Read turkana Akisiakinet 47 Bible Online

Akisiakinet 47 - turkana bible

Akisiakinet 47

¹Sodi tolot Yosep nia Parao tolimok tama, “Apot apakang ka talokaatokang anakwap a Kanaan emeto ngamesekin, ka ngaatuk, ta ngibaren kech daang. Eyakasi tokona ama Gochen.”

²Toriko ngesi talokaatokeng ngikan nia Parao.

³Kingit Parao kesi tama, “Nyonite etich kus?” Tatachakis kesi ngesi tamasi, “Ekapolon, kirai sua ngikasubak etich kon ngikeyokok loger lokolong a taapaakosi.”

⁴Ani erumor tolimokis Parao tamasi, “Kiponit sua ngikasubak etich kon akilom nakwap naga kirai ngipeyok, kainyo erono akoro noi anakwap a Kanaan nabo emam nginyia edakasi ngibaren kosi. Kotere nguna ekapolon, kimaimai sua iyong kibala kimiek sua atoloma lowae loa Gochen.”

⁵Tolimok Parao Yosep tama, “Apot apakon ka talokaatokon ni iyei iyong.

⁶Erai akwap a Misiri akon, nak apakon ka talokaatokon ewae loajokon noi toloma. Epedorete akilom lowae loa Gochen, ani keyakasi kesi lu iyokoko, toseu toliworos kesi iyokiyete ngibaren kang.”

⁷Ani erumor, toriku Yosep apakeng Yakobo aanyun ka Parao. Topia Yakobo Parao.

⁸Kingit Parao Yakobo tama, “Eraakasi ngikaru kon ngiai?”

⁹Tatachak Yakobo Parao tama, “Eraakasi ngikaru kang lu elator ayong amiat apei ka ngitomwon-uni. Eraakasi ngikaru ngulu ngidikidio lu elalak ngichan, nyikote ngikaru lukaalak elatotor taapaakang.”

¹⁰Topia Yakobo Parao, sodi torotok.

¹¹Sodi Yosep nak apakeng ka talokaatokeng ewae loa ere a Rameses lo ejok noi anakwap a Misiri, toliwor ni elomete. Toloma kesi neni loger lo adungunitor Parao.

¹²Toliwor Yosep itani apakeng ka talokaatokeng, ta ngitunga a awi a apakeng daang, imarunitae tani niichi.

¹³Toroner eron a akoro noi tongop akimuj awadaang. Kikar ngitunga a akwap a Misiri ka lua akwap a Kanaan ani anyamitor akoro.

¹⁴Kidiaunu Yosep ngaropiyae daang a ngitunga a Misiri ka Kanaan na agieleta ngitunga akimuj, yaa kai a Parao alo arai ekapolon.

¹⁵Ani edaunosi ngaropiyae a ngitunga kadaang a ngakwapea a Misiri ka Kanaan, pot Ngimisiri daang nia Yosep tolimokis tamasi, “Nakinae akimuj! Kikokini sua kiari akoro kitee iyong ai? Kingolik a, adaun tokona ngaropiyae kosi daang!”

¹⁶Tolimok Yosep kesi tama, “Ani kedauna ngaropiyae kus, nakinae ayong ngibaren kus kainak ayong esi akimuj.”

¹⁷Sodi inut kesi Yosep ngibaren kech daang lu eraakasi ngangolei, ka ngaatuk, ka ngamesekin, ka ngaanei, ka ngisikiria, nak ngesi kesi akimuj. Ekaru ngolo, kitan a akimuj ana elokonyio a ngibaren kech.

¹⁸Ani ekaru lo atupit ngolo, pot nabo kesi ni ayei ngesi tolimokis tamasi, “Ekapolon, nyikimunoni sua iyong atamar adaunosi ngaropiyae kosi daang nabo aliworosi ngibaren kosi ngikon. Tokona bocha ekapolon, emam ibore iche idongit nikiinakini sua ngikasubak etich kon iyong, mati ngawat kosi ka ngamanat kosi.

¹⁹Nyikimiek sua kitoaki sodi kinyasun ngamanat kosi itee iyong. Togielae sua ka ngamanat kosi atoliworos ngikedalak a Parao, sodi kiinak iyong sua akimuj. Nakinae akimuj nakiyarea, sodi nyiidong akwap iboi pas.”

²⁰Togiel Yosep ngalup daang a Misiri toliwor aka Parao. Togiela itwaan daang a akwap a Misiri amana keng kotere eron a akoro. Toliwor akwap daang aka Parao.

²¹Kitiliwo Yosep ngitunga ngikedalak, napei alowae a epei a Misiri tanang lowae loche.

²²Ngalup na nyegiela Yosep kesi na a ngimurok. Nyegielara kesi ngalup kech kainyo etanio kesi a ngakiria ana ainanakini Parao kesi.

²³Tolimok Yosep ngitunga tama, “Kagiel tokona ayong esi daang ka ngamanat kus toliworos ngika Parao. Kiinakinio esi ngikinyam kitakis namanat kus.

²⁴Ani ilemete esi ngamanat, iinakinete esi Parao alemunet apei ani eyakasi nakan. Ani ngalemet naomwon idongete, eliworosi ngikinyam kus ka akimuj kus, ta na a ngitunga a ngawiyei kus.”

²⁵Tatachakis ngesi tamasi, “Ekapolon, kiyuu iyong sua! Kibuakinit iyong alakara ani kichamunea sua, kiliwor sua ngikasubak etich a Parao.”

²⁶Sodi kiwaak Yosep etal nakwap a Misiri toliwor elemuununi itwaan daang alemunet apei ani eyakasi nakan a ngalemet keng nak Parao. Iwapitae etal ngolo tani tokona. Ngalup na ngimurok make nyerauna ngaka Parao.

²⁷Tolom Yakobo nakwap a Misiri lowae a Gochen. Na ayakatar inaa, tabara ngibaren lukaalak. Toureta kesi ngide talalaketa noi.

²⁸Tolom Yakobo nakwap a Misiri a ngikaru a ngitomon ka ngikan-kaarei.

²⁹Ani eapuunete ngirwa lu etoanea ngesi, tanyara lokookeng Yosep tolimok tama, “Ani kichamunit iyong ngakiro kang, tongichak akan kon kiding ngakalokidingo[90] kang sodi kikong atamar kisubea ayong ngakiro na etenooko. Nyikinukak ayong Misiri,

³⁰ nakaneni tonukakinae ni eperioto taapaakang. Kiwokoe ayong alo Misiri kitonukak ni enukakinitae kesi.” Tatachak Yosep ngesi tama, “Asubakini ayong nguna loger lo ibalar iyong.”

³¹Tolim Yakobo tama, “Kikong!” Kikong Yosep. Sodi kijuuru Yakobo anakou a ekitanda keng elakara.