Read turkana 2 Samuel 18 Bible Online

2 Samuel 18 - turkana bible

2 Samuel 18

¹Tochunak ekapolon Daudi ngasigerea keng daang wapei, totiakatiaka kesi pena najoresio na eraakasi apei abunget apei, tarai nache amiat apei. Toseu ngesi ngikarikok a ngajorei kanguna.

²Ani erumor, kitorotok ngesi kesi eraakasi ngajorei ngauni. Ngikarikok a ngajorei kanguna kesi Yoab, ka lokaatokeng Abichai, ta Itai. Arikit ipei kech ajore apei. Sodi tolimok ekapolon Daudi ngasigerea keng tama, “Kirukori ayong elope ka esi.”

³Tatachakis kesi ngesi tamasi, “Nyiibu akirukor ka sua. Kainyo, ani kimatar sua, nyemisikinete ngimoe yok ngakiro nguna. Kori ani ketoaka tani epewae kosi, nyemisikinete ngimoe yok ngakiro nguna. Nakaneni ikwaan iyong ka ngitunga ngabunge ngatomon anikosi. Ejoikinit idongi iyong lore nege sodi tomeunu nikosi ngiboro lu kingarakinor.”

⁴Tatachak ekapolon tama, “Ewapakini ayong ngakiro na ingolikinito esi atamar kesi ejokak.” Sodi towo ngesi alokwaas a ekidor, topudut ngasigerea keng a ngajorei ana ayakasi ngitunga abunget apei ka na ayakasi ngitunga amiat apei.

⁵Todungok ngesi Yoab, ka Abichai, ta Itai tama, “Kotere ayong, nyiiwan esorokit lo be Abusalom ngolo.” Apot ngasigerea daang kiirasi Daudi edungokini ngikapolok keng luuchik kongina.

⁶Apot ngasigerea a Daudi toloto naroatin sodi tojwoto ka Ngisirael anamoni a Epiraim.

⁷Kidwanga ngasigerea a Daudi Ngisirael niaronon noi akolongit ngina. Taarae ngitunga ngabunge ngatomwon-arei.

⁸Topetakin ejie akwap wadaang, sodi totoaka ngitunga lukaalak anamoni akidwang lu atoakete alojie.

⁹Kiriamunos Abusalom ka ngasigerea ngache a Daudi atipei. Adokit Abusalom esikira, ani itori esikira kwap echoke, tongichakin akou a Abusalom naten a ekitoe. Kiporo esikiria sodi kidong Abusalom iyeloyelo.

¹⁰Kingolik epei a ngasigerea a Yoab ngesi tolot alimokin Yoab ebala, “Ekapolon, engolikini ayong Abusalom iyeloyelo alochoke!”

¹¹Tatachak Yoab ngesi tama, “Ani na ianyungarea iyong, nyo peiarea iyong ngesi kaneni? Kainakinit ayong iyong ngaropiyae ngatomon ka aruba.”

¹²Nakaneni tatachak ngesi itwaan ngini tama, “Tani kiinak ayong ngaropiyae abunget apei, pekatapit ayong lokookeng a ekapolon. Kipupi sua daang ekapolon kidungokini iyong, ka Abichai, ta Itai ebala, ‘Kotere ayong, nyiiwan esorokit lobe Abusalom ngolo.’

¹³Arai atama ayong nyewapi ngakiro a ekapolon ataar Abusalom, kiira ekapolon ngakiro nguna. Iiranari ngesi ngakiro daang. Ayeni ayong atamar pekiikinit iyong ayong.”

¹⁴Tolim Yoab tama, “Nyetadauni nabo ayong esaa eche anikon.” Tolem ngesi ngakwaaras ngauni kichumea Abusalom lorarum eringa eyari, iyeloyelo alochoke.

¹⁵Apot ngasigerea ngatomon a Yoab kirudun diyete Abusalom taara jik.

¹⁶Todung Yoab atamar tokutakinae aburuch tojongoto ngitunga ejie. Sodi tobongut ngasigerea keng ani erisitotor Ngisirael.

¹⁷Totiyaut kesi akwaan a Abusalom, tochakakis nadui natikooyen anamoni, ani erumor tosenokis ngamoru. Tamataros Ngisirael daang, tobong itwaan daang nawi keng.

¹⁸Ngirwa lu ayarea Abusalom, abu toduk ibore ni itamunere ngesi nadipo a ekapolon, kainyo amam ngesi ikoku nisapat ayei ni adikino idongi tolimitere ekiro keng. Abu ngesi tolimok ibore nikisitamunet ngini ekiro keng a ilope. Enyaritae tokona ibore nikisitamunet ngini, “Akisitamunet a Abusalom,” tani tokona.

¹⁹Abu Aimaas lo arai lokookeng a Sadok tama, “Kimiek epungar ni ekapolon atolimok ngesi atamar ayuu ngesi Ekapolon Akuj alomoe keng.”

²⁰Tatachak Yoab ngesi tama, “Mam, nyiyaari iyong akolongit naga ngakiro naajokak. Ipedori iyong ayaar akolongit ache, nakaneni meere tokona, kainyo atoana lokookeng a ekapolon.”

²¹Sodi tolimok ngesi ekedalan keng lo a akwap a Kuch*g** tama, “Kape tolimok ekapolon ngakiro na ingolik iyong.” Kijuuru ekedalan ngolo, sodi tamatar.

²²Tolim Aimaas nabo tama, “Nyakachit ayong ngakiro na esubakinosi. Kimiekinae kare ayong dang ayaa ngakiro naajokak.” Kingit Yoab ngesi tama, “Nyoni isakea iyong akikokin neni, lokoku? Emam ebachit kiinakinio iyong.”

²³Tolim Aimaas nabo tama, “Tani keyakasi na esubakinosi, asaki ayong alosit.” Tolimok Yoab tama, “Kape robo.” Abu Aimaas tamatar, kiwapak erot kitor nadipo a Yorudan, sodi kilany ekedalan atipei.

²⁴Ebooyi Daudi anakidingos a ekidor alo alotooma ka lo anikalapatan a ere. Tolot eketeon a ere todoka kidiama awas, sodi towo alokidiama ekidor. Ani ingoliari ngesi, taanyunga itwaan ekeri alopei.

²⁵Kirema eketeon ere sodi kisisak ekapolon. Tolim ekapolon tama, “Ani kerai ngesi bon, eyaunit ngakiro naajokak.” Abu ekakeran ngolo taapuu diye.

²⁶Ani erumor kingolik eketeon a ere itwaan iche ekeri alopei sodi tanyara eketeon ekidor tolimok tama, “Itwaan iche yi ekeri!” Tatachu ekapolon tama, “Eyaunit ngini dang ngakiro naajokak.”

²⁷Tolim eketeon ere tama, “Ekeri itwaan ni ekingaren loger a Aimaas.” Tolim ekapolon tama, “Erai ngesi itwaan niajokon, eyaunit ngakiro naajokak.”

²⁸Abu Aimaas kirema kimala ekapolon, tadakakin nalup alongaren keng, sodi tama, “Ekiro a Ekapolon Akuj ana erai Akuj kon, kipuroe. Ekapolon, kotere ngesi, idwang iyong ngitunga lu ngoon kingerete iyong!”

²⁹Kingit ekapolon tama, “Ani bo esorokit lobe Abusalom, nyaanu ngache anikeng?” Tatachak Aimaas tama, “Ekapolon, nakameunea ayong ekarikon a ngasigerea kon Yoab, abu ayong engolik ekurikur loationon, nakaneni nyayeni ayong atamar kerai eka inyo.”

³⁰Tolim ekapolon tama, “Torei towo kaneni.” Abu ngesi torei towo kaneni.

³¹Sodi todolu ekedalan lo a akwap a Kuch tolimok tama, “Ekapolon, kainunit ayong iyong ngakiro naajokak! Akolongit naga, idwang iyong daang lu kingerito iyong, kotere Ekapolon Akuj!”

³²Kingit ekapolon tama, “Ani bo esorokit lo be Abusalom, nyaanu ngache anikeng?” Tatachak ekedalan tama, “Ekapolon, esibit ayong tosubakinos ngakiro na asubakinosi anikeng alomoe kon kadaang.”

³³Kialolong ekapolon noi. Tolot ngesi todoka kai na ayei diyete ekidor, sodi kikalou. Ani na alosio ngesi, kigor ebala, “Wae, lokookang wae, lokookang Abusalom! Lokookang, arai bo tarai ayong atoanit kidong iyong dang! Lokookang Abusalom!”