Read turkana 2 Samuel 20 Bible Online

2 Samuel 20 - turkana bible

2 Samuel 20

¹Ayei itwaan a ekitela a Benjamen anyaritae Cheba, lokookeng a Bikiri. Arai ngesi itwaan nitipasit aronon. Tokutak ngesi aburuch sodi kirema tama, “Nyikisaki sua Daudi! Nyikiwapi sua ngesi! Ngisirael, potu apana nawi!”

² Apot Ngisirael toisikis Daudi sodi kirukosi ka Cheba, nakaneni kidongo ngitunga a Yuda emunosi ngesi, sodi kiwapa Daudi napei alo Yorudan tanang Yerusalem.

³Ani enangi ekapolon Daudi kai keng alo Yerusalem, tolim atamar kiratakinae ngapesuru keng a ngabwes natomon kiyokoi. Ngapesur a ngabwes nguna kesi nakolong edongete iyokiyete akai a ekapolon Daudi. Kitan ngesi kesi nakaneni nyepero ka kesi. Kiratakinae kesi iyokiyo ngirwa daang lu ayareta kesi Ebooyete kesi loger a ngapuser.

⁴Tolimok ekapolon Daudi Amasa tama, “Tochunak ngitunga a Yuda sodi kirukut ka kesi nege moi nache.”

⁵Tolot Amasa anyaraun kesi, nakaneni aringa kesi nyebonguno na anangea akolongit nakolong alimokinit ngesi ekapolon.

⁶Sodi tolimok ekapolon Daudi Abichai tama, “Kichani Cheba ngoni akidwang Abusalom. Torik ngitunga kang sodi kiwapiyasi ngesi kainyo epedori ngesi akilom lorerea ngidi lu edukitoe ngawasea, sodi kichan ngoni.”

⁷Apot ngasigerea na Yoab, ka ngasigerea na eyokiyete ekapolon Daudi, ta ngasigerea nache daang, torotokis alo Yerusalem ka Abichai akiwap Cheba.

⁸Ani enangete kesi nataaba naapolon alo Gibeon, kiriamun ka Amasa. Anapit Yoab ngiboro lu ejie. Ayei ekileng nakiroru na akodakinitae naruba. Ani na atenea ngesi ngaren, tachakun ekileng.

⁹Tolimok Yoab Amasa tama, “Nyaanu ngache, ekone?” Abu ngesi toruakin ngajul na a abokony a Amasa esaki anuakin.

¹⁰Peeyokit Amasa ekileng lo atingit Yoab alokiedieny. Abu Yoab kichum ngesi nakook sodi kiyesunos ngiboro a akook nalup. Totoan ngesi atipei nyinyiagakina Yoab akichum ngesi. Apot Yoab ka lokaatokeng Abichai toloto akiwap Cheba.

¹¹Towo itwaan ipei a Yoab alo diyete akwaan a Amasa, sodi tama, “Itwaan daang ni ibakit alowae a Yoab ka Daudi, kiwapak Yoab!”

¹²Aperi akwaan a Amasa alokiding erot, abutarito ngaakot. Abu itwaan nia Yoab ngini kingolik atamar awaanarete ngitunga daang lu etorununete neni. Abu ngesi kiria akwaan alorot kirik naro ani erumor kimukok eworu lodapal.

¹³Ani kelemar akwaan alorot kerumor, kiwapak itwaan daang Yoab, toloto akirit Cheba.

¹⁴Kitor Cheba nakwapea a ngitela kadaang a Ngisirael sodi tanang lore a Abel Bes Maaka. Apot ngitunga daang a emacher a Bikiri[22] kiriamariama sodi kiwapiyasi ngesi alore.

¹⁵Kiirasi ngasigerea a Yoab atamar eyei Cheba neni. Apot kesi toloto kiriama ere. Apot kesi totukokis ngalup natekur lokwaasea a awas anakalapatan, sodi toboka nabo kwap a awas esakete aukor awas.

¹⁶Ayei aberu ache natikooson lore ngolo. Abu aberu ngina kirema anawas tama, “Abala ayong esi a! Tolimokisi Yoab bu nege asaki ayong eruorikisi ka ngesi.”

¹⁷Tolot Yoab, sodi kingit aberu ngina ngesi tama, “Iyong irai Yoab a?” Tatachu Yoab tama, “Ee, ayong lo.” Tolim aberu ngina tama, “Ekapolon, topupok mono iyong ngakiro kang.” Tatachak Yoab tama, “Apupi.”

¹⁸Tolim aberu ngina tama, “Kolong kanuan, aminae atamar, ‘Kape kitolimokin alo Abel.’ Eger ngolo ngesi ekoanakinete ngitunga.

¹⁹Epol ere kosi noi. Erai epei a ngirerea alu isilito nabo tarai lo emunoi alo Isirael. Nyo isakea iyong akinyasun? Isaki iyong akinyasun ibore ni erai ika Ekapolon Akuj a?”

²⁰“Mam jik! Nyamunyari ayong kori nyenyasuni ere kus!

²¹Meere ibore kisaki sua ngini. Itwaan enyaritae Cheba lokookeng a Bikiri, lo erai eka a akwap ana ngimukur a Epiraim, ngesi angeri ekapolon Daudi. Kipotokinoe sua itwaan nipei en, sodi atorotokisi sua alore.” Tolim aberu tama, “Kimasakini sua iyong akou keng esitorutu kidiama awas.”

²²Ani erumor tolot aberu ngina lotunga a ere kidodik kesi ngakiro na ejoikinit esubakinete. Apot kesi totubut akou a Cheba kimasakis Yoab kisitorut kidiama awas. Tokutak Yoab aburuch na enyaraa ngasigerea keng torotokis alore. Apot kesi tobongosi nawi. Abu Yoab tobongo Yerusalem nia ekapolon Daudi.

²³Arai Yoab ekarikon a ngasigerea a Ngisirael. Benaya lokookeng a Yeoyada ngesi arai ekarikon a ngasigerea ana eyokiyete ekapolon.

²⁴Adoniram ngesi apolokinit ngitunga lu itingakinitae akisub etich. Yeochapat lokookeng a Ailud ngesi aweikinit akimar.

²⁵Chepa arai ekegiran a ngikesio. Sadok ka Abiasar kesi araakasi ngimurok.

²⁶Arai Ira dang lo a ere a Yair epei a ngimurok a Daudi.