Read turkana 2 Samuel 23 Bible Online

2 Samuel 23 - turkana bible

2 Samuel 23

¹Daudi lokookeng a Yese ngesi lo etiliwori Akuj lo eyenikinitae. Aseuni ngesi Akuj a Yakobo kitiliwo ekapolon, nabo ngesi arai ekaitan a ngieosio aluajokak a Ngisirael. Ngakiro a Daudi na esal kesi nugu,

²“Iruoro Etau a Akuj anikang.

³Eruorik Akuj a Isirael. Ebala ataaba a Isirael kona, ‘Ekapolon epolokini itemit ngakiro eriyan, ngolo epolokinit iwapit ngakiro a Akuj,

⁴ikokini ngesi akicha na a ataparach, esaa lo ipiripiruunea akolong tamam ngidowon anadis, akicha na iturupuni nginyia aramet a akiru.’

⁵Ikokini Akuj epiari ngalesea kang neni, kainyo kichamakin ayong ka ngesi jik. Emam itwaan ebili achamunet ngina. Erai akichikakinet na nyilochi itwaan. Ibore ngini ngesi asaki ayong. Ibore kesidwang ayong ngimoe kang ngini, nakaneni esubakini Akuj nguna.

⁶Ikote ngitunga lu nyenupito ngiikwa lu echakaritae. Emam itwaan etapi kesi a ngakan.

⁷Ejoikinit iyong itingi asuat kori akwara. Enomiari kesi jik.”

⁸Lugu kesi eraakasi ngirora a ngasigerea a Daudi anakajwok. Anyaritae itwaan ni ekingaren Yocheb Bachebes lo emachar a Takemon, ni arai ekarikon “Aluuni.”[26] Kitiji ngesi ngikiliok ngamiae ngakan-kauni a akwara keng, sodi taar daang akitijiet apei.

⁹Itwaan nia ngiarei ani aluuni kajwok noi ngesi Eleasar lokookeng a Dodo, lo a emachar a Ao. Akolongit apei, apot ngesi ka Daudi tobenyut Ngipilisti lu achunakina esakete ejie. Apot Ngisirael tobongosi naabor,

¹⁰nakaneni toweik ngesi Ngipilisti kitiji tanang akan keng itenar tongop tani kona elakakini ekileng lo ejie. Apot kesi kidwanga Ngipilisti kotere Ekapolon Akuj akolongit ngina. Ani kebwanga ejie kerumor, tobongosi Ngisirael ni ayei Eleasar sodi tobutut ngiboro a ejie alokatoak.

¹¹Itwaan nia nguuni ani aluuni kajwok noi ngesi Chama lokookeng a Agee, lo a Ara. Achunakin Ngipilisti ni enyaritae Lei ni ayei amana a ngimare. Tamataros Ngisirael ani eyakasi Ngipilisti.

¹²Nakaneni toweik Chama Ngipilisti alomana, kikota kaneni, sodi taar Ngipilisti. Apot kesi kidwanga Ngipilisti kotere Ekapolon Akuj akolongit ngina.

¹³Ani eapikini ngirwa lu elemere ngamanat, apot nguuni “Alutomwon-uni” toloto naburibur enyaritae Adulam. Ayei Daudi neni na aperitotor ngajorei a Ngipilisti nadipo a Repaim.

¹⁴Ngirwa ngulu, ayei Daudi lomukura lo eriwokinitae awas, tolomite ajore a Ngipilisti Betleem.

¹⁵Abu Daudi kiito awi tolim tama, “Arai bo kainuni itwaan idio ngakipi alokare ana eyei lokidor a Betleem dang!”

¹⁶Apot ngasigerea nauni kajwok noi kimingakis kitoro kiding adakar a Ngipilisti, tookut ngakipi alokare sodi inut Daudi. Nakaneni towou ngesi akimat ngakipi nguna, pearai abu tobuko toliworos ngakipeyos ani a Ekapolon Akuj.

¹⁷Ebala, “Ekapolon Akuj, nyamasi ayong nugu jik! Ikokini ibore ngini akimat ngaakot a ngikiliok alu ajalete ngawat kech tonyout akitu kalu!” Abu ngesi tonger akimat ngakipi nguna. Ngakiro nguna idodiunito atitinyu a ngasigerea anauni kajwok kanguna.

¹⁸Abichai lo arai lokaatokeng a Yoab (anyaritae itiokech Seruya) ngesi arai ekarikon a ngasigerea “Anatomwon-uni kajwok.” Etiji ngesi ngikiliok ngamiae ngauni a akwara taar, sodi toliwor ngesi lokajwon noi ani eyakasi “Lutomwon-uni.”[27]

¹⁹Ngesi arai lokajwon noi ani eyakasi “Lutomwon-uni.” Abu ngesi toliwor ekarikon kech, nakaneni pearai ngesi lokajwon noi loger “Aluuni.”

²⁰Itwaan iche nikajwon noi ngesi Benaya lo arai lokookeng Yeoyada lo a ere a Kabiseel. Asubi ngesi ngakiro naationok, aari ngesi tani ngikiliok ngiarei lukajwok a Ngiamor. Akolongit apei, eyei ibore ni ikoni eloch nakwap, abu ngesi toloma nadui taar engatuny.

²¹Aari ngesi tani itwaan nilangir a akwap a Misiri. Atingit itwaan ngini akwara. Kitijik Benaya ngesi a aselej todema akwara anakan keng, taarea.

²²Araakasi nguna ngakiro naationok a Benaya alo arai epei “Alutomwon-uni.”

²³Arai ngesi lo ayenikinitae anikech, nakaneni peekoni “Luuni.” Toseu Daudi Benaya topolok ngasigerea na eyokiyete ngesi.

²⁴Ngitunga luche “Alutomwon-uni” kesi ta Asael lo arai lokaatokeng a Yoab, ka Elianan lo arai lokookeng a Bodo alo a Betleem,

²⁵ka Chama lo a elelea a Arod, ka Elika lo a elelea a Arod,

²⁶ka Eles lo a Pelet, ka Ira lo arai lokookeng a Ikech alo a ere a Tekoa,

²⁷ka Abieser lo a ere a Anasos, ka Mebunai lo a emachar a Ucha,

²⁸ka Salimon lo a emachar a Ao, ka Maarai lo a akwap a Netopa,

²⁹Eleb lo arai lokookeng a Baana, lo arai eka akwap a Netopa, ka Itai lo arai lokookeng a Ribai lo a arai eka ani enyaritae Gibea ani erai ika akwap a Benjamen,

³⁰ka Benaya lo a akwap a Pirason, ka Idai lo a ngadipoe ana eyakasi diyete ere a Gaach,

³¹ka Abialibon lo a a adipo a Araba, ka Asimapes lo a ere a Baurim,

³²ka Eliaba lo a akwap a Chaalibon, ka talokookeng a Yachen ka Yonasan,

³³ka Chama lo a emachar a Arar, ka Aiam lo a emachar a Arar,

³⁴ka Elipelet lo arai lokookeng a Aasibai lo a akwap a Maaka, ka Eliam lo arai lokookeng a Aisopel alo akwap a Gilo,

³⁵ka Esiro lo a Karimel, ka Paarai lo a Arab,

³⁶ka Igal lo arai lokookeng a Nasan alo a akwap a Soba, ka Bani lo a emachar a Gad,

³⁷ka Selek lo a emachar a Amon, ka Naarai lo a ere a Beeros, lo atingit ngiboro a Yoab lu ejie,

³⁸ka Ira, ka Gareb, lu araakasi daang ngika emachar a Yatir, ka Uria lo arai Eitit.

³⁹Araakasi ngikiliok lukajwok daang ngitomwon-uni ka ngikan-kaarei.