Read turkana 2 Samuel 14 Bible Online

2 Samuel 14 - turkana bible

2 Samuel 14

¹Ayeni Yoab atamar imuit noi ekapolon Daudi aanyun ka Abusalom.

²Abu Yoab tomea itwaan anyaraun aberu natikooson alomit Tekoa. Ani edoluni aberu ngina, tolimok Yoab tama, “Kiyechak atamar kigoro iyong isutonokini. Tanap ngiworui kon lu igoror isutonokini, nakaneni nyiikiara ngitim. Kiyechak atamar irai aberu na kigor nikooyen kesutonoki.

³Ani erumor tolot nia ekapolon tolimok ngesi ngakiro nakalimokini ayong iyong.” Abu Yoab tolimok ngesi ngakiro na elimuni.

⁴Tolot aberu nia ekapolon, toriedik tatap ereet ngalup idodiunit arima, sodi tama, “Kingarakinae kare ayong, ekapolon!”

⁵Kingit ekapolon ngesi tama, “Nyo isaki iyong?” Tatachu aberu ngina tama, “Ekapolon, arai ayong apuserut. Atoana kolong lokile kang.

⁶Ekapolon, ayakasi kolong ayong talokookang ngiarei. Akolongit apei, tongolopa kesi anaroatin ani amamakar itwaan ni etiaki. Abu epei taar loche.

⁷Tokona ekapolon, kanyoikis ayong ngiyenet kang daang, ebalasi ayong epoto lokookang ainak kesi taara ani aarea ikoku nisapat eyei. Inyasunete kesi ibore nipei ni eringa ayong egieno, sodi tongop ekile kang ikoku nisapat elimitere anakwap.”

⁸Tatachak ekapolon aberu ngina tama, “Tobongo nawi, adunguni ayong atamar tosubakinae ngakiro na isaki iyong.”

⁹Tatachak aberu ngina tama, “Ekapolon daang na isubakini iyong, kipaikinio ayong ka ngitunga a awi kang, emam iyong ka ngitunga a awi kon ibore isechito.”

¹⁰Tatachak ekapolon ngesi tama, “Ani keyei itwaan etamari ‘Ngwe’ toriku nikang, nyepedori ngesi nabo akichan iyong jik.”

¹¹Tatachu aberu tama, “Ekapolon, kilip kare Ekapolon Akuj na erai Akuj kon, sodi eyenet kang lo ejoikinit etachakini akitu a lokookang, nyear lokookang.” Tatachak Daudi tama, “Kechikakinit ayong iyong ani a Ekapolon Akuj ana eyari atamar nyewanio lokookon tani wadiochichi.”

¹²Tolim aberu ngina tama, “Ekapolon, kimiekinae kare ayong atolim ibore ipei bon.” Tatachu Daudi tama, “Tolim.”

¹³Tolimok aberu ngina ngesi tama, “Nyo isechakinea iyong ngitunga a Akuj kona? Iwou iyong akimiekin lokookin tobongu ani kolong adokini. Kotere ngakiro nguna, irira iyong bon kotere ngakiro na tokona ilimuni iyong.

¹⁴Kitoaki ngoni daang kikoni ngoni ngakipi abukokin nalup, na emam itwaan eokuni nabo. Nyiteyaruununi tani Akuj ngikatoak, nakaneni epedori ekapolon asakun erot lo ebuunea itwaan ni adoki.

¹⁵Tokona ekapolon, abunit ayong nikon ani kabenyeta ngitunga atamar isubakini iyong ngakiro nakalimokini ayong iyong.

¹⁶Etamit ayong atamar iirari iyong ngakiro kang sodi kitoyuu ayong ani eyei itwaan ni esaki akiar lokookeng ka ayong, kitomunya anakwap ana kolong ainakini Akuj ngitunga keng.

¹⁷ Abu ayong etam atamar kisiangari iyong ayong a ngakiro ana kichikakini, kainyo ikoni ekapolon emalaikat a Akuj. Ipedori tani dang akitiak nguna ejokak ka na eroko. Kimiek Ekapolon Akuj na erai Akuj kon kiruko ka iyong!”

¹⁸Tatachak ekapolon ngesi tama, “Asaki ayong akingit iyong akiroit, nakaneni ejoikinit iyong kilimokini ayong ngakiro na eraakasi ngaka iteni dir.” Tatachu aberu tama, “Ekapolon, kingitae ayong ibore nicha isaki iyong akingit daang.”

¹⁹Kingit ekapolon Daudi tama, “Meere mono cha dir Yoab kilomakini iyong nakiro nugu a?” Tatachu aberu ngina tama, “Ekapolon, ekong jik tani ibore ni italeunitoe daang, emam kona awouni ayong atachun akiroit na kingisit[12] iyong. Erai dir ekapolon a ngasigerea kon Yoab kalimokini ayong ngakiro na asubakini ka na alimuni.

²⁰Ekokini ngesi neni sodi torikinere eboyor a ngakiro kanu. Ios iyong ekapolon ikoni emalaikat a Akuj nabo iyeni ngakiro daang na esubasi.”

²¹Ani ekisidi, tolimok ekapolon Yoab tama, “Atiaku ayong akisub ngakiro na isaki iyong. Kape toriku esorokit lobe Abusalom tobuu nege.”

²²Tadakakin Yoab nalup alongaren ekapolon Daudi idodiunit arima, sodi tolim tama, “Kipiari iyong Akuj, ekapolon! Ayeni tokona ayong atamar kitalakarito iyong ngakiro kang, ani ichamunea iyong asubakin ngakiro na kelipit ayong iyong.”

²³Abu Yoab tonyou tolot Gechur sodi arikun Abusalom Yerusalem.

²⁴Nakaneni abu ekapolon todung atamar nyiiboikin Abusalom kai a ekapolon Daudi. Tolim ekapolon tama, “Nyasaki ayong akingolikin ngesi.” Abu Abusalom kiboi alokai ana arai akeng a ilope, nakaneni nyebuno ngaren ekapolon.

²⁵Amam itwaan iche alo Isirael ni ayenikinitae kotere akibuseanu keng, akidwang Abusalom. Amam ngesi ni echwangakina napei anakou tanang nakeju.

²⁶Asamuk ngitim a akou keng, atubeene ngesi atubet apei ekaru epei, nacha ewoyakerotor, tasamukuko. Aliwonor apotis a ngitim keng akilo apei, itemio a ekiteme alo itemeeneo ekapolon.

²⁷Ayakasi Abusalom talokookeng nguuni ka nakookeng nakebusean noi anyaritae Tamar.

²⁸Kiboi Abusalom ngikaru ngiarei alo Yerusalem eringa nyeanyuna ekapolon.

²⁹Abu ngesi tomea itwaan anyaraun Yoab. Asaki ngesi Yoab tolot aanyun ekapolon kotere ngakiro keng, nakaneni towou Yoab abunere. Tomea nabo Abusalom itwaan anyaraun Yoab, nakaneni towou nabo Yoab abunere.

³⁰Sodi tolimok Abusalom ngikasubak etich keng tama, “Kingolikisi a, idunyasi amana a Yoab ka nakang, nabo erai erau ekoniunit alomana kangina. Kapesi kichunyakisi akim.” Apot kesi toloto kichunyakis amana akim.

³¹Tolot Yoab nawi a Abusalom kingit ngesi tama, “Nyoni echunyeta ngikasubak etich kon amana kang?”

³²Tatachak Abusalom tama, “Echunyete kainyo ameunit ayong itwaan anyaraun iyong nakaneni towou iyong abunere. Asaki ayong iyong tolot kingit ekapolon ibore nikolong anyounio ayong alo Gechur abu nege. Kejok tani kolong ayong eboikin inaa.” Torubak Abusalom iruoro ebala, “Asaki ayong iyong tasaku erot lo kianyunor ayong ka ekapolon. Ani kasechit ayong, ejoikinit ngesi kaari ayong.”

³³Abu Yoab tolot nia ekapolon Daudi tolimok ngesi ngakiro na alimokini Abusalom. Tomea ekapolon itwaan anyaraun Abusalom. Tolot Abusalom nia Daudi sodi toriedik tojuk ereet ngalup alongaren Daudi. Tonuak ekapolon ngesi.