Read turkana Akisiakinet 8 Bible Online

Akisiakinet 8 - turkana bible

Akisiakinet 8

¹Nakaneni nyimuriakina Akuj Noa, ka ngiborei, ta ngibaren daang lu ayakasi natubwa naapolon. Kitukut Akuj ekuwam anakwap, sodi kijuwasi ngakipi.

²Togoloi ngileleae ka ngipukei a adis, sodi kikwaa akiru.

³Toliworos ngakipi ijiete wadio. Ani adaunet a ngirwa a amiat a apei ka ngitomwon-kan, tadaunos ngakipi.

⁴Ani akolongit na a ngatomon ka ngakan-kaarei, elap loa ngikan-kaarei, towo atubwa naapolon alomoru a Ararat.

⁵Torubakis ngakipi ijiete, ani akolongit na ekingaren a elap alo a ngitomon, tatakanuut ngaitae a ngimoru.

⁶Ani adaunet a ngirwa a ngitomwon-omwon, tangaa Noa epuke a atubwa,

⁷sodi kipudo ekuruk nikalapatan. Toliwor ekuruk eporit irimit akwap tanang na aokioto ngakipi anakwap.

⁸Ani erumor, kipudo ngesi akuuri esaki kingolik kedauna ngakipi anakwap.

⁹Ani kona angopikinea akuuri ni edoe ani aringaakatar ngakipi eburuchiarito akwap, tobongo natubwa. Sodi kirum Noa ngesi kilomak natubwa.

¹⁰Kidaradarak ngesi nabo a ngirwa a ngikan-kaarei, ani erumor kipudo nabo akuuri nikalapatan.

¹¹Ani enangi ebong, tobongu akuuri nikeng ekodit akuyen a ekitoe a akimiet a akituk. Sodi toyen Noa atamar ejiwasi ngakipi anakwap.

¹²Kidaradarak ngesi nabo a ngirwa a ngikan-kaarei, ani erumor kipudo akuuri nikalapatan. Nakaneni nyebonguno akuuri ngina.

¹³Akolongit na ekingaren a elap alo a ekingaren, na arauneta ngikaru a Noa ngamiae ngakan-kapei ka epei, toon akwap. Tolema Noa ibore ni aburit atubwa naapolon, sodi kingolik atamar keono akwap.

¹⁴Toon akwap akolongit na a ngatomwon-arei ka ngakan-kaarei a elap alo a ngiarei.

¹⁵Tolimok Akuj Noa tama,

¹⁶“Topudosi anatubwa, iyong ka aberu kon, ka talokookon, ta ngaberu a talokookon.

¹⁷Topudutu ka ngiborei daang lu eyarete, keraakasi ngikieny kori ngitieng, kori ibore cha daang ni eliat alokwap. Sodi toureta, kilelebun akwap.”

¹⁸Topudo Noa anatubwa kangina, kirukosi ka aberu keng, ka talokookeng, ta ngaberu a talokookeng.

¹⁹Etiengit daang, ka ibore daang ni eliat, ka ikeny daang, ta ibore daang ni elosi alokwap, topudut anatubwa anaapolon a angalooso a ngagelagelae.

²⁰Todukok Noa ekeno a ngakipeyos. Sodi tolem etiengit ka ikeny daang ni italeunitoe, sodi kipeyo alokeno alo ipeyonokinere Akuj.

²¹Ani na enguunio Ekapolon Akuj akukuny ngina, tolimokin ngesi bon tama, “Nyeringa nabo elami akwap kotere itwaan en, kainyo eroko ngakiro na itami itwaan napei eringa edit. Nyeringa tani enyasuni ibore daang ni eyari loger lobeen enyasunea.

²²Ani eringa akwap eyei, epete ngirwa lu itaare, ka lu elemere ngamanat. Emini nikaalimon ka nikamonan, akamu ka akiporo, apaaran ka akwaar.”