Read turkana Akisiakinet 50 Bible Online

Akisiakinet 50 - turkana bible

Akisiakinet 50

¹Tadakakin Yosep kidiama akwaan a apakeng tonuak.

²Ani erumor, todungok ngesi ngimurok atamar kiwasakis akwaan a apakeng ekitoe lo nyitobosi, kikokis ngulu neni.

³Araakasi ngirwa ngitomwon-omwon erikanari ekitoe ngolo anakwaan a itwaan. Kigoro Ngimisiri kotere akitu a Yakobo a ngirwa a ngitomwon-kaarei.

⁴Ani adaunet a ngirwa alu egorore, tolimok Yosep ngitunga a awi a Parao tama, “Ani kijoikinito esi ngakiro kang, kisuruorikinae kare Parao tolimokis atamar kesikongi kolong ayong apakang ebala,

⁵ ‘Edikino ayong atoani. Echamit iyong kinukakini ayong naliel nakolong aboki ayong anakwap a Kanaan. Kemaimai tokona iyong asaki atamar kitachamak atolot atonuk apakang, ani erumor atobongu.’ ”

⁶Tatachak Parao ngesi tama, “Kape tonuk apakon loger lokolong kisikongio iyong.”

⁷Sodi tolot Yosep akinuk apakeng. Kirukosi ngesi ka ngikapolok luche daang a Parao, ka ngikasukou a atuk a Parao, ta ngikasukou daang a Misiri.

⁸Kirukosi Yosep tani ka ngitunga a awi keng daang, ka ngikaitotoi keng, ta ngitunga a awi a apakeng daang. Ngide make ka ngamesekin, ka ngaanei, ta ngaatuk kesi edongete ni enyaritae Gochen.

⁹Kirukosi ngesi ka ngaurukukui na irito ngangolei, ka ngangolei, ta ngikameak ngangolei. Alal alotoru ngina lokojokon.

¹⁰Ani enangete kesi naro na enyaritae Atad na erai adaet ngalemet, na ayei kide angolol Yorudan, kigoro lokojokon tosutonokis. Topunya Yosep apakeng a ngirwa a ngikan-kaarei.

¹¹Ani eanyungarete ngitunga a akwap kangina lu eraakasi Ngikanaan akigoro ka asutonokin na egorore anaro ana enyaritae Atad ana edayere ngalemet, tamasi, “Etiono asutonokin na igorotor Ngimisiri naga!” Sodi tolimokinae neni ekiro be Abel Misiraim,[93] eyei neni ekwakaye a angolol a Yorudan.

¹²Sodi tosubeta talokookeng a Yakobo apakech ngakiro na adungokinit ngesi kesi.

¹³Apot kesi kiwokosi ngesi tanang nakwap a Kanaan sodi tonukakis naburibur a Makipela, na ayei kide Mamure. Tonukakinae ngesi mana nakolong agieluni Aburaam ani Eyei Epiron, lo erai Eitit, toliwor ni enukanakinio ngikatoak.

¹⁴ Ani kenuk ngesi apakeng kerumor, tobongosi Yosep ka talokaatokeng, ta ngitunga daang lu erukoritotor akinuk apakeng. Tobongosi kesi daang Misiri.

¹⁵Ani ketoana apakech kerumor, tolimonokinos talokaatokeng a Yosep make tamasi, “Kori robo edikino Yosep kiremokin ngoni sodi tatachak ngakiro naaronok nakolong kisubea ngoni ngesi?”

¹⁶Sodi tomeasi kesi itwaan nia Yosep ebalasi tolimok Yosep tama, “Kolong eringa apayok nyetoana, kidungokini sua tama,

¹⁷‘Tolimokisi Yosep atamar emaimai ayong ngesi asaki torimak talokaatokeng kotere ngakiro naaronok ka akisech nakolong asubeta ngesi, kainyo asubeta kesi ngesi ngakiro naaronok.’ Kimaimai tokona sua iyong atamar torimakinae kare cha sua ngikasubak etich a Akuj a apakon kotere naaronok kolong kisubea iyong.” Kikalou Yosep naeirarea ngakiro nguna.

¹⁸Ani erumor pot talokaatokeng nikeng toriediko tatapa ngireetin ngalup,[94] sodi tamasi, “Kingolik a, kirai sua ngikasubak etich kon.”

¹⁹Nakaneni tolimok Yosep kesi tama, “Nyieam! Esibit esi elunyokin ayong nados a Akuj a?

²⁰Kitukitotor kolong esi ayong ngakiro naaronok, nakaneni kibele Akuj toliworos naajokak, sodi toyareta ngitunga lukaalak loger lo tokona iteeto esi akolongit naga.

²¹Warasi nyikibul. Ketani ayong esi aapei ka ngide kus.” Sodi kisian Yosep kesi niajokon totikok ngitai kech.

²²Torubak Yosep elomit nakwap a Misiri, arukito ngesi ka ngitunga a awi a apakeng daang. Araakasi ngikaru lu ayarea ngesi amiat apei ka ngitomon.

²³Kiboi Yosep taanyunga tani ngide a ngide a Epiraim alo arai lokookeng. Kidounoe tani ngide a Makir alo arai lokookeng a Manase, eringa Yosep eyei.

²⁴Tolimok Yosep talokaatokeng tama, “Edikino tokona ayong atoani. Nakaneni ebuni Akuj ni iyakasi esi kipudo kane kiyaa nakwap nakolong echikakini Aburaam, ka Isaka, ta Yakobo.”

²⁵Ani erumor kisikong Yosep ngitunga keng tama, “Ani ebuni Akuj nikus kitoyuu, tolemasi ngakoyo kang kane kiwoko.”

²⁶ Sodi totoan Yosep eraakasi ngikaru keng amiat ka ngitomon. Kiwasakis kesi akwaan keng ngikito lu nyitobosete, sodi kiwaakis nasaduku eringa eyakasi nakwap a Misiri.