Read turkana 2 Samuel 21 Bible Online

2 Samuel 21 - turkana bible

2 Samuel 21

¹Ngirwa lu araakar Daudi ekapolon, min eron a akoro a ngikaru a nguuni. Abu Daudi kingit Ekapolon Akuj ngakiro a akoro kangina. Sodi tama Ekapolon Akuj, “Esechito Saul ka ngitunga a awi keng ani aarea ngesi Ngigibeon.” (

²Pearaakasi Ngigibeon Ngisirael. Araakasi kesi ngitunga a Ngiamor ngidikidio, lusek ekongokinito Ngisirael atamar nyikiari. Nakaneni asaki Saul amunyar kesi ani aminar ngesi Ngisirael ka ngitunga a Yuda noi.)

³ Abu Daudi tanyarau Ngigibeon, tolimok kesi tama, “Nyo isakete esi ayong katosubakinea esi? Nyo ngakiro naajokak kasubakinea ayong esi kotere ngakiro naaronok kolong kisubere esi sodi topiareta esi ngitunga a Ekapolon Akuj?”

⁴Tatachut kesi tamasi, “Meere ngaropiyae kori egolit etachete nakingoikinitor sua Saul ta ngitunga a awi keng. Emam Esiraelit tani kisaki sua taarae.” Kingit Daudi tama, “Nyo tokona isakete esi katosubakinea esi?”

⁵Tatachut tamasi, “Asaki Saul amunyar sua tongop tani ipei kosi idongi Isirael.

⁶ Kipoto tokona talokookeng ngikan-kaarei sodi enenekisi sua lokito, atomieda alongaren Ekapolon Akuj alo Gibea, alo erai ere a Saul, alo arai ekapolon lo aseuni Ekapolon Akuj.” Tatachak ekapolon Daudi tama, “Kepotokini ayong esi kesi.”

⁷Nakaneni abu ekapolon Daudi kimiek Mepiboches lo arai lokookeng a Yonasan tarai etatait a Saul kotere ngikong lukolong ekongete Daudi ka Yonasan ania Ekapolon Akuj.

⁸Abu ngesi kipoto Arimon ka Mepiboches, lu araakasi talokookeng a Saul lu edouni Risipa na arai nakookeng a Aya. Kipoto tani talokookeng a nakookeng a Saul ana anyaritae Merab. Anyaritae apakeng a ngide alusapa kangulu Adiriel lo arai lokookeng a Barisilai, alo a akwap a Meola.

⁹Kipoto Daudi kesi nak Ngigibeon, lu enenekinete kesi moru alongaren Ekapolon Akuj tomieda. Apot kesi lukan-kaarei daang totoaka aapei. Aario kesi ngirwa lu isiakinere akilem ngamanat, napei isiakinio akilem erau.

¹⁰ Abu apese a ngabwes a Saul na anyaritae Risipa, na arai nakookeng a Aya tolem ngiguniae todukokinea ekal lo iboikin anataaba ana ayakasi ngawat a ngitunga alukatoak kangulu. Kiboikin ngesi neni napei esiakinere akilem ngamanat tanang ni aramea akiru. Eratakinit ngesi ngikieny anawat a ngitunga alukatoak kangulu naparan, ani nakwaare kiratak ngibuin.

¹¹Ani iirari Daudi ngakiro na asubi Risipa,

¹²abu tolot kidiau ngakoyo a Saul ka na alokookeng Yonasan alotunga a ere a Yabech alo a akwap a Gilead. (Akokoyarete sek kesi alo Bes-chan, ana arai aro atukuonotor ngitunga. Enenekinete Ngipilisti ngawat neni akolongit na aareta Saul alomoru a Giliboa.)

¹³Yau Daudi ngakoyo a Saul ka na a Yonasan, sodi tochunak tani ngakoyo a ngikiliok aluuni enenekinio lokitoe tomiedae.

¹⁴Apot ngitunga tonukakis ngakoyo a Saul ka Yonasan naliel a apakeng a Saul alo anyaritae Kich. Ayei aliel ngina lore a Sela, alo a akwap a Benjamen. Apot ngitunga tosuba ngakiro daang loger lo adungokinitor ekapolon Daudi. Ekisidi kanguna, abu Akuj kiira ngakiro na elipakinitere akwap.

¹⁵Tojikinos nabo Ngipilisti ka Ngisirael. Apot Daudi ka ngasigerea keng toloto akitijwore Ngipilisti. Akolongit apei na ajiere, abu Daudi tobur.

¹⁶Itwaan ipei nilangir-kooyan noi anyaritae Ichibibenob, lo atingit akwara a asuat ananyang, abu tama kori aari Daudi. Arai apotis a akwara kangina ngakiloi ngauni ka anus. Anapit itwaan ngini ekileng lokitetet.

¹⁷ Nakaneni abu Abichai lo arai lokookeng a Seruya bu aikin Daudi. Kitijik ngesi itwaan nilangir-kooyan noi ngini taar. Apot ngasigerea a Daudi kimaimaa ngesi tolimokis tamasi, “Nyikirukori nabo sua ka iyong lojie, kainyo nyikisaki sua iyong kitaar.”

¹⁸Ani ekisidi kanguna, tojikinetei ka Ngipilisti ani enyaritae Gob. Alojie kangolo, taar Sibekai lo a Ucha itwaan nilangir-kooyan noi anyaritae Sap.

¹⁹Tojikinetei nabo ka Ngipilisti ejie eche alo Gob. Abu Elianan lokookeng a Yair,[23] lo abunit alo Betleem, taar Golias lo a ere a Gas. Alangir akwara a Golias ekoni amorok akitoe nalangir eyei ni etokere ngiworui.

²⁰Apon tojikinetei nabo ejie eche alo Gas, ani ayei itwaan iche nilangir-kooyan noi ni amina ejie. Ayakasi ngesi ngimoyo ngikan-kapei nakan apei, toyakasi ngikan-kapei nakan nache. Ngakejen nabo dang kona pei. Arai ngesi alesit a ngitunga alulangir-kooyak noi.

²¹Kimenya ngesi Ngisirael. Abu Yonasan, lo arai lokookeng alokaatokeng a Daudi alo anyaritae Chama taar ngesi.

²²Araakasi luomwon ngulu ngalesea a ngitunga alulangir-kooyak noi a Gas. Apot Daudi ka ngasigerea keng taara kesi.