Read turkana Akisiakinet 46 Bible Online

Akisiakinet 46 - turkana bible

Akisiakinet 46

¹Sodi tonyou Yakobo etingit ngiboro keng daang torotok. Ani enangi Beer-cheba, kipeyok Akuj a apakeng Isaka ngakipeyos.

²Kisuruor Akuj ngesi anakisingolikinet nakwaare tanyara tama, “Yakobo! Yakobo!” Kiki Yakobo tama, “Ayong lo.”

³Tolimok Akuj ngesi tama, “Ayong arai Akuj, Akuj a apakon. Nyiiker alosit Misiri, kainyo etiliwori ayong ngalesea kon kaina na eyenikinitae.

⁴Kirukori ayong alope ka iyong kabuuni iyong nege. Itoani iyong irukito ka Yosep.”

⁵Tonyou Yakobo alo Beer-cheba. Kidokokis talokookeng ngesi, ka ngide luuchik, ta ngaberu kech, kidokokis naurukuk na irito ngangolei na ainakini kesi Parao kiwokuneta Yakobo.

⁶Taramasi tani ngibaren kech ka alemar ngiboro daang lu aanyunete kesi anakwap a Kanaan, toloto Misiri. Toriko Yakobo ngalesea keng daang,

⁷ lu araakasi talokookeng, ka ngide a ngide keng, ka tanakookeng, toriko daang Misiri.

⁸Ngalesea a Yakobo na erukorete ka ngesi Misiri, kesi Reuben lo arai lokookeng loapolon,

⁹ka talokookeng a Reuben lu anyaritae Anok, ka Palu, ka Esiron, ta Karimi.

¹⁰Simeon ka talokookeng lu anyaritae Yemuel, ka Yamin, ka Oadi, ka Yakin, ka Soaar, ta Chaul lo edouni aberu a akwap a Kanaan.

¹¹Lawi ka talokookeng lu anyaritae Gerichon, ka Koas, ta Merari.

¹²Yuda ka talokookeng lu anyaritae Eri, ka Onan, ka Chela, ka Peres, ta Sera. (Nakaneni totoaka Eri ka Onan anakwap a Kanaan.) Talokookeng a Peres kesi Esiron ka Amul.

¹³Isakar ka talokookeng lu anyaritae Tola, ka Pupa, ka Yachub, ta Chimuron.

¹⁴Sebulun ka talokookeng lu anyaritae Sered, ka Elon, ta Yaaleel.

¹⁵Eraakasi ngulu talokookeng a Yakobo ka Dina na arai nakookeng. Edouni Lea kesi na alomitere Mesopotamia. Talokookeng, ka tanakookeng, ta ngide a ngide keng, araakasi ngitunga ngitomwon-uni ka nguuni.

¹⁶Gad ka talokookeng lu anyaritae Sipion, ka Agi, ka Chuni, ka Esibon, ka Eri, ka Arod, ta Areli.

¹⁷Acher ka talokookeng lu anyaritae Imuna, ka Ichipa, ka Ichipi, ka Beria, ta nakaatokech na anyaritae Sera. Beria ka talokookeng lu anyaritae Eberi ka Malikiel.

¹⁸Eraakasi lutomon ka ngikan-kapei lugu talokookeng a Yakobo lu edouni Silipa na arai akasuban etich a Lea na ainakini ngesi apakeng lo anyaritae Laban.

¹⁹Kidou Rael talokookeng a Yakobo ngiarei lu anyaritae Yosep ka Benjamen.

²⁰Ani alo Misiri, kidou Asenas na arai nakookeng a Potipera alo arai emuron a akuj anasubuna a ere alo anyaritae Eliopolis, kidou talokookeng a Yosep ngiarei lu anyaritae Manase ka Epiraim.

²¹Talokookeng a Benjamen kesi Bela, ka Beker, ka Achibel, ka Gera, ka Naaman, ka Eei, ka Roch, ka Mupim, ka Upim, ta Arid.

²² Eraakasi ngitunga lutomon ka nguomwon lugu talokookeng a Yakobo lu edouni Rael.

²³Dan ka lokookeng lo anyaritae Uchim.

²⁴Naputal ka talokookeng lu anyaritae Yaaseel, ka Guni, ka Yeser, ta Chilem.

²⁵Eraakasi lukan-kaarei lugu talokookeng a Yakobo lu edouni Bilia, akasuban etich na ainakini Laban Rael.

²⁶Ekimar a talokookeng a Yakobo kadaang alu erukorete ka ngesi Misiri, emam itwaan imarit ngaberu a talokookeng, araakasi ngitunga ngitomwon-kapei ka ngikan-kapei.

²⁷ Aurit Yosep ngide lusapa ngiarei alo Misiri. Nakaneni araakasi ngitunga daang a awi a Yakobo lu alomarete Misiri ngitomwon-kaarei.

²⁸Tomea Yakobo Yuda kingarenik ni ayei Yosep esaki atamar eriamun ka ngesi Gochen, sodi tananga kesi ni anyaritae Gochen.

²⁹Tosubak Yosep aurukuk keng na irit angole, tolot akisiriamiar apakeng Yakobo alo Gochen. Ani enangi ngesi ni ayei apakeng, kilogak ngesi ngakan keng lomosiring a apakeng, kikalou nikooyen kotere alakara.

³⁰Tolimok Yakobo Yosep tama, “Tani katoana tokona, emam ngakiro kainyo engolik ayong ereet kon nabo ayen atamar eringa iyong iyari!”

³¹Tolimok Yosep talokaatokeng ka ngitunga a awi a apakeng daang tama, “Alosi ayong atolimok Parao atamar apot talokaatokang ka ngitunga daang a awi a apakang lukolong alomito Kanaan, apot ni ayei ayong.

³²Alimokini ayong ngesi atamar iraakasi esi ngikeyokok a ngibaren, nabo ipot esi emeto ngamesekin, ka ngaatuk, ta ngibaren kus daang.

³³Ani kinyarau esi Parao kingit tama, ‘Nyonite etich kus?’

³⁴Tolimokisi tamasi, ‘Ekapolon, kirai sua ngikasubak etich kon ngikeyokok ngibaren napei kolong a ekiditeu tanang akolongit naga, kainyo arai kolong etich a taapaakosi ngolo.’ Ani kilimut esi kongina, kimiekinio esi toloma ni enyaritae Gochen.” Alimuni Yosep kongina kainyo akadakinito ngitunga a Misiri ngikeyokok.