Read turkana Akisiakinet 7 Bible Online

Akisiakinet 7 - turkana bible

Akisiakinet 7

¹Tolimok Ekapolon Akuj Noa tama, “Tolomasi iyong ka ngitunga a awi kon daang natubwa kainyo engolik ayong atamar alotunga alu a ngirwa kalu, iyong irai itwaan ni itenoono.

²Alotieng alu italeunitoe, tolema ngaukia ngakan-kaarei, erai auk apei nikile ka niberu. Sodi tolem auki apei alotieng alu nyitaleunitoe.

³Tolem tani ngaukia ngakan-kaarei a ngikieny a ngigelagelae, nikile ka niberu, sodi toureta kesi torubakis eyakasi nakwap.

⁴Kainyo adaunet a ngirwa a ngikan-kaarei, ameuni ayong akiru nakwap taram a ngirwa a ngitomwon-omwon, akwaar ka apaaran, sodi atomunyarea ayong ngiborei daang lu eyarete lu kolong asubuni ayong.”

⁵Sodi tosubak Noa daang na adungokinit Akuj.

⁶Araakasi ngikaru a Noa ngamiae ngakan-kapei na abunio akaale nakwap.

⁷Toloma Noa natubwa kirukosi ka aberu keng, ka talokookeng, ta ngaberu a talokookeng, sodi toyuunotor anakaale.

⁸Tani ngitieng lu italeunitoe, ka lu nyitaleunitoe, ka ngikieny, ta daang lu eliato alokwap,

⁹tolomasi tooma natubwa na ayei Noa, a ngiarei-rei, nikile ka niberu, loger lo adungokinitor Akuj Noa.

¹⁰ Ani adaunet a ngirwa a ngikan-kaarei, taram akiru akwap.

¹¹Akolongit na a ngatomon ka ngakan-kaarei, elap loa ngiarei, ngirwa lu araakatar ngikaru a Noa ngamiae ngakan-kapei, toporo ngakipi aloleleae a akwap, nabo tangaaros ngipukei a adis.

¹²Sodi totep akiru akwap a ngirwa a ngitomwon-omwon, akwaar ka apaaran.

¹³Akolongit napei ngina, tolomasi Noa ka aberu keng natubwa naapolon ka talokookech luuni lu anyaritae Chem, ka Ham, ta Yapes, erukito ka ngaberu kech.

¹⁴Tolomasi natubwa aapei ka ngitieng lu alomoding ngigelagelae, ka ngibaren ngigelagelae, ka ngiborei lu eliato ngigelagelae, ka ngiborei lu eporito ngigelagelae, ta ngikieny ngigelagelae.

¹⁵Toloma Noa natubwa, tolomasi tani ngiborei daang lu eyarete, eraakasi ngiarei-rei.

¹⁶Toloma ibore daang natubwa, nikile ka niberu, loger lo adungokinitor Akuj Noa. Sodi togolok Ekapolon Akuj ngesi tooma.

¹⁷Min akaale ngina nakwap a ngirwa a ngitomwon-omwon. Kiatakinos ngakipi kilebulebuun atubwa ngina, kikear kidiama noi anakwap.

¹⁸Kiatakinos ngakipi talalaketa noi alokidiama akwap, sodi kilebileb atubwa alokidiama ngakipi.

¹⁹Talalaketa ngakipi noi toburuchiasi ngimoru daang anakwap.

²⁰Kikearos ngakipi ngamitae ngakan-kaarei alokidiama ngimoru.

²¹Totoan ibore daang nipalem ilat anakwap. Totoaka ngikieny, ka ngibaren, ka ngitieng a moding, ka ibore daang ni eliat alokwap, ta ngitunga.

²²Totoan ibore daang ni ianga a ngikumes anakwap.

²³Tomunya Ekapolon Akuj ibore daang ni eyari anakwap. Tomunya ngitunga ka ngibaren, ka ngiborei lu eliato, ta ngikieny, anakwap. Kidong Noa bon ka ngulu arukito ka ngesi anatubwa anaapolon.

²⁴Toburuchiasi ngakipi akwap a ngirwa a amiat a apei ka ngitomwon-kan.