Read turkana 2 Samuel 5 Bible Online

2 Samuel 5 - turkana bible

2 Samuel 5

¹Apot ngitela daang a Isirael pot nia Daudi alo Eburon sodi tolimokis tamasi, “Kirai sua ngakoyo ka ngaakot kon.

²Kolong tani eringa Saul erai ekapolon, irikit iyong ngitunga a Isirael alojie. Abu nabo Ekapolon Akuj kichikak iyong atamar iliwor ekeyokon a ngitunga keng toliwor ekapolon kech.”

³Sodi pot ngikarikok daang alo Isirael ni ayei ekapolon Daudi alo Eburon. Kikong Daudi achamakin ka kesi, kidokakis kesi ngesi akimiet na etal nakou, toliwor ngesi ekapolon a Isirael.

⁴Araakasi ngikaru a Daudi ngitomwon-uni na aliworor ngesi ekapolon. Topolok ngesi a ngikaru a ngitomwon-omwon.

⁵ Topolok ngesi Yuda eyei Eburon, ngikaru a ngikan-kaarei ka ngilapio ngikan-kapei. Topolak ngesi Yuda ka Isirael eyei Yerusalem, a ngikaru a ngitomwon-uni ka nguuni.

⁶Abu tanang ngirwa lu aremioto Daudi ka ngitunga keng Yerusalem. Etamito Ngiebus lu araakasi ngikulepek a akwap kangina atamar kori nyelemari Daudi ere ngolo. Apot kesi tolimokis Daudi tamasi, “Nyilomuni iyong tooma nege, Kiratakinete iyong tani ngimuduk ka ngikangwalak.” (

⁷Nakaneni tolema Daudi awas a Sion, sodi tolimokinae neni ekiro be, “Ere a Daudi.”)

⁸Akolongit ngina tolimok Daudi ngitunga keng tama, “Eyei itwaan iche kane ni eremokino Ngiebus loger lo aremitor ayong a? Ani kesaki itwaan ngini akiar kesi, ejoikinit ngesi edokari kitor lopuke a ngakipi taar ngimuduk ka lukangwalak.” (Ngakiro nguna kesi ebeyere, “Nyelomarete ngimuduk ka ngikangwalak kai a Ekapolon Akuj.”)

⁹Ani kelema awas kerumor, abu Daudi tolom neni sodi tanyara, “Ere a Daudi.” Abu ngesi kisiriam adukuoru napei alo Milo tanang lowae lo alotooma.

¹⁰Ngirwa daang, toliwor ngesi lokajwon kainyo arukito ngesi ka Ekapolon Akuj Namerikanyer.

¹¹Tomea Iram lo arai ekapolon a Tiro ngitunga nia Daudi, etingito ngakito a ngichekereng. Ayakasi ngikadukok lu edukete a ngakito ka lu edukete a ngamoru, lotunga ngulu.

¹²Abu ekapolon Daudi toyen atamar etiliwo ngesi Ekapolon Akuj ekapolon alo Isirael, nabo apia apolou keng kotere ngitunga keng.

¹³Ani kewot ngesi alo Eburon tanang Yerusalem kerumor, torik Daudi ngapesur a ngabwes ka ngaberu ngache, pena ngide lupesur ka lusapa lukaalak.

¹⁴Ngirora a ngide keng alu edounio alo Yerusalem kesi Chamua, ka Chobab, ka Nasan, ka Solomon,

¹⁵ka Ibiar, ka Elichua, ka Nepeg, ka Yapia,

¹⁶ka Elichama, ka Eliada, ta Elipelet.

¹⁷Apon Ngipilisti tolimokinae atamar etiliwor Daudi ekapolon a Isirael. Kotere ngakiro nguna, abu ajore a Ngipilisti tonyou akirem Daudi. Ani iirari ngesi ngakiro nguna, tolot ngesi ni adukitoe awas.

¹⁸Todolut Ngipilisti nadipo a Repaim topetakin neni.

¹⁹Kingit Daudi Ekapolon Akuj tama, “Etijikini Ngipilisti a? Kisidwangi iyong ayong kesi a?” Tatachak Ekapolon Akuj tama, “Ee, kitijik! Kesidwangi ayong iyong kesi!”

²⁰Sodi tolot Daudi Baal Perasim kidwang Ngipilisti kaina. Tolim tama, “Ejukun Ekapolon Akuj alokiding ngimoe kang loger a akaale.” Kotere ngakiro nguna, apon tanyarae neni Baal Perasim.[4]

²¹Ani ematarosi Ngipilisti, toisikis ngakujo kech nasubuna kaneni, sodi tolemasi Daudi ka ngitunga keng ngakujo nguna.

²²Ani erumor tobongosi Ngipilisti nadipo a Repaim toloma neni nabo.

²³Ani ingisi Daudi Ekapolon Akuj nabo, tatachak ngesi, tama, “Nyiitijik kesi kane, nakaneni kiloda kitijik kesi alowae aloche, alodiyete ngikito lube talokimieta.

²⁴Ani iirari iyong erue a ngakejen alokidiama ngikito, kitijik iyong kesi kainyo kengarenikini ayong iyong edwang ajore a Ngipilisti.”

²⁵Tosubak Daudi ngakiro na adungokinit Ekapolon Akuj. Abu ngesi kirita Ngipilisti tobongosi alo Geba tananga Geser.