Read turkana 2 Samuel 11 Bible Online

2 Samuel 11 - turkana bible

2 Samuel 11

¹ Ani akisiakinet a ekaru, ngirwa lupalem eloseeneto ngikapolok lojie, tomea Daudi Yoab ka ngikapolok luuchik keng, ta ngasigerea a Ngisirael. Apot kesi kidwanga Ngiamon, sodi kirikaut ere a Raba. Nakaneni edongit Daudi Yerusalem.

²Akolongit apei erii akolong, abu Daudi tokienyu, tonyou ani aperio todoka kidiama akai keng. Ani na elator ngesi alokidiama kaina, taanyunga aberu ache ilota. Arai aberu ngina nakebusean noi.

³Abu ngesi tomea itwaan akingitun atamar erai aberu ngina ngae. Tolimok ngesi itwaan ngini tama, “Erai aberu ngina Besicheba nakookeng a Eliam. Erai ngesi aberu a Uria alo erai Eitit.”

⁴Tomea Daudi ngitunga anyaraun ngesi. Apot ngitunga ngulu torikut ngesi nia Daudi, topero Daudi ka Besicheba (Aringa nisek etaleunor ngesi kitoseg ani ayakar lolap ebooyo.) Abu Besicheba tobongo nawi kech.

⁵Ani ekisidi eyeni ngesi atamar apoti, tomea itwaan nia Daudi ebala, “Apoti ayong.”

⁶Abu Daudi tomea itwaan nia Yoab ebala, “Tolimok Uria lo erai Eitit atamar bu ataanyun.” Abu Yoab tolimok Uria atamar tolot nia Daudi.

⁷Ani edoluni Uria, kingit Daudi ngesi kejokak ngakiro daang ani a Yoab ka ngasigerea. Kingit nabo tama, “Ikoni ejie ai?”

⁸Abu Daudi tolimok Uria tama, “Kape nawi kianga wadio.” Tonyou Uria tolot, nakaneni tomea Daudi itwaan nawi a Uria, yaa ibore ni epotori Daudi.

⁹Nakaneni nyeloto Uria nawi keng. Abu ngesi toper lokidor a akai a ekapolon, aapei ka ngasigerea na eyokiyete ekapolon.

¹⁰Ani iirari Daudi atamar nyeloto Uria nawi keng, kingit tama, “Nyo peilosio nawi kon, tarai abongun iyong naga ani ngoon iperorit ngirwa lukaalak?”

¹¹Tatachak Uria tama, “Emam ngasigerea a Isirael ka Yuda kane, eyakasi kesi ka Asaduku a Achamunet lojie. Elomito ekarikon a ngasigerea Yoab ka ngikapolok keng luuchik moding. Ekokini ayong alosi nawi emuj, atamasi, ka akiper ka aberu kang ai? Ekong jik tani iyong ka ayong lu kiyari, nyasubakini ayong ngakiro na ikote nguna!”

¹²Sodi tolim Daudi tama, “Tasal kane akolongit naga, ani moi kalimokini ayong iyong atamar tobongo.” Abu Uria tasal alo Yerusalem akolongit ngina ka akolongit na atupit ngina.

¹³Kipeyou Daudi ngesi nawi keng kisimuj akimuj naka ebong, sodi kitamat ngesi epurot kilewa. Nakaneni akwaar ngina dang, nyeloto Uria nawi keng, pearai abu kinapakin loworu keng lodapal ani apereenete ngasigerea na eyokiyete ekapolon.

¹⁴Ani ataparach a akolongit anache, kigirak Daudi Yoab abarua sodi nak Uria lo ainari Yoab.

¹⁵Egirit ngesi kona, “Kitebeik Uria lowae lo a alongaren lo eriraa ejie, ani erumor kikutokis, sodi kimiekis ngesi taarae.”

¹⁶Ani iriamete ngitunga a Yoab ere, tolimok ngesi Uria atamar tolot ni ariraa ejie.

¹⁷Topudut ngasigerea a ngimoe alu ajioto Ngisirael alore, kitijwoto ngasigerea a Yoab. Apon ngikapolok luuchik a Yoab ngiche taarae alojie. Apon tani Uria taarae.

¹⁸Abu Yoab tomea itwaan akisisakin Daudi ngakiro a ejie.

¹⁹Abu ngesi tolimok itwaan ni amearit tama, “Ani kilimok iyong ekapolon ngakiro a ejie daang kerumor,

²⁰Epedori ngesi alemar kingit iyong tama, ‘Nyo irudarotor esi diyete ere akitojwore kesi? Peiyenete esi atamar epedorete kesi agumun ngimalea a amod anawasea a?

²¹ Nyitamunito esi eger lokolong aarere Abimelek lokookeng a Gideon a? Ani enyaritae Sebes, emasuni aberu ache amoru nakires anawas sodi taara ngesi. Nyo bo irudarotor esi diyete awas?’ Ani kingit iyong ekapolon kongina, tolimok ngesi tama, ‘Aar tani ekapolon kon loochi enyaritae Uria.’ ”

²²Abu itwaan ngini tolot nia Daudi kisisak ngakiro na adungokini ngesi Yoab atamar tolimok.

²³Tolim tama, “Ajwoko ngimoe noi akidwang sua. Apot kesi topudut alore akitojwore sua anikalapatan. Nakaneni kipot sua atobuasi kesi naabor tananga lokidor a ere.

²⁴Apot kesi togumut ngimalea a amod anawasea, sodi taarae ngikapolok kon luuchik ngiche, ekapolon. Aar tani Uria, lo erai ekapolon kon loochi.”

²⁵Tolimok Daudi itwaan ni ameunitae ngini tama, “Kitititiny Yoab tolimok ngesi atamar nyiingolik niaronon, kainyo nyepedorio akiyen atamar ngae etoani alojie. Tolimok ngesi atamar kitijik ngitunga a ere kangolo lokojokon, tolema ere.”

²⁶Ani iirari Besicheba atamar aar lokile keng, abu kigor tosutonok.

²⁷Ani edaunosi ngirwa lua asutonokin, tomea Daudi itwaan alimokin ngesi atamar bu nawi a Daudi. Toliwor Besicheba aberu a Daudi, kidou ikoku nisapat ni arai ika Daudi. Nakaneni nyelakara Ekapolon Akuj kotere ngakiro na abu Daudi tosubak.