Read turkana 2 Samuel 19 Bible Online

2 Samuel 19 - turkana bible

2 Samuel 19

¹Tolimokinae Yoab atamar igoro ekapolon Daudi esutonokini kotere Abusalom.

²Abu alakara na edwangeta kesi Ngisirael kiloch akolongit ngina ani eyakasi ngasigerea a Daudi toliwor akialolong ani eirareta kesi atamar igoro ekapolon lokookeng.

³Tolomasi kesi lore ekiilingat, loger a ngasigerea ana eemete tamataros alojie.

⁴Kimuk ekapolon ereet keng kiute ebala, “Wae, lokookang! Lokookeng Abusalom! Abusalom lo irai lokookang!”

⁵Abu Yoab tolot kai a ekapolon sodi tolimok tama, “Akolongit naga, isurum iyong ngasigerea kon ngileech. Ngasigerea na eraakasi kesi kiyuunete iyong, ka talokookon, ka tanakookon, ka ngaberu kon, ta ngapesur kon a ngabwes.

⁶Iremokino iyong lu kiminasi iyong, tomina lu kiremokino iyong! Idodiu iyong atamar nyikachit ngakiro a ngikapolok kon aluuchik, ta na a ngikasubak etich kon. Engolik tokona ayong atamar, arai atotoaka sua luche daang kidong Abusalom eyari, kilakara iyong.

⁷Tonyou tokona tolot kisuruor ngitunga kon talakaros. Ani pekikok iyong neni ekong jik tani Akuj, emam tani ipei kech iwalakini irukito ka iyong. Eliworosi ngakiro nguna naaronok noi anikon akidwang na ianyu iyong napei kanuan.”

⁸Abu ekapolon tonyou, tolot kiboikin diyete ekidor a ere. Kiirasi ngitunga keng atamar eyei ngesi neni, sodi tochunar kiriama ngesi a ngiwaitin kadaang. Apot Ngisirael kiealaros, tolot itwaan daang nawi keng.

⁹Tolomakis kesi akiburare make alowaitin kadaang a akwap tolimonokin make ebalasi, “Kiyuu ngoni ekapolon Daudi alomoe yok.

¹⁰Kiyuu ngesi ngoni ani eyakasi Ngipilisti, nakaneni erita tokona Abusalom ngesi arotoki anakwap. Kiseuni ngoni Abusalom toliwor ekapolon yok, nakaneni aar tokona ngesi alojie. Nyo tokona peebuunea itwaan idio ekapolon Daudi?”

¹¹Abu ekapolon Daudi kiira ngakiro na eruorosi Ngisirael. Sodi tomea ngesi ngimurok a Akuj lu anyaritae Sadok ka Abiasar akingit ngikarikok a Yuda ebalasi, “Nyo eraakar esi lu esal ipote abuun ekapolon kai keng?

¹²Iraakasi esi ngiyenet kang, lu iraakasi ngakoyo ka ngaakot a akwaan kang. Nyo eraakar esi lu esal kibuunete ayong?”

¹³Tolimok Daudi kesi atamar tolimokis Amasa kona, “Irai iyong eyenet kang napei tokona jik, ketiliwori ayong iyong ekapolon a ngasigerea kilunyokin nados a Yoab. Kimiekisi Akuj kataar ayong erai pekekok neni!”

¹⁴ Apot ngitunga daang a Yuda tachamut ngakiro na alimuni Daudi. Tomeasi kesi itwaan alimokin kesi atamar tobongut ka ngikapolok luuchik keng daang.

¹⁵Ani na Abongunitor Daudi, kiriamun ka ngitunga a Yuda nangolol a Yorudan. Aponito ngitunga ngulu alo Giligal, akitenun ngesi edoki angolol.

¹⁶Esaa lopei ngolo, Chimei lokookeng a Gera lo abunit alore a Baurim, tolot atipei Yorudan akisiriamiar ekapolon Daudi.

¹⁷Arukito ngesi ka ngitunga a ekitela a Benjamen abunget apei. Bu tani Siba lo arai ka talokookeng ngitomon ka ngikan, ta ngikasubak etich ngitomwon-arei. Apot kesi tanangut Yorudan eringa ekapolon Daudi.

¹⁸Todoka kesi angolol esakete akitenun aloturu a ekapolon edoki angolol, ka akisub ibore daang ni asaki ekapolon Daudi. Ani na asakea ekapolon daudi akidok angolol, tadakakini Chimei kwap alongaren keng

¹⁹sodi tama, “Ekapolon, kimiek kare kimuriakis ngakiro naaronok asubi ayong akolongit na irotokinio iyong alo Yerusalem. Nyikiman ayong kori nyiitamana nabo ngakiro nguna.

²⁰Ekapolon, ayeni ayong atamar asechit ayong. Ngakiro nguna kesi araakar ayong itwaan nia ekingaren alotela alu elomito lowae lo alokwap abuni akisiriam iyong ekapolon, akolongit naga.”

²¹Tolim Abichai lokookeng a Seruya tama, “Ejoikinit Chimei eario kainyo elami ngesi ngolo aseuni Ekapolon Akuj toliwor ekapolon.”

²²Nakaneni tolimok Daudi Abichai ka lokaatokeng Yoab tama, “Ngae Kingisit esi atamar ikokinio ai? Isakete esi akichan ayong a? Ayong arai ekapolon a Ngisirael tokona, nakaneni emam Esiraelit eario akolongit naga.”

²³Sodi tolimok ngesi Chimei tama, “Kalimokinit ayong atamar nyikiario iyong.”

²⁴Abu Mepiboches lo arai etatait a Saul, bu akisiriam ekapolon Daudi. Napei kolong arotokinio ekapolon Daudi alo Yerusalem tanang akolongit na abongunio Daudi niajokon, nyilotara Mepiboches ngakejen, kori nyebanya ngitim a abokony, kori nyilotara ngiworui.

²⁵ Ani edoluni Mepiboches alo Yerusalem akisiriam ekapolon Daudi, tolimok ekapolon Daudi ngesi tama, “Mepiboches, nyo peibunio iyong erukosi ka ayong?”

²⁶Tatachak Mepiboches ngesi tama, “Ekapolon, iyeni cha iyong dang atamar angwalit ayong. Alimokini ayong ekasuban etich kang atamar todoka losikiria kang sodi erukosi ka iyong, nakaneni katomod ngesi ayong.

²⁷Keturum ngesi ayong ani iyei iyong, ekapolon, nakaneni ikoni iyong emalaikat a Akuj. Tosubere ayong ngakiro nakijoikinito iyong, ekapolon.

²⁸Ekapolon, ajoikinit kolong iyong iari ngitunga a awi kosi daang, nakaneni ibu iyong kitachamak ayong emuji alomesae kon. Ekapolon, nyitemokino ayong kalimokini iyong atamar kitosubakinea ayong ngakiro naajokak.”

²⁹Tatachak ekapolon Daudi ngesi tama, “Nyiilim nabo ngakiro ngache. Atiaku ayong atamar imorete iyong ka Siba ngiboro a Saul.”

³⁰Tatachu Mepiboches tama, “Kimiek Siba toting daang. Ketemokin ayong ni ibongunio iyong nawi niajokon.”

³¹Barisilai dang lo abunit anakwap a Gilead, abu bu alore a Rogelim akiten ekapolon Daudi edoki angolol a Yorudan.

³²Amojongit Barisilai noi, araakasi ngikaru keng ngitomwon-kauni. Abarit ngesi noi. Eritokinit ngesi ekapolon Daudi akimuj ka ngiboro ngirwa lu aperitor Daudi lore a Maanaim.

³³ Tolimok ekapolon Daudi ngesi tama, “Bua apana Yerusalem katochoik ayong iyong kaina.”

³⁴Nakaneni tatachu Barisilai tama, “Akidiekuut ngikaru kang lu ayarea, nyo kirukorea ayong ka iyong Yerusalem, ekapolon?

³⁵Eraakasi tokona ngikaru kang ngitomwon-kauni? Nyapedori ayong akiyen ibore ni ejok ka ni erono. Emam kona apedori ayong akiyen kebob akimuj kori ibore ni amasi ayong kori kepena. Emam kona eirari ngitoilio a ngitunga na eeotor. Aliwor ayong ekapolon itwaan ni kechani iyong.

³⁶Nyitemokino ayong aanyuni ebachit lo epol etia ngolo. Nakaneni kirukori ayong ka iyong wadio, tanang ekwakaye a Yorudan.

³⁷Ani erumor kimiek ayong atobongo nawi kang, sodi atotoanik diyete aliel ka apakang ka itiokang. Lokookang Kimuam logo, lo esubi etich kon. Ekapolon, toriko ngesi sodi tosubea nguna kijoikinito iyong.”

³⁸Tatachak ekapolon Daudi tama, “Arikori ayong ngesi atosubea daang na isaki iyong. Nakaneni kainakini ayong iyong ibore daang ni isaki iyong anikang.”

³⁹Abu Daudi ka ngitunga keng todoka Yorudan. Tanuak ngesi Barisilai sodi topia. Abu Barisilai tobongo nawi keng.

⁴⁰Ani kedoka ekapolon Daudi kerumor, itenarito ngitunga a Yuda daang ka epewae a Ngisirael, abu ngesi tolot Giligal, erukito ka Kimuam.

⁴¹Apot Ngisirael daang toloto nia ekapolon Daudi, tolimokis tamasi, “Ekapolon, nyo ingolikinitotor talokaatokosi, lu eraakasi ngitunga a Yuda atamar itemokino erai kesi kirikete iyong kitenasi ka ngitunga a awi kon, ta ngitunga luche todoka Yorudan?”

⁴²Tatachut ngitunga a Yuda tamasi, “Kikokini sua neni kainyo erai ekapolon Daudi eyenet kosi. Nyo ingoitotor esi kotere ngakiro nguna? Emam akimuj kosi nakimichat sua ngesi, nabo emam ibore kiinak ngesi sua”.

⁴³Tatachut Ngisirael tamasi, “Idwangito ngikitetio lu eraakar Daudi ekapolon kosi, idwangito lukus ngakidwanget ngatomon, tani kerai ngesi eyenet kus. Nyo kimenyaritotor esi sua? Nyiyenete esi atamar sua kiseuni alimun atamar atobuutu ekapolon Daudi a?” Nakaneni ekilenikinit noi ngitunga a Yuda anakiro ana alimunete akidwang Ngisirael.