Read turkana 2 Samuel 10 Bible Online

2 Samuel 10 - turkana bible

2 Samuel 10

¹Ani ekisidi, totoan Naach lo arai ekapolon a Ngiamon. Sodi toliwor lokookeng Anun ekapolon.

²Tolim ekapolon Daudi tama, “Asaki ayong atosubea Anun naajokak loger lokolong kasubea apakeng Naach ayong naajokak.” Abu Daudi tomea ngitunga akisililing Anun. Ani enangete kesi nakwap nabe Amon,

³apot ngikarikok a Ngiamon tolimokis ekapolon kech tamasi, “Esibit iyong emeunit Daudi ngitunga lugu akisililing iyong ani erimar apakon a? Meere kongina! Emeunit ngesi kesi nege akireb ere sodi kidwangea ngoni!”

⁴Torwakin Anun ngitunga lu ameunit Daudi sodi tabany ngiwaitin epewae a ngajul a ngabokonya kech. Totub ngesi ngiwaitin a ngiworui kech lu erapito ngikalokoi, sodi kimiek kesi toloto.

⁵Kiruma ngitunga ngulu ngileech noi tokuruwo kona ebongorete nawi. Ani iirari Daudi ngakiro na asubakinosi, abu tomea itwaan alimokin kesi ebala, “Tasala mono alo Yeriko toruput ngajul a ngabokonya kus, ani erumor tobongut nawi.”

⁶Ani eyenunete Ngiamon atamar akadakis Daudi ngakiro kech, apot tanyaraut ngasigerea a akwap a Siria ngabunge ngatomwon-arei na apote alo Besireob ka Soba, ka ngabunge ngatomon ka ngaarei na apote alo Tob, tanyaraut tani ekapolon a Maaka lo arukito ka ngasigerea abunget apei.

⁷Ani iirari Daudi ngakiro kech, abu tomea Yoab aapei ka ngasigerea keng daang nakajwok.

⁸Toropuut Ngiamon kibaka alokidor a Raba, alo arai ere loapolon a akwap kech. Ani luche daang, lu araakasi ngitunga a akwap a Siria ka lu apote alo Tob ka Maaka, apot kibaka alowae alo alomoding.

⁹Abu Yoab kingolik atamar ketijikinete ngesi ngimoe keng alowae alo alongaren ka ewae lo alokaku, toseu ngesi ngasigerea nakajwok noi kisibak alowae alo a ngitunga a akwap a Siria.

¹⁰Kitiliwo ngesi lokaatokeng Abichai ekarikon a ngasigerea anache. Kisibak Abichai kesi tokienyikinos ka Ngiamon.

¹¹Tolimok Yoab ngesi tama, “Ani kingolik iyong atamar kedwang ayong ngitunga a akwap a Siria, bu kingarak ayong. Ani kidwanga iyong Ngiamon, abuni ayong kengarak iyong.

¹²Toliwor lo igogong nabo ititiny! Atojwoto lokiliok kotere ngitunga yok ka ngirerea a Akuj yok. Kimiekisi nguna esaki Ekapolon Akuj tosubakin!”

¹³Pot Yoab ka ngitunga keng akitijikin ngimoe kech, nakaneni tamataros ngitunga a akwap a Siria.

¹⁴Ani ingolikinete Ngiamon ngitunga a akwap a Siria ematarosi, tamataros kesi ani ayei Abichai tolomasi lore. Abu Yoab tobongu ani etijio Ngiamon, sodi tobongo Yerusalem.

¹⁵Ani eyenete ngitunga a akwap a Siria atamar edwanga Ngisirael kesi, apot tanyaraut ngasigerea kech daang tochunakis wapei.

¹⁶Tomea ekapolon Adadeser itwaan anyaraun ngitunga a Siria lu ayakasi kide angolol a Eupurate, sodi pot kesi ni anyaritae Elam, erikit ekarikon a ngasigerea anyaritae Chobak. Arai Chobak ekarikon a ngasigerea a ekapolon Adadeser alo a akwap a Soba.

¹⁷Ani iirari Daudi ngakiro nguna, tochunak ngasigerea a Isirael, todoka angolol a Yorudan, tanang Elam ni ebaketa ngitunga a Siria ekienyikinito kesi. Kisiak ejie,

¹⁸Tamatar ajore a Siria ani ayakasi Ngisirael. Taara Daudi ka ngitunga keng ngasigerea a Siria ngamiae ngakan-kaarei na adokito ngaurukukui, ta ngasigerea ngabunge ngatomwon-omwon na ameto ngangolei. Apot kesi towana Chobak lo arai ekarikon a ngasigerea a Siria. Abu Chobak totoan ani ajiere.

¹⁹Ani eyenete ngikapolok lu apolokinit Adadeser atamar edwang Ngisirael kesi, apot kesi kisila ka Ngisirael, topolokis Ngisirael kesi. Apot ngitunga a Siria toema, tapalikis akingaranakin Ngiamon.