Read turkana Akisiakinet 49 Bible Online

Akisiakinet 49 - turkana bible

Akisiakinet 49

¹Tanyarau Yakobo talokookeng tolimok tama, “Tochunakinos wapei katolimok ngakiro na esubakinosi anikus ngirwa lu isidiuno.

²“Tochunakinos kiirasi, esi talokookeng a Yakobo. Topupokisi ngakiro kang, ayong Yakobo, lo arai apakus.

³“Reuben, lokookang loapolon, irai iyong agogongu kang, nabo irai ikoku ni ekingaren a ekileenu kang, iwogana iyong nabo igogong noi akidwang talokaatokon daang.

⁴Ikoni iyong akaale na emam kona iratakinio. Nakaneni nyiliwor iyong lo kiyenikinitae noi, kainyo iperete iyong ka aberu kang, na arai apese a ngabwes, sodi kinyasu ekitanda a apakon.

⁵“Eraakasi Simeon ka Lawi ngikaitotoi. Elemunete kesi ngiboro kech a ejie sodi tosubeta naaronok.

⁶Nyewapi ayong ngakiro na etukosi kesi imunonito. Kori nyalosi ayong lokiriam kech. Kainyo aarete kesi ngitunga engoito. Kingwala ngimongin kotere amera.

⁷Kilamae angoit kech kainyo erono noi. Kilamae anyunyura kech kainyo emoitana noi. Ealari ayong kesi anakwap a Yakobo. Apetakini ayong kesi nakwap a Isirael.

⁸“Yuda, kipuruunete iyong talokaatokon, itingi iyong ngimoe kon ngimosiringan. Eriedikete talokaatokon alongaren kon.

⁹ Ikoni Yuda itaok a engatuny, ni ebongori naburibur na irumunea ibore ninyamat. Ekudokin ngesi loger a engatuny sodi kinapakin kwap. Loger a angatuny anaberu, ngae epedori akiteriangakin?

¹⁰Yuda iliwor iyong ekapolon jiik. Eliworosi ngalesea kon ngikapolok jik. Eyaunete ngibukui lu nyerai Ngiyaudi, ngaropiyae a echur nikon jiik. Toriediko alongaren kon idodiunito arimatoi.

¹¹Einikini ngesi esikiria keng lokitoe enyaritae emusabib. Ani itasikiria keng toinik lomusabib lo ejok noi. Ilotanari ngesi ngiworui keng a emuna alo epuritoe, alo arengan puu.

¹²Ereng ngakonyen keng puu, ani emasea emuna lo epuritoe. Ekwangak ngikel keng kea, ani emasea ngakile.

¹³“Elomi Sebulun lokwaas a anam. Eliwor neni edoket a ngatubwae. Enangi ekwaas a akwap keng Sidon.

¹⁴“Ikoni Isakar esikiria lokaagongon, lo eperi alokiding ngasaaja keng.

¹⁵Engolikini ngesi atamar ejok ni eangarea, nabo kingolik atamar ejok akwap. Totiyak ngesi egur keng kwap esaki akiwok eegos. Kitusubae ngesi etich loger a ekedalan.

¹⁶“Eliwor Dan ekatubon ngakiro a ngitunga keng, erai ekitela epei a Ngisirael.

¹⁷Ikokini Dan emun alorot, emun a akisierit alokwaas a erot, lo ekonyi ngitobolae a angole, sodi tachakun ekamean angole kwap kidedear.

¹⁸“Edarit ayong ayuuno kon Ekapolon Akuj.

¹⁹“Eremi ajore a ngirukooi Gad, nakaneni itiji ngesi kesi kirita.

²⁰“Ekoniunete ngalup a Acher akimuj nakaalan. Ekoniuni akimuj na itemokin ekapolon.

²¹“Ikoni Naputal agete na alachakin, Eurinuni ngesi ngitak luajokak.[92]

²²“Ikoni Yosep ekitoe lo ekoneene, ekitoe lo eyei lokwaas a angolol, enangito ngaten keng lokipetet a angolol.

²³Agumete ngirukooi lokojokon a ngimalea a amod. Toguma kesi ngesi kisibuusikis.

²⁴Nakaneni eringa akau keng eyari, itogogongio ngakan keng, a agogongu a Akuj a Yakobo Namerikanyer, a ekiro a ekeyokon, Ataaba a Ngisirael.

²⁵Akuj a apakon ngesi kingarakini iyong, Akuj Naationon kipiari iyong, a apiaro a akiru ana ebunit anadis, ka ngakipi na eponito alokwap ngalup, ka apiaro a ngaatuk anakaalak, ta ngide.

²⁶Apiaro a apakon egogong noi, akidwang apiaro a ngimoru alu a kanuan ta ajokis a ngimoru alukajik. Min apiaro ngina nia Yosep, loreet alo kolong atiakasi ka talokaatokeng.

²⁷“Ikoni Benjamen epeot lokaadengan. Enyami ngesi nataparach ibore ni earit, ani ebong totiakatiaka ibore ni aari.”

²⁸Eraakasi lugu daang ngitela lutomon ka ngiarei a Ngisirael. Eraakasi ngakiro nguna na alimokini kesi apakech na apiarea ipei kech daang a apiaro ana itemokino ngesi.

²⁹Sodi kichikichik Yakobo talokookeng tama, “Edikino tokona ayong atoani atolot emorikin ka ngitunga kang alokatoak. Echamit esi kinukete ayong aapei ka taapaakang anaburibur ana eyei mana a Epiron alo erai Eitit.

³⁰Enyaritae aburibur ngina Makipela, na eyei kide a Mamure, nakwap a Kanaan. Agieli Aburaam amana ngina ka aburibur ani eyei Epiron, toliwor ni enukanakinio ngikatoak.

³¹Neni kolong anukakinio Aburaam ka aberu keng Sara. Neni kolong anukakinio Isaka ka aberu keng Rebeka. Erai nabo neni kolong anukakini ayong Lea.

³²Amana ka aburibur na eyei neni, agielunio ani a Ngiiti.”

³³ Ani erumori Yakobo akichikichik talokookeng, tokudok ngakejen keng alokitanda, kirogak totoan.