Atatachakisi sua iyong atamasi, ‘Eyei sua apakosi lo emojongit ka lokaatokosi loochi lo edounio emojongit apakosi. Atoana kolong lokaatokeng loapolon, edong erai ngesi bon eyari alokol kech. Emina apakosi ngesi noi.’

²¹Ekapolon, kilimokini kolong iyong sua atamar atorikutu ngesi nege sodi taanyu iyong.

²²Kipot sua atolimokisi iyong atamar nyepedori ngesi atiaka ka apakeng kainyo ani kikok neni etoani apakeng.

²³Sodi ibu iyong kitolimok sua tama, ‘Ani pekirukut esi ka lokaatokus loochi, nyikianyungarete ayong nabo.’

²⁴Ani kibongori sua ni eyei ekasuban etich kon apakosi, esisakisi sua ngesi ngakiro nakilimokini iyong sua.

²⁵Ani kilimokini ngesi sua atamar atobongutu nege atogiela akimuj nadiochichi,

²⁶atolimokisi sua ngesi atamasi, ‘Nyikilosi sua. Ani kiruko sua ka lokaatokosi loochi, kilosi, kainyo nyikianyungari sua itwaan ngini erai pekiruko ka ngesi.’

²⁷Kitolimok sua apakosi lo erai ekasuban etich kon tama, ‘Iyenete esi atamar edouni kolong Rael na arai aberu kang ngide lusapa ngiarei.

²⁸Kaisiki kolong ayong epei, sodi atama ayong anyilinyilaa kolong ngesi etiengit a moding, nakaneni nyeanyungara ayong ngesi nabo.

²⁹Ani kirikosi esi logo dang anikang, taanyun ka ngakiro naaronok, kaarete ayong ngakiro nakesialolongete arai ekasukout lomojong kona.’

³⁰Tokona bocha ekapolon, ani kabongo ayong ni eyei apakang, lo erai ekasuban etich kon pekirukit ka edia logo, tarai eyarea apakang ni eyakar edia logo,

³¹ani kingolik ngesi atamar nyikirukit sua ka edia, etoani! Nakaneni earete ngesi ngakiro nakisialolongio sua ngikasubak etich kon ngesi erai ekasukout lomojong.

³²Ani eyakasi nguna daang, aweikini kolong ayong elope edia abala, ‘Ani pekabuu ayong Benjamen ni iyei iyong, tapaikinae ayong ngakiro keng jik.’

³³Tokona bocha ekapolon, kemaimai ayong ekasuban etich kon iyong abala, kimiekinae ayong elunyokin nados a edia kalo. Kimiek iyong ngesi tobongosi ka talokaatokeng nawi.

³⁴Ekokini ayong abongori ni eyei apakang pekirukit ka edia logo ai? Nyatitinyikini ayong akitere apakang eanyuni ngakiro naaronok.”