Read turkana 2 Samuel 15 Bible Online

2 Samuel 15 - turkana bible

2 Samuel 15

¹Ani ekisidi, tolem Abusalom aurukuk, ka ngangolei ta ngikiliok ngitomwon-kan lu eliworosi ingarenete ngesi.

²Anyoununi ngesi nataparach elilim, tolot towo alorot alo a ekidor a ere. Esaa daang lo ebunio itwaan ni eyakasi ngakiro na esaki ekapolon totiak, toliwor enyaraari Abusalom ngesi kingit ni ebunitor. Ani kelimoki itwaan ngesi ekitela keng kerumor,

³tolimok Abusalom ngesi tama, “Kingolik a, iyookino ngakiro nugu alowae kon, nakaneni emam itwaan eyei nege eseunit ekapolon apupokin ekies kon.”

⁴Ani erumor, iatakini Abusalom tama, “Arai bo atarai ayong ekatubon ngakiro dang! Kebu cha itwaan daang nikang, ni eyei ibore epega, kori ekies, sodi atotiakak ayong ngakiro eriyan.”

⁵Ani na eapuunea itwaan nia Abusalom toriedik alongaren keng, kitorwaa Abusalom akan toruakin ngesi, tonuak.

⁶Abu Abusalom tosubeene ngakiro na ikote nguna ani eyakasi Ngisirael daang lu aponeenete nia ekapolon esakete atubokino ngakiro eriyan. Kotere erot ngolo, apot Ngisirael tominakis ngesi.

⁷Adaunet a ngikaru a nguomwon,[13] tolimok Abusalom ekapolon Daudi tama, “Ekapolon, kimiekinae ayong atolot Eburon sodi erichakinea akichikakinet kolong echikakini Ekapolon Akuj.

⁸Kolong na ebooyo ayong alo Gechur anakwap a Siria, abu ayong echikak Ekapolon Akuj atamar ani kabua ayong Yerusalem, elipi ayong ngesi alo Eburon.”

⁹Tolim ekapolon tama, “Kape nikaalimon.” Abu Abusalom tolot Eburon.

¹⁰Nakaneni tomea ngesi ngitunga lotela daang a Ngisirael tolimok tama, “Ani iirarete esi ngaburucho ekutakinio, tachalutu tamasi, ‘Aliwor Abusalom ekapolon alo Eburon!’ ”

¹¹Ayakasi ngitunga ngamiae ngaarei lu anyaraunit Abusalom akirukor ka kesi alo Yerusalem. Peayenete kesi ngakiro na atukit Abusalom akisub aloose kesi elemuu.

¹²Ani na epeyoo Abusalom ngakipeyos, tomea itwaan anyaraun Aisopel lo arai itwaan a ere a Gilo. Arai Aisopel eketutukon a ekapolon Daudi. Abu eger lo atukitere akinger ekapolon kisikokin, talalaketa ngitunga lu ebakito alowae a Abusalom.

¹³Bu itwaan tolimok Daudi tama, “Aminakis Ngisirael Abusalom, ewapakis.”

¹⁴Sodi tolimok Daudi ngikapolok luuchik keng daang ayakasi Yerusalem tama, “Ejoikinit ngoni kirotokini kane atipei erai kisaki ngoni abuchar ani a Abusalom! Tonyoutu atipei! Ani kemam, enanguni ngesi nege atipei kidwang ngoni sodi taar itwaan daang alore!”

¹⁵Tatachut kesi tamasi, “Ee, ekapolon, kisadit sua akisub ibore daang ni ilimuni iyong.”

¹⁶Abu ekapolon torotok, erukito ka ngitunga a awi ka ngikapolok keng luuchik. Kimiek ngesi ngapesur keng a ngabwes ngatomon na asaki kiyoko akai a ekapolon.

¹⁷Ani na arotokinioto ekapolon ka ngitunga keng alore, towaa alokai ana a esal.

¹⁸Towaa[14] ngikapolok keng luuchik daang alo diyete esaa lo etorunioto ngasigerea na eyokiyete ngesi ngaren keng. Tani ngasigerea ngamiae nakan-kapei kolong erukunete ka Daudi alo Gas, apot kitorut neni.

¹⁹Abu Daudi tolimok Itai lo arai ekarikon a ngasigerea kanguna tama, “Nyo isakea iyong akirukor ka sua? Tobongo kiruko ka ekapolon lokitetet. Irai iyong itwaan nia akwap anache, itwaan nikolong idokini anakwap kon.

²⁰Aringa been iyong ilomi nege. Nyo tokona nitibore kemiekinea ayong iyong kirimi ka ayong akwap en? Nyayeni ayong tani ni alosi. Tobongo kirukosi ka ngitunga a akwap kon. Agasi atamar toliwor Ekapolon Akuj loajokon ka lo emunoi anikon.”[15]

²¹Nakaneni tatachak Itai tama, “Ekapolon, ekongi ayong a ekiro a Ekapolon Akuj atamar kirukori ayong ka iyong wadaang nicha ilosi iyong, tani ketamar kaario.”

²²Tatachak Daudi tama, “Itemokino, kape ngaren!” Abu Itai torotokis ka ngasigerea keng ka ngitunga a ngawiyei kech.

²³Kikalout ngitunga iuteete na arotokinioto ngirukitos a Daudi. Todok ekapolon ingolol a Kidiron, kiwapakis ngitunga lu arukitotor, toloto daang lowae lo a ariet.

²⁴Ayei Sadok lo arai emuron a Akuj neni, arukito ka Ngilawi lu adakito asaduku a Akuj na italeunitoe. Tosipokis[16] kesi asaduku kwap, apot nyeelemut tanang na arotokinioto ngitunga daang alore. Abiasar dang lo arai emuron a Akuj, ayei neni.

²⁵Sodi tolimok ekapolon Sadok tama, “Tobua asaduku a Akuj lore. Ani kelakara Akuj kotere ayong, kabuuni ngesi ayong akolongit ache ataanyu ka akingolikin ni iwaakinitae.

²⁶Ani pekitalakarito ngesi ngakiro kang, kimiekisi bocha ngesi katosubea ayong ngakiro na esaki.”

²⁷Abu nabo ekapolon Daudi tolimok Sadok tama, “Kingolik a, toriko lokookon Aimaas ka Yonasan lo erai lokookeng a Abiasar sodi tobongo lore akaalimon.

²⁸Kingolik a, edari ayong ani ichierea angolol anariet, tanang eirari ngakiro anikon.”

²⁹Apot Sadok ka Abiasar tobuasi asaduku a Akuj Yerusalem kiboikinos neni.

³⁰Todok Daudi emoru a ngikito a akimiet igoro. Aturi ngesi nabo kimuk ereet keng idodiunit ibore ngini atamar ialolongi ngesi. Kimuko ngitunga daang lu arukito ka ngesi ngakies kech, kigoros nabo dang.

³¹Ani elimokinio[17] Daudi atamar emorikin Aisopel ka Abusalom kotere akinger ngesi, kilip Daudi tama, “Ekapolon Akuj, kiloch kare ngakiro na itutuki Aisopel Abusalom toliworos ngapasiek!”

³²Ani enangi Daudi kidiama emukura, ni ilipeenere Akuj, abu kiriamun ka lopae keng lo amuno ngesi noi lo anyaritae Uchai lo arai Earakit. Achilichilit Uchia ngiworui keng, nabo ewasakinit ekuron nakou.

³³Tolimok Daudi ngesi tama, “Emam ibore kingarakini iyong ayong erai kiruko ngoni.

³⁴Nakaneni ipedori iyong akingarakin ayong erai kibongo lore sodi tolimok Abusalom atamar isubi tokona iyong etich niajokon loger lokolong isubea etich a apakeng. Kirichakin iyong kitopeg ngakiro daang na elimuni Aisopel.

³⁵Eyakasi ngimurok a Akuj Sadok ka Abiasar inaa, kisisak kesi ngakiro daang na iirari iyong alokai a ekapolon.

³⁶Erukito kesi ka talokookech Aimaas ka Yonasan, imeuni iyong kesi nikang tolimok ngakiro daang na ianyuni iyong.”

³⁷Abu lopae keng a Daudi lo anyaritae Uchai tanangu lore esaa lopei adolunio Abusalom.