Read turkana 2 Samuel 2 Bible Online

2 Samuel 2 - turkana bible

2 Samuel 2

¹ Ani erumor, kingit Daudi Ekapolon Akuj tama, “Ejoikinit ayong alosi atolema epei a ngirerea a Yuda a?” Tatachu Ekapolon Akuj tama, “Ee.” Kingit Daudi tama, “Ali?” Tatachu Ekapolon Akuj tama, “Eburon.”

²Sodi tolot Daudi Eburon erikit ngaberu keng naarei nabe Ainoam na abunit alo Yesireel, ta Abigail na arai apuserut a ekile anyaritae Nabal alo a ere a Karimel.

³Abu ngesi toriko tani ngitunga keng ka ngitunga a ngawiyei kech, sodi toloma lorerea lu edunyasi ka Eburon.

⁴Apot ngitunga a Yuda pot Eburon sodi kidokakis Daudi akimiet na etal nakou ekapolon a Yuda. Ani iirari Daudi atamar anuka ngitunga a ere a Yabech Saul alo Gilead,

⁵abu tomea ngitunga alimokin ngitunga ngulu kona, “Kitopia esi Ekapolon Akuj ani idodiuneta atamar imunosi ekapolon kus ani inuketa.

⁶Kimiekisi Ekapolon Akuj kitaanyu esi amina naationon na nyedaun ajokis keng! Kasubea ayong esi naajokak ani isubeta esi ngakiro nugu.

⁷ Tarata lu igogong totitiny! Atoana Saul lo arai ekapolon kus, nakaneni kedokakis ayong ngitunga a Yuda akimiet na etal nakou atoliwor ekapolon kech.”

⁸Ekarikon a ngasigerea a Saul, lobe Abiner lo arai lokookeng a Ner, apot tamataros ka lokookeng a Saul lobe Ichibochet todokasi angolol a Yorudan, tananga lore a Maanaim.

⁹Ani enangete inaa, kitiliwo Abiner Ichibochet ekapolon a ngakwapin anabe ta Gilead, ka Acher,[2] ka Yesireel ka Epiraim, ka Benjamen, ta ngiwaitin a Isirael daang.

¹⁰Araakasi ngikaru keng ngitomwon-omwon na aliworor ngesi ekapolon a Ngisirael. Abu ngesi topolok a ngikaru a ngiarei. Nakaneni amuno ekitela a Yuda Daudi,

¹¹ani na ayakar ngesi Eburon, topolok ngesi ngitunga a ekitela a Yuda a ngikaru a ngikan-kaarei ka ngilapio ngikan-kapei.

¹²Apot Abiner ka ngikapolok lu atupito Ichibochet tonyout alore a Maanaim toloto lore a Gibeon.

¹³Tonyout Yoab lo anyaritae itiokeng Seruya, ka ngikapolok luche etupito Daudi, kisiriama ta Abiner anabwel. Kiboikinos kesi neni, ajore apei lowae epei a abwel, ajore nache lowae loche a abwel.

¹⁴Tolimok Abiner Yoab tama, “Kimiekisi ngisorok ngidi a ngajorei yok tolemut ngiboro a ejie, tojikinos ebolosi.” Tatachak Yoab tama, “Kimiekisi tonyout.”

¹⁵Sodi ngikiliok ngitomon ka ngiarei lu aweikinito Ichibochet ka ekitela a Benjamen kitojwoto ngikiliok ngitomon ka ngiarei a Daudi.

¹⁶Apot ngikiliok ngulu, toting epei kech daang akou aloche, kichum ipei kech daang itwaan ni ajioto losiep a ekileng, sodi tadakakinos kesi lutomwon-arei ka nguomwon daang kwap totoaka. Kotere ngakiro nguna, enyaritae neni alo Gibeon, “Aro a ngilengea.”

¹⁷Apot ngitunga tojikinos, toroner ejie noi. Kidwanga ngitunga a Daudi Abiner ka Ngisirael.

¹⁸Talokookeng a Seruya luuni kesi ta Yoab, ka Abichai, ta Asael. Asael lo apirana ekoni emakata lokaadengan,

¹⁹abu kirita Abiner, kidira jik nakwaan keng.

²⁰Kingolia Abiner naabor sodi tama, “Iyong mono itwaan Asael a?” Tatachu ngesi tama, “Ee.”

²¹Tolim Abiner tama, “Tojongo akirisit ayong! Kirita epei a ngasigerea tolema ibore ni etingit.” Nakaneni abu Asael torubak irisit Abiner.

²²Tolimok nabo Abiner ngesi tama, “Tojongo akirisit ayong! Nyo kitingakinitor iyong ayong akiar iyong? Ekokini ayong aweikini lokaatokon Yoab ai?”

²³Nakaneni towou Asael aisikin akirisit Abiner. Abiner ngolo, toremo akwara keng akamaluot, torem Asael nakook sodi toporu akwara alogur. Kibusokin Asael kwap totoan. Ani itwaan daang ni etoruni ni atoanikinit ngesi, towo kaneni.

²⁴Nakaneni apot Yoab ka Abichai kiwapakis Abiner. Ani adooyoret a akolong, tananga lomukur a Ama, lo eyei kide Gia, ana eyei lorot lo etenere nariet a Gibeon.

²⁵Tochunakin ngitunga a ekitela a Benjamen towaa ka Abiner nabo alokidiama emukura.

²⁶Tanyara Abiner Yoab kingit tama, “Kiliwor tokona ngoni kiji jiik a? Nyiteete esi atamar ibooi ejie logo yau ngiman a? Kirai ngoni ngitunga a akwap a apei. Nyo nyilimokinea iyong ngitunga kon atamar tojongoto akirisit sua?”

²⁷Tatachak Yoab tama, “Ekong jik tani Akuj na eyari. Arai nyiiruorik iyong, kirisito iyong ngitunga kang tanang moi nataparach.”

²⁸Sodi tokutak Yoab aburuch esaki ngitunga keng tojongoto akirisit Ngisirael. Abu ejie tadaun.

²⁹Apot Abiner ka ngitunga keng kikiiyata akwaar ngina daang itorito nadipo a Yorudan. Todokasi kesi anangolol a Yorudan, ani kelot ataparach daang etia ni etia, tananga Maanaim.

³⁰Ani ebonguni Yoab ani erisitor Abiner, tochunak ngitunga keng wapei, kiitu ngikiliok ngitomon ka ngikan-koomwon lu amam, peimarakinitae Asael.

³¹Ngitunga a Daudi, aarito ngitunga 360 a Abiner, lu ekitela a Benjamen.

³²Tolemasi Yoab ka ngitunga keng akwaan a Asael tonukakis naliel na anukanakinio ngitunga a awi keng alo Betleem. Sodi toloto Yoab ka ngitunga keng akwaar kiiya, kiwalak Eburon.