Read turkana Akisiakinet 48 Bible Online

Akisiakinet 48 - turkana bible

Akisiakinet 48

¹Ani ekisidi kanguna, tolimokinae Yosep atamar edeak apakeng. Abu ngesi toriko talokookeng luarei lu anyaritae Manase ka Epiraim toloto ni ayei apakeng.

²Ani elimokinio Yakobo atamar abu lokookeng Yosep aanyun ngesi, kitingak akwaan anyoun, kiboikin lokitanda keng.

³Tolimok Yakobo Yosep tama, “Akuj Naationon, abuni kolong nikang ayei ni enyaritae Lus anakwap a Kanaan, katopia ngesi ayong

⁴ebala, ‘Kingolik a, kainakini ayong iyong ngalesea nakaalak. Epote ngibukui lukaalak anikon, nakaneni ainakini ayong ngalesea kon akwap naga toliwor kesi irumete jik.’

⁵Talokookon luarei lukolong iuriuni iyong kane alo Misiri eringa ayong nyebuno, eraakasi talokookang, eraakasi Epiraim ka Manase ngikang loger a Reuben ka Simeon.

⁶Ani ngulu iuriuni iyong ekisidi, eraakasi ngikon. Etupete ngulu Epiraim ka Manase anibore ani irumete.

⁷ Asubi ayong nguna kotere itiokon. Ariangakin ayong na atoanea ngesi anakwap a Kanaan, alo diyete Epirasa, na abongunitor ayong alo Mesopotamia. Atonukak ayong lokwaas a erot alo etenere Epirasa.” (Enyaritae Epirasa tokona Betleem.)

⁸Na aanyungarea Yakobo talokookeng a Yosep kingis tama, “Tangae lugu?”

⁹Tatachak Yosep apakeng tama, “Eraakasi lugu talokookang lu kainakini Akuj ayong ayei nege.” Tolim Yakobo tama, “Toriku kare diyete sodi atopia.”

¹⁰Peetee Yakobo akwap lokojokon ani amojongitor. Sodi kitaapia Yosep talokookeng diyete apakeng, sodi tonuak apakeng kesi.

¹¹Ani erumor tolimok Yakobo Yosep tama, “Pekolong etamit ayong atamar aanyungari ereet kon, nakaneni ketaanyu ayong Akuj tani ngide kon!”

¹²Sodi tolema Yosep talokookeng anakungin a apakeng, ani erumor toriedik tatap ereet ngalup.

¹³Toriko Yosep talokookeng luarei, Epiraim lo arikit ngesi a akan ana aloteten, kisibak anakan ana alokiedieny a apakeng. Kisiyotoo ngesi kesi diyete apakeng.

¹⁴Nakaneni tolunyak Yakobo ngakan keng, kidokok akan na aloteten nakou a Epiraim alo arai echichi, ani akan keng na alokiedieny kidokok nakou a Manase alo epolot.

¹⁵Sodi topia ngesi Yosep[91] tama, “Kimiekisi Akuj nakolong ewapito taapaakang, Aburaam ka Isaka ngakiro keng, Akuj na erai ngesi keyoki ayong tanang tokona,

¹⁶ka emalaikat lo kayuuni ayong anaaronok kadaang, topia ngide lugu! Ekiro kang ka ngirora kata apaakang Aburaam ka Isaka, toliworos elimitoe kotere ngide lugu sodi talalaketa kesi noi anakwap.”

¹⁷Ani ingolikini Yosep atamar edokok apakeng akan keng na aloteten nakou a Epiraim, nyeejoikis ngesi ngakiro nguna. Sodi toting ngesi akan esaki alemun anakou a Epiraim kiwaak nakou a Manase.

¹⁸Tolimok ngesi apakeng tama, “Nyikote neni apa! Logo ngesi epol. Kidokok kare akan kon na aloteten nakou keng.”

¹⁹Nakaneni towou apakeng tolimok tama, “Ayeni, ayeni ayong lokookang. Eliworosi ngalesea a Manase daang ebukut lo epol, nabo eliwor lo eyenikinitae. Tani kikoni neni, eliwor lokaatokeng loochi lo epol noi akidwang ngesi, nabo eliworosi ngalesea keng ngibukui lukaalak.”

²⁰ Sodi topia Yakobo kesi akolongit ngina ebala, “Ngirora kus kesi epianareta Ngisirael ngitunga ebalasi, ‘Kisikok Akuj esi Epiraim ka Manase.’ ” Aloger kangolo, kitiliwo Yakobo Epiraim epol ani a Manase.

²¹Tolimok Yakobo Yosep tama, “Itee tokona iyong dang atamar edikino ayong atoani, nakaneni irukete esi ka Akuj, sodi kitobua ngesi esi nakwap a taapaakus.

²²Eyakasi nguna daang, kainak ayong iyong, meere talokaatokon, ewae lo enyaritae Chekem. Erai neni akwap na eyakasi ngalup naketurupak ngikinyam. Ademuni kolong ayong Ngiamor ewae ngolo a ekileng ka akau kang.”