Read turkana 2 Samuel 16 Bible Online

2 Samuel 16 - turkana bible

2 Samuel 16

¹Ani iporori Daudi anaita a emukura wadio, kiriamun atipei ka Siba, lo arai ekasuban etich a Mepiboches. Ameat Mepiboches ngisikiria lu ewokito ngamugati ngamiae ngaarei, ka ngarinyo a ngimusabib amiat apei, ka ageor naajokon na arai amiat apei, ta etuo lo eleleba emuna.

² Kingit Ekapolon Daudi ngesi tama, “Nyo iyaunitor iyong ngiboro lugu daang?” Tatachak Siba tama, “Ekapolon, arujunit ayong ngisikiria tometa ngitunga a awi kon. Ayaunit ngamugati ka ageor tanyama ngitunga. Ani emuna, lo emaase ngitunga na eburunea anariet.”

³ Kingit ekapolon ngesi tama, “Nyaali Mepiboches lo erai etatait a ekapolon kon Saul?” Tatachak Siba tama, “Edong Yerusalem kainyo enupit atamar kabuakinete ngesi Ngisirael apolou ka a apaakeng Saul.”

⁴Tolimok ekapolon Siba tama, “Ibore daang ni erai ika Mepiboches, erai ikon.” Tatachak Siba tama, “Arai ayong ekasuban etich kon. Agasi ayong atamar ketalaka iyong ekapolon kang ngirwa daang!”

⁵Ani enangi ekapolon Daudi ni enyaritae Baurim, kisiriamu ngesi eyenet a Saul epei anyaritae Chimei, lo arai lokookeng a Gera. Echieni ngesi Daudi esaa lo esiriamunea.

⁶Kimas ngesi Daudi ka ngikapolok keng luuchik a ngamoru. Kikok ngesi neni esaa lo eriamitotor Daudi ngirukitos keng ka ngasigerea na eyokiyete. Ayakasi kesi lowae lo aloteten ka kedieny a Daudi.

⁷Kimeny Chemei ngesi tama, “Kape ekaaran! Kape erukoot!

⁸Ilemari kolong iyong apolou a Saul, nakaneni kirirae tokona iyong Ekapolon Akuj ani iarea ngitunga ngikaalak a awi a Saul. Ainaki Ekapolon Akuj lokookon Abusalom apolou, inyasun iyong ekaaran!”

⁹Abichal lo anyaritae itiokeng Seruya, tolimok ekapolon Daudi tama, “Ekapolon, nyo imiekinitor iyong iingok en kichieni iyong? Kimiek atolot atotub akou keng!”

¹⁰Tolimok ekapolon Abichai ka lokaatokeng Yoab tama, “Meere ngakiro nugu ngaka akiding kus. Ani kechieni ngesi ayong ani ameunea Ekapolon Akuj, ngae iche epedori alimun atamar nyo ikonea neni.”

¹¹Tolimok Daudi Abichai ka ngikapolok keng luuchik daang tama, “Esaki lokookeng akiar ayong. Nyo tokona ikilaaritotor esi ngakiro a itwaan ani a ekitela a Benjamen kaen? Ekapolon Akuj alimokini kesi atamar kecheon ayong. Nyiikachikis ngakiro keng, kimiekisi kecheon ayong.

¹²Epedori Ekapolon Akuj aanyungar ngichan[18] kang sodi ataanyu ayong apiaro na ilunyokin nakicheno naga.”

¹³Apot Daudi ka ngirukitos keng kiwapakis erot, kiwapak Chimei kesi iwapit akook a emukura. Echieni ngesi kesi, kimasamasae a ngamoru, ka akuruonokin ngalup eloose.

¹⁴Aburunit ekapolon ka ngirukitos keng daang na anangeta Yorudani. Apot kesi kiangasi kaneni.

¹⁵Tolomasi Abusalom ka Ngisirael daang lu arukito ka ngesi Yerusalem. Arukito kesi ka Aisopel.

¹⁶Abu Uchai lo arai lopae keng a Daudi lo amuno ngesi na eriameta ka Abusalom, kirema tama, “Kiboi ekapolon nikooyen! Kiboi ekapolon nikooyen!”

¹⁷Kingit Abusalom Uchai tama, “Ikwa ikoni eger imunor iyong lopae kon nege a? Nyo peirukoreta iyong ka lopae kon Daudi?”

¹⁸Tatachak Uchai tama, “Kekok ayong kirukori ka ngesi ai? Ebakit ayong alowae alo eyei ngolo aseu Ekapolon Akuj, ka ngitunga lugu, ta Ngisirael daang. Kiruki ayong ka iyong.

¹⁹Ngae mono nabo iche ejoikinit ayong asubi etich keng, ikwa meere lokookeng a ekapolon kang a? Asubi ayong tokona etich kon loger lokolong asubea etich a apakon.”

²⁰Sodi torei Abusalom kingit Aisopel kingit tama, “Ani kona tokona kinangunea ngoni nege a, isaki iyong ekokisi ai?”

²¹Tatachak Aisopel tama, “Kape topero ka ngaberu napesur a ngabwes daang nangoon emiekini apakon iyokiyete akai a ekapolon. Sodi toyen itwaan daang alo Isirael atamar eyeni apakon atamar irai iyong emoit keng. Kotere ngakiro nguna elakarosi ngirukitos kon.”

²² Apot kesi kigurosi eam a Abusalom alokidiama akai a ekapolon. Toloma Abusalom neni iteete ngitunga daang topero ka ngapesur a ngabwes a apakeng.

²³Ngakiro cha daang na alimuni Aisopel ngirwa ngulu, anupitae ekote ngakiro naadwarak a Akuj a alope. Ewapito Daudi ka Abusalom ngakiro nguna.