Read turkana Akisiakinet 6 Bible Online

Akisiakinet 6 - turkana bible

Akisiakinet 6

¹Na alalakearotor ngitunga anakwap sodi touriunae ngapesur,

²kingolikis talokookeng a ngakujo[12] atamar eraakasi tanakookeng a ngitunga nakebuseak. Sodi toliworos kesi iusete daang na cha asakete akuut.

³Tolim Ekapolon Akuj tama, “Nyibooyi Etau kang anitwaan nakajik, kainyo etoaneene itwaan. Napei tokona jik, eliworosi ngirwa keng ngikaru amiat apei ka ngitomwon-arei.”

⁴ Ngirwa ngulu ka ekisidi a ngirwa kangulu, ayakasi ngitunga lulangir-kooyak noi nakwap. Araakasi kesi ngide lu auriunete talokookeng a ngakujo[13] na euseta tanakookeng a ngitunga. Araakasi ngitunga ngulu ngikiliok lukolong ekilenikinit, nabo ayenikinitae.

⁵Kingolik Ekapolon Akuj atamar alalaar akisech a itwaan anakwap, nabo erubakinito ngakiro na itami ngesi eroko jik.

⁶Toronik Ekapolon Akuj nikolong asubunea ngesi itwaan anakwap. Sodi kialolong Ekapolon Akuj noi.

⁷Tolim tama, “Amunyari ngitunga lukolong asubuni tongopiyasi anakwap. Amunyari ngitunga ka ngitieng, ka ngiborei lu eliato, ta ngikieny, kainyo karonikis ayong ngakiro nakolong asubunea kesi.”

⁸ Nakaneni tojoik Ekapolon Akuj Noa.

⁹Eraakasi nugu ngalesea a Noa. Arai Noa itwaan ni atenoono eboyor, ni amam ibore asechit ngirwa lu ayarea. Arukito Noa ka Akuj.

¹⁰Touriu Noa ngide lusapa nguuni lu anyaritae Chem, ka Ham, ta Yapes.

¹¹Kinyasun akwap alongaren Akuj, kilelebun ekurikur.

¹² Kingolik Akuj akwap toyen atamar aroner, kainyo arono eboyor a ngitunga kadaang.

¹³Tolimok Akuj Noa tama, “Asaki ayong amunyar ngitunga daang, kainyo eleleba kesi ekurikur nakwap. Enyasuni ayong kesi ka akwap aapei.

¹⁴Tosub atubwa naapolon alokitoe aloajokon. Todukok ngakais tooma natubwa ngina sodi kilalak elaam tooma ka nikalapatan a atubwa.

¹⁵Ikokini iyong isubakini nege, eliwor awoyau na alokwap ngamitae amiat apei ka ngatomwon-uni ka nguuni. Eliwor aurianut ngamitae ngatomwon-arei ka ngaarei. Eliwor awoyau na alokidiama ngamitae ngatomon ka ngauni.

¹⁶Tobur ewae lo alokidiama a atubwa sodi kimiek ngasentimitae ngatomwon-omwon ka ngoomwon anakidingos a ewae alo alokidiama[14] ka ngikwaasea. Todukok ngiwaitin nguuni tooma atubwa, ewae lo alokwap, ka loa alokiding, ta loa alokidiama. Ani erumor, todukok ekidor lokwaas.

¹⁷Kingolik a, ameuni ayong akaale nakwap tomunya ibore ni eyari daang. Etoani ibore daang ni eyei nakwap.

¹⁸Nakaneni eyakasi ngakiro nakichamakin ayong ka iyong. Ilomarete iyong ka aberu kon, ka talokookon, ta ngaberu a talokookon tooma natubwa.

¹⁹Aloborei kadaang alu eyarete, kilomak tooma natubwa, nikile ka niberu, sodi toyareta.

²⁰Kilomak ngikieny ngigelagelae, ka ngitieng ngigelagelae, ta ngiborei lu eliato ngigelagelae natubwa, sodi toyara. Anauk a apei, toliworos ngiarei make elomarete.

²¹Tolema tani ngamuja daang na enyamio sodi kiwaak natubwa, toliworos kesi inyamete esi ka ngiborei ngulu.”

²² Tosubak Noa daang na adungokinit Akuj.