Read turkana 2 Samuel 12 Bible Online

2 Samuel 12 - turkana bible

2 Samuel 12

¹Tomea Ekapolon Akuj ekadwaran keng Nasan nia Daudi tolimok tama, “Ayakasi ngitunga ngiarei lu alomito lore epei. Abarit itwaan ipei, tarai niche ekebootonit.

²Ameat itwaan nikabaran ngaatuk nakaalak ka ngamesekin.

³Ani ngolo eboosit, ameat imesek ipei bon nikile ni agieluni. Tochoik ngesi imesek ngini, kitanu anawi ka ngide keng aapei. Atiakanakini ngesi imesek ngini akimuj keng epewae etanea. Etamaseene a ekopo keng, ka akidak anakejen keng. Ekoni imesek ngini nakookeng.

⁴ Akolongit apei, bu epeyonon nawi a ekabaran. Peasaki ekabaran ngolo akiar ibarasit keng tani kipeyounio epeyonon. Nakaneni, abu ngesi kirumia imesek a ekebootonit kangolo taarak epeyonon keng.”

⁵Abu Daudi tongo kotere ngakiro a ekabaran kangolo tolim tama, “Ekong jik tani Ekapolon Akuj na eyari, ejoikinit itwaan ni ekokini neni etoani!

⁶Ani kona asubea ngesi ngakiro na amoitanut nguna, echamit ngesi etachi imesek ngini ngatachet ngoomwon.”

⁷Tolimok Nasan Daudi tama, “Iyong ngesi itwaan ngini. Ngakiro na alimu Ekapolon Akuj na erai Akuj a Isirael kesi nugu, ‘Ketiliwori kolong ayong iyong ekapolon a Ngisirael, katoyuu a nia a Saul.

⁸Kainak ayong iyong apolou keng ka ngaberu keng. Ketiliwori ayong iyong ekapolon a akwap a Isirael ka Yuda. Arai kolong nyitemokino nguna, kainakinit ayong iyong nabo ngainakinet ngaarei.

⁹Nyo tokona iwounea iyong akiwap ngitalio lu kadungokinit ayong iyong? Nyo isubea iyong ngakiro naaronok nugu? Iari iyong Uria alojie. Imiekini iyong Ngiamon earete ngesi, ani erumor tolema iyong aberu keng!

¹⁰Tokona eliwor analesea kon kadaang epete lu etoakete alojie, kainyo iwouni iyong akiwap ngakiro kang ani ilemarea aberu a Uria kitiliwo, akon.

¹¹Kalimokinit ayong iyong ekong dir atamar ketonyoikini ayong iyong itwaan ipei a awi kon kichan iyong. Alemuni ayong ngaberu kon itee iyong ainak itwaan niche. Eperete itwaan ngini ka kesi naparan.

¹² Isubi kolong iyong akisech idait, nakaneni emiekini ayong ngakiro nguna esubakinosi naparan, sodi taanyungareta Ngisirael daang.’ ”

¹³Tolim Daudi tama, “Asechak ayong Ekapolon Akuj.” Tatachak Nasan tama, “Kirimak iyong Ekapolon Akuj, nyitoani.

¹⁴Nakaneni ani kona imenyarea iyong, Ekapolon Akuj ani isubea nguna, etoani ikoku kon.”

¹⁵Abu Nasan tobongo nawi keng. Kitedekak Ekapolon Akuj idia a Daudi ni edouni aberu a Uria.

¹⁶Kilip Daudi Akuj esaki kitangalek idia. Tonger ngesi akimuj, toliwor nakwaare a akolongit kadaang, elomari ngesi namaniyat keng naperot sodi toper alokwap akwaar daang kiiya.

¹⁷Aloseenete ngikasukou a akai keng nikeng esakete akitonyoun ngesi, nakaneni towou ngesi. Awoununi ngesi tani akimuj ka kesi.

¹⁸Ani edaun ngirwa ngikan-kaarei, totoan idia ngini. Toema ngikasubak etich keng alimokin ngesi atamar atoana idia. Tolimut kesi tamasi, “Ani ngoon eringa idia eyari, pekitachanakini Daudi ngoni ngakiro nakisuruorea ngoni ngesi. Kikokini tokona ngoni kilimokini ngesi atamar atoana idia ai? Epedori ngesi awana bon!”

¹⁹Ani ingolikini Daudi kesi ingaingaanakinosi ngakiro, toyen atamar atoana idia. Sodi kingit ngesi kesi tama, “Atoana idia a?” Tatachakis tamasi, “Ee, atoana.”

²⁰Tonyou Daudi kilotar ka akikierar ngitim keng, ani erumor tanap ngiworui ngiche. Abu ngesi tolot akilip alokai a Ekapolon Akuj. Ani ebongori ngesi kai keng, tolimok ngitunga atamar kainakis akimuj. Kirajakin ngesi akimuj napei ainakinere.

²¹Tolimokis ngesi ngikasubak etich keng tamasi, “Anukiro nugu isubi iyong? Ani ngoon eringa idia eyari, igoro iyong kotere ngesi ingerit akimuj. Nakaneni ani napei atoanea ngesi, tonyou iyong sodi kimuj!”

²²Tatachak Daudi tama, “Ee, iteni dir aroneene ayong akimuj sodi egor na aringaakar ngesi eyari. Abala ayong kori kesieni ayong Ekapolon Akuj, kimiek idia toyar.

²³Ani kona tokona atoanea ngesi, nyo tokona nabo aroneeneo ayong akimuj? Apedori ayong akiteyarun idia? Alosi ayong akolongit apei ni eyei ngesi, nakaneni nyebonguni ngesi ni ayei ayong nabo jik.”

²⁴Abu Daudi kisililing Besicheba na arai aberu keng. Topero ngesi ka Besicheba, kidou ikoku nisapat ni alimokini Daudi ekiro be Solomon. Tominak Ekapolon Akuj idia ngini

²⁵sodi todungok ekadwaran a Akuj Nasan atamar tolimok ekiro be Yedidia,[10] ani aminar Ekapolon Akuj ngesi.

²⁶Aringa Yoab erubakinit akitojwore ngitunga a ere a Raba, alo arai ere loapolon a akwap a Amon. Adikino ngesi elemari ere ngolo.

²⁷Tomea ngesi ngitunga nia Daudi akisisare kona, “Arem ayong Raba, alema nipalem ewokeenere ngakipi.

²⁸Tochunak tokona ngasigerea kon nache daang torem ere todema Ngiamon. Nyasaki ayong ademar Ngiamon ere ngolo kepuruun kotere ngakiro nguna.”

²⁹Abu Daudi tochunak ngasigerea keng, tolot torem Raba, kidwang ngitunga a ere kangolo.

³⁰Tolem Daudi ekiraun a egolit anakou a akuj anasubuna a Ngiamon anabe Milikom.[11] Arai apotis a ekiraun kangolo ngakiloi ngatomwon-uni ka ngakan, nabo ayei asir lokiraun ngolo. Tolem Daudi ekiraun ngolo tanap. Tongata ngesi tani ngiboro lukaalak alore.

³¹Sodi tolimok ngitunga a ere kangolo atamar tolemut ngigirigirea, ka ngakutae ta ngaepe. Abu ngesi kitingak kesi akisub ngimataparea. Tosubea ngesi ngitunga a ngirerea kadaang a akwap a Amon ngakiro napei nguna. Apot ngesi ka ngitunga lu arukitotor tobongosi Yerusalem.