Read turkana 2 Samuel 13 Bible Online

2 Samuel 13 - turkana bible

2 Samuel 13

¹Ayei lokookeng a Daudi lobe Abusalom nakaatokeng nakebusean anyaritae Tamar na arai apese. Abu lokookeng a Daudi epei lobe Amunon kisupa apese ngina.

²Tomina ngesi apese ngina noi, kitodeakakis ngakiro nguna, kainyo engolikinit ngesi atamar emam kona kiperi ka ngesi, kona araakar ngesi apese na nyepero ka ekile a ache, eratakinitae ngesi nyiiriamun ka ngikiliok.

³Nakaneni ayei Amunon lopae keng lotikamodeanan be Yonadab. Arai Yonadab lokookeng a lokaatokeng a Daudi alo be Chama.

⁴Tolimok Yonadab Amunon tama, “Irai iyong lokookeng a ekapolon. Nyo isiliyorotor ngirwa daang? Nyo pekilimokinea iyong ayong?” Tatachak Amunon ngesi tama, “Amina ayong noi Tamar na erai nakaatokeng alokaatokang alo be Abusalom.”

⁵Tolimok Yonadab ngesi tama, “Kiyechak atamar ideaka sodi kinapakin lokitanda. Ani ebuni apakon aanyun iyong, kisisak ngesi tama, ‘Tolimok kare nakaatokang Tamar bu kesimuj ayong. Asaki ayong ngesi kidorok akimuj ani eteeo ayong ngesi, ani erumor kesimuj ayong.’ ”

⁶Abu Amunon kiyechak atamar adeaka, tolot kinapakin lokitanda. Tolot ekapolon Daudi aanyun ngesi. Tolimok Amunon ngesi tama, “Kimiek kare Tamar bu kidorok ngakekio ngadi kane ani eteeo ayong ngesi, ani erumor kesimuj ngesi ayong.”

⁷Sodi tomea Daudi itwaan anyarare Tamar alokai a ekapolon, ebala, “Kape kai a Amunon kidorok ngesi akimuj.”

⁸Tolot Tamar inaa torukau Amunon eperi alokitanda. Tolem ngesi ngakiria tomunak, sodi kidorok ngakekio kaneni ani eteeo Amunon ngesi. Ani erumor kitaatan ngesi ngakekio

⁹sodi kiwaak natubwa inaa ngesi esaki tanyam, nakaneni towou ngesi akinyam. Tolim Amunon tama, “Tolimok ngitunga daang toloto.” Apot ngitunga daang torotokis.

¹⁰Abu ngesi tolimok Tamar tama, “Yau ngakekio nege a ekitanda kang sodi kisimuj ayong.” Tolem ngesi ngakekio sodi tolot ni ayei ngesi.

¹¹Ani esaa ainakinere ngesi ngakekio, toruakin ngesi Tamar tama, “Bua atopero!”

¹²Tolim Tamar tama, “Meere kongina. Nyikitingak ayong akisub ngakiro na a ngileech ikote nugu! Eroko ngakiro nguna!

¹³Nyai ni ayaari ayong ngileech lu ikote lugu? Ani eliwor iyong, iliwor iyong nyiingok alo Isirael. Kisuruor kare ekapolon, ayeni ayong atamar kepotori ngesi ayong nikon.”

¹⁴Nakaneni towou ngesi akiirar ngakiro keng. Ani kona agogongio ngesi akidwang Tamar, abu ngesi totikoono Tamar, topero ka ngesi.

¹⁵Sodi Amunon toremokin Tamar noi. Toremokin ngesi Tamar noi akidwang tani eger losek aminar. Tolimok ngesi tama, “Topudo nikalapatan!”

¹⁶Tatachak Tamar ngesi tama, “Meere kongina, erono noi akitwarakin ayong atolot ekoni nege, idwangit tani akisech na tokona isubak iyong!” Nakaneni towou Amunon akiirar ngakiro a Tamar.

¹⁷Tanyarau ngesi ekasuban etich keng tolimok tama, “Kitwarak aberu naga torotok alongaren kang!”

¹⁸Kipudo ekasuban etich Tamar nikalapatan, togolok ekidor. Anapit Tamar eworu lokooyen towoyak ngakan. Anapeenete tanakookeng a ngikapolok loger ngolo ngirwa ngulu.

¹⁹Kiwasak ngesi ekuron nakou keng, tochil eworu keng, sodi torotok igoro, erapit ereet a ngakan.

²⁰Ani eanyungari ngesi Abusalom lo arai lokaatokeng kingit tama, “Kiboliar iyong Amunon a? Nakaatokang, wara kare ngakiro nyiichan etau kon. Erai Amunon lokaatokon, kotere ngakiro nguna nyiilimok itwaan idio ngakiro nugu.” Sodi kiboi Tamar anawi a Abusalom, ialolongi, tosilikinite.

²¹Tongo ekapolon Daudi na eirarea ngakiro nguna asubakinosi.

²²Toremokin Abusalom Amunon noi ani atikoonorea nakaatokeng Tamar, tapalik tani akisiruoreenen.

²³Adaunet a ngikaru a ngiarei, etutubi Abusalom ngitunga ngajul a ngamesekin keng alo Baal Asor, diyete ere a Epiraim. Abu ngesi tanyarau talokookeng a ekapolon daang neni.

²⁴Tolot ngesi nia ekapolon Daudi tolimok tama, “Ekapolon, etutubi ayong ngitunga ngajul a ngamesekin kang. Ipedorete iyong ka ngikapolok kon luuchik aponere losukukuu a?”

²⁵Tatachak ekapolon tama, “Mam, lokookang. Eliwor ibore ngini akichan iyong noi erai kipot sua daang.” Torubak Abusalom ingisit ngesi, nakaneni towou ekapolon achamun, sodi tolimok ngesi atamar torotok kaneni.

²⁶Nakaneni tolimok Abusalom tama, “Kimiek robo lokaatokang Amunon erukosi ka sua.” Kingit ekapolon ngesi tama, “Nyo isakea iyong ngesi bu inaa?”

²⁷Abu Abusalom torubak ingisit ngesi, tanang ni achamunea Daudi atamar toloto Amunon ka talokookeng a Daudi luche daang kirukosi ka Abusalom. Tosubak Abusalom akimuj na etemokino erai aka ekapolon

²⁸sodi tolimok ngikasubak etich keng tama, “Kiteto Amunon taanyungasi esaa lo emerakinor emuna. Ani kalimokini ayong esi abala, ‘Tarama Amunon,’ sodi taara esi ngesi. Warasi nyiieam! Eliworosi ngakiro nguna ayong kapaikinio. Totitinyeketo, warasi nyiitinenikis!”

²⁹Apot ngikasubak etich ngulu kiwapa ngakiro na alimokini Abusalom sodi taara Amunon Todokasi talokookeng a Daudi luche daang losikiria, tamataros.

³⁰Ani eringa kesi nyenanga nawi, tolimokinae Daudi kona, “Aar Abusalom talokookon daang, emam tani epei idongit!”

³¹Tonyou ekapolon tochil ngiworui keng ialolongi, sodi tadakakin nalup. Tochila tani ngikasubak etich lu arukito ka ngesi ngiworui kech.

³²Yonadab lo arai lokookeng a lokaatokeng a Daudi alo be Chama, abu tolim tama, “Ekapolon, nyeara kesi talokookon daang, Amunon bon ngesi atoana. Ipedori iyong akiyen kotere akienyikin Abusalom atama atiakunit ngesi asubakin nguna napei kolong atikoonorea Amunon nakaatokeng nabe Tamar.

³³Kotere ngakiro nguna, nyiinup atamar atoaka talokookon daang. Amunon bon aar.”

³⁴Kebu Abusalom todok tolot. Abu asiger na eyoki ere taanyunga ngitunga lukaalak etiyauna, iwapito erot be Oronaim lo ayei nakook a emoru. Tolot ngesi nia ekapolon kisisak ngakiro a ngitunga kangulu.

³⁵Tolimok Yonadab Daudi tama, “Talokookon kui eponito loger lotete kalimokinitor ayong iyong.”

³⁶ Ani napei arumorea ngesi alimun ngakiro nguna, todolut talokookeng a Daudi ka ngikasubak etich keng.

³⁷Abu Abusalom todok, tolot nia ekapolon a akwap a Gechur, alo anyaritae Talimae lo arai lokookeng a Amiud. Kialolong Daudi nikooyen kotere lokookeng Amunon.

³⁸Sodi todok Abusalom tolot Gechur, kiboi kaina a ngikaru a nguuni.

³⁹Ani edaunos ngirwa lu ealolongio Daudi kotere akitu a Amunon, kimuu ngesi aanyun ka Abusalom.