Read turkana Akisiakinet 45 Bible Online

Akisiakinet 45 - turkana bible

Akisiakinet 45

¹Tongopik Yosep kona etitinyikini ngakiro alongaren ngitunga lu awaasi alo diyete keng, tolim tama, “Kipudosi ngitunga daang nikalapatan!” Nakaneni amam itwaan iche ayei neni na eteyanar Yosep talokaatokeng.

²Kikalou ngesi irema kiirasi tani Ngimisiri, ka ngiyenet a Parao.

³Tolimok Yosep talokaatokeng tama, “Arai ayong Yosep Eringa apakang eyari a?” Nakaneni tobul talokaatokeng kililinga chek, tongop tani kona etachakinete ngesi ngakiro.

⁴Tolimok Yosep talokaatokeng tama, “Taapuutu kare diyete kang nege.” Ani eapuunete kesi, tolimok tama, “Arai ayong lokaatokus lokolong kigielarete esi abu Misiri.

⁵Nakaneni nyiialolongo tokona kori nyiingoikinosi ani kolong kigielareta. Erai Akuj kolong kayauni ayong nege kengareniu esi, atoyuunea ngitunga.

⁶Kainyo erai tokona ekaru logo loa ngiarei eyakar akoro nakwap, nakaneni epote ngikaru ngiche ngikan lu emamakar ngamanat itao kori ngalemet elemio.

⁷Kayauni kolong ayong Akuj nege kengareniu esi sodi eteyarea ngalesea kus anakwap, katoyuu esi a erot alo kitalari.

⁸ Kotere nguna, meere esi kolong kiyaunete ayong nege, erai Akuj. Ketiliwo Akuj ayong ekapolon lo atupit Parao, lo aweikinit ibore daang, nabo ayong apolokinit akwap a Misiri daang.

⁹“Tobongosi tokona atipei ni eyei apakang tolimokis tamasi, ‘Ebala lokookon Yosep kona, ketiliwo ayong Akuj ekapolon a akwap kadaang a Misiri. Bua ni ayei ayong, nyiitinenik.

¹⁰Ilomi iyong ni enyaritae Gochen ni eyei diyete kang. Neni ngesi ilomete iyong ka talokookon, ka ngide a ngide kon, ka ngibaren kon daang, ta ibore kon daang.

¹¹ Ketani ayong iyong na ilomea Gochen. Etani tani ngitunga a awi kon ka ngibaren kech sodi nyeemunya akoro kainyo eringa ngikaru ngikan a akoro idongito.’ ”

¹²Torubak Yosep ebala, “Ingolikis tokona esi ngikulepek nabo engolik tani lokaatokang Benjamen atamar ayong Yosep ngesi kiruoro ka esi.

¹³Tolimokisi apakang ngakiro a ajakaanut kang kanege alo Misiri, tolimokisi tani ibore daang ni ingolikis esi. Kapesi tokona atipei torikut apakang nege.”

¹⁴Ani erumor tonuak ngesi lokaatokeng Benjamen kikalou kotere alakara. Kikalou Benjamen dang enuakinit ngesi.

¹⁵Tonuak Yosep talokaatokeng daang igoro, ani erumor kiana ka kesi.

¹⁶Ani iirarete ngitunga a awi a Parao atamar apot talokaatokeng a Yosep, talakaros Parao ka ngikasubak etich keng noi.

¹⁷Sodi tolimok Parao Yosep tama, “Tolimok talokaatokon kidokokis ngiboro losikiria tobongosi nakwap a Kanaan.

¹⁸Ani erumor torikut apakech ka ngitunga a ngawiyei kech daang, sodi ainak ayong kesi akwap na ejok noi anakwap a Misiri, sodi tanyama kesi akimuj nakaalan noi na eyareta anakwap kana.

¹⁹Tolimok kesi tani atamar torujasi ngaurukukui na irito ngangolei kanege alo Misiri kotere ngide luuchik ka ngaberu kech, sodi kirukut ka apakech.

²⁰Tolimok kesi atamar nyiialolongo kotere ngakiro a ngibaren kech kainyo ekech tokona ewae lo ejok noi alo Misiri.”

²¹Sodi tosubakis talokookeng a Yakobo ngakiro na alimokinitae. Nak Yosep kesi ngaurukukui na irito ngangolei ka akimuj na enyamete alorot, loger lo adungokinitor Parao.

²²Nak ngesi ipei kech daang ngiworui lu ilochioto luche, nakaneni nak Benjamen ngaropiyae ngamiae ngauni, ka ngiworui ngikan lu ilocheene.

²³Ngiboro lu ameari ngesi ni eyei apakeng kesi ngisikiria ngitomon lu esiwokitae ngiboro luajokak a Misiri, ka ngasikiria ngatomon na esiwokitae akimuj, ka ngamugati, ta ngamuja nache na enyami apakeng alorot.

²⁴Sodi tolimok Yosep talokaatokeng atamar toloto niajokon, ani enyounete, kichikichik ebala, “Nyiiburata alorot iloose!”

²⁵Tonyout kesi alo Misiri tobongosi Kanaan ni ayei awi a Yakobo alo arai apakech.

²⁶Tolimokis apakech tamasi, “Eringa Yosep eyari! Ngesi erai ekapolon a akwap kadaang a Misiri!” Toriangakin apakech noi nabo nyenupa ngesi ngakiro kech.

²⁷Nakaneni ani isisakinio ngesi ngakiro daang a Yosep na alimokini kesi, nabo taanyunga ngaurukukui daang na irito ngangolei na ameuni Yosep akiwok ngesi, abu kikwaru.

²⁸Tolim Yakobo tama, “Etemokin! Eringa lokookang Yosep eyari! Alosi ayong ataanyu ngesi eringa ayong nyetoana.”